Sulmi në uzinën e Gramshit, Mediu: Të krijohet Agjensia e Sigurisë Kombëtare, Putin kërkon vatra për konflikt

Kreu i Partisë Republikane, Fatmir Mediu, ka reaguar lidhur me ngjarjen e ndodhur mbrëmjen e djeshme në Uzinën Ushtarake Çekin në Gramsh.

Në Facebook, Mediu dënon në emër të partisë sulmin e dy rusëve dhe ukrainasit ndaj ushtarakëve, teksa i kërkon Ministrisë së Mbrojtjes dhe intencave përgjegjëse, të krijojnë një Agjensi të Sigurisë Kombëtare e cila t'i shqyrtojë dhe ndjekë të gjitha çështjet që kanë të bëjnë me Sigurinë Kombëtare.

Mediu shkruan se Shqipëria është përcaktuar nga Putin dhe Moska si kundërshtar i Rusisë dhe se tashmë lideri rus po kërkon vatra të reja për të krijuar konflikte dhe tensione në Ballkanin Perëndimor.

Postimi i Mediut:

Partia Republikane dënon ashpër sulmin ndaj ushtarakëve shqiptarë në Uzinën Ushtarake të Gramshit nga shtetas rusë.

Duke vlerësuar ushtarakët për qëndresën dhe zbatimin e detyrës njëkohësisht i urojmë shërim sa më të shpejtë.

Kërkohet që Ministria e Mbrojtjes, Shtabi i Përgjithshëm, Shërbimi Informativ i Ushtrisë dhe Shërbimi Informativ Kombëtar në mbështetje të Prokurorisë të hetojnë me seriozitet këtë sulm, agresion të paprecedent në territorin shqiptar, për më tepër ndaj ushtarakëve tanë, në një territor ushtarak nga shtetas rusë.

Rusia dhe Putin ka për qëllim krijimin e vatrave të tjera të konfliktit dhe tensionit në rajonin e Ballkanit mbas pushtimit të paligjshëm të Ukrainës nga Rusia.

Shqipëria është përcaktuar qartë nga Putin dhe Moska si kundërshtar i Rusisë.

Nuk është hera e parë që shërbimet ruse veprojnë në territorin tonë dhe në Ballkan.

Kujtoj shpërthimet në Rumani dhe Bullgari të organizuara prej rusëve.

Shërbimet ruse nën petkun diplomatik kanë tentuar prej kohësh të korruptojnë ushtarakë dhe civilë shqiptarë për qëllimet e tyre subversive.

Shërbimi Ushtarak Shqiptar ka pasur infomacione nga burime të ndryshme për koordinim të shërbimeve ruse, serbe dhe maqedone kundër Shqipërisë para marjes së ftesës për antarësim në NATO.

Për fatin e keq, asnjëherë nuk kemi analizuar siç duhet çdo informacion apo ngjarje. Dua të kujtoj që Rusia dhe Serbia tentuan të organizonin një grusht shteti kundër Malit Zi për eleminimin e President Gjukanovic para antarësimit të Malit të Zi në NATO.

Provokimet në Kosovë janë një politikë e koordinuar ndërmjet Rusisë dhe Serbisë.

Është nevojë urgjente ndërtimi i një Agjensie të Sigurisë Kombëtare e cila t'i shqyrtojë dhe ndjekë të gjitha çështjet që kanë të bëjnë me Sigurinë Kombëtare.

Jemi i vetmi vend në botë që ka një Këshill të Sigurisë Kombëtare aspak funksional dhe fatkeqësisht çështjet e sigurisë i trajtojmë në mënyrë diletante.