“Është shndërruar në një lubi”, Berisha: Sektori i energjisë ka gllabëruar 1.1 miliardë euro investime

Kreu i PD, Sali Berisha zhvilloi një takim mbi projekt-buxhetit 2024 me ekspertë dhe drejtues të Departamenteve të Energjisë, Planifikimit të Territorit, Pyjeve, Peshkimit, Ujërave, Bujqësisë, Infrastrukturës-Transportit dhe Sporteve në Hotel Rogner.

Në fjalën e tij, Berisha tha se në fushën e energjisë, vjedhjet janë stratosferike.

Berisha: Po të kaloni në fushën e energjisë, vjedhjet janë edhe aty stratosferike.

Sektori privat sot prodhon 48% të energjisë së vendit, falë asaj strategjie që u ndoq për shfrytëzimin e ujërave.

Ndërtimi i kaskadave dhe i HEC-eve në zona të ndryshme mbulon sot 48% të nevojave.

E gjithë vjedhja përsëri bëhet me kaskadën e Drinit.

Në vend që ajo të shërbejë si një rregullator absolut i çmimeve të energjisë në vend, ajo është shndërruar në një lubi, me të cilin qeveria e qeveritarët, Rama-Balluku, etj., vjedhin duke e zbrazur atë dhe duke importuar në kohë kur çmimet janë maksimale, vjedhin me qindra milionë euro.

Ky sektor që nuk asnjë përmirësim ka gllabëruar në këto vite 1.1 miliardë euro investime.

Vetëkuptohet njëlloj si në fushat e tjera, 80-90% të tyre të vjedhura.

Historia e buxhetit është vjedhje, vjedhje dhe vetëm vjedhje”.