Tabaku padit Veliaj në SPAK për krim elektoral: Po kryejnë punime pa tender gjatë fushatës

Kandidatja për deputete e PD në Tiranë, Jorida Tabaku ka paditur në Prokurorinë e Posaçme kundër Korrupsionit dhe Krimit të Organizuar (SPAK) kryetarin e Bashkisë Erion Veliajn për krime elektorale, pasi sipas saj, lanë bërë punime me kompani pa tendera dhe në kohë fushate.

Tabaku nga faqja zyrtare e PD-së, nëpërmjet një videoje shprehet se në njësinë numër 2 në kryeqytet, “po hidhet asfalt elekoral”, ndërsa paralajmëron të gjithë ata që “përfshihen në vepra penale” se do të denoncohen në SPAK.

“Sot kanë ardhur për të hedhur asfalt elektoral, me një kompani pa tender, me një kompani e cila nuk dihet kush është. Kanë ardhur këtu dhe kanë hedhur zhavorr, siç po bëjnë në pjesën më të madhe të rrugicave të degës numër 2. Kjo rrugicë sot denoncohet dhe shkon në SPAK. Erion Veliaj, Florian Pullazi, kushdo tjetër që bën vepra të tilla penale, do të denoncohet për krimet elektorale”, u shpreh Tabaku.

Ajo shtoi më tej se askush nuk mund t’i mashtrojë më qytetarët me copa asfalti që u hidhen vetëm për t’u marrë votën.

“Qytetarët ë Tiranës e të gjithë Shqipërisë e dinë që pavarësisht se çfarë ndodh, në këto 10 ditë e pavarësisht sesi sillen në këto 10 ditë janë po të njëjtët. Janë ata që i kanë detyruar shqiptarët të largohen masivisht, janë ata që varfëruan familjet shqiptare, janë ata që i kanë lënë edhe pa ujë, pa drita, pa ushqim. Që kanë shkaktuar eksodin më të madh të shqiptarëve në këto 30 vite.

Edi Rama, Erion Veliaj e kushdo tjetër, ta harrojë se qytetarët e Tiranës do shiten për një dorë asfalt, e për një dorë zift. Investime si ky që po bëhen në rrugicat e degës 2 ,janë thjesht shembulli i paaftësisë së tyre, i arrogancës së tyre. Këta nuk ofrojnë dot asgjë tjetër përveç këtij modeli. Këta i kanë lënë më harresë qytetarët e Tiranës. Mos harroni! Mos harroni që ata që ju varfëruan për 8 vite, ata që ju detyruan të largoheni për 8 vite, ata që kanë shkaktuar korrupsionin më të madh në 8 vite nuk mund të ndryshojnë”.

Për këtë arsye ajo i ftoi qytetaret që ta largojnë këtë model me votë më 25 prill.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm