Profilet/ Nga Basha tek Ahmetaj, venitja e 5 politikanëve shqiptarë gjatë 2023-it

Viti 2023 lidhet kryesisht me zgjidhjet e 14 majit në nivel bashkie në fushën politike.  Zhvillime të rëndësishme trazuan ujërat e së majtës, ku skandale, arrestime, videoskandale tronditën opinion publik.

Po ashtu dhe opozita ka pasur intensivisht zhvillime brenda kampit të tyrë.

Zgjedhjet i gjetën demokratët të ndarë si kurrë më parë, deputetët e saj të ndarë mes dy fraksioneve – njëri rreth themeluesit të partisë dhe veteranit politik Sali Berisha, tjetri rreth kreut të komanduar të  PD-së, Enkelejd Alibeaj.

Kampi i Berishës u bashkua për zgjedhjet e majit me Partinë e Lirisë të ish-presidentit shqiptar Ilir Meta.

Po ashtu ky vit u shoqërua dhe nga denoncime të shumta ku kryesorja ishte afera e inceneratorëve.

Ndërkaq Politiko.al ka renditur pesë politikanët që 2023-shi i solli ulje në karrierë dhe pesë të tjerë që njohën rritje këtë vit.

 

Zbritje

Enkelejd Alibeaj 

Vëmendja që kërkoi pas dorëheqjes së Lulzim Bashës dhe pozicionimi krah këtij të fundit, nuk i kushtuan pak Enkelejd Alibeajt. Ai mbajti për pak kohë postin e kryetarit në detyrë dhe më pas veproi si kryetar i grupit demokrat, por si të tillë e njihnin vetëm socialistët.

Alibeaj doli kundër Sali Berishës, duke mbajtur pas vetes një grup deputetësh, numri i të cilëve erdhi duke u tkurrur me kalimin e kohës.

Ai vijon përpjekjet për të përfaqësuar PD-në në tryeza me socialistët, madje bashkoi edhe votat në Kuvend me këta të fundit.

Po ashtu Alibeaj përmes një shkrese zyrtare, i është ankuar KQZ-së dhe AMA-së me argumentin se Sali Berisha po përdor logon e Partisë Demokratike në zgjedhjet e 14 Majit dhe i kërkoi të ndërhyjë në mediat që e cilësojnë atë kryetar të Partisë Demokratike.

Por normalisht bazuar në ligjin e vendit tonë, kjo ‘dëshirë”e Alibeajt u rrëzua nga kryekomisioneri Celibashi.

Alibeaj njoftoi më 17 maj 2023 dorëheqjen nga Partia Demokratike, pas shpalljes së rezultateve të zgjedhjeve vendore të 14 majit, ku PD e tij nuk mori dot asnjë bashki.

Alibeaj tha në një deklaratë për shtyp se është vënë në pikëpyetje mbijetesa e partisë, teksa vuri në dukje ngërçet e krijuara më 14 maj.

Përpos pozicionit të kryetarit të komanduar, post që ia delegoi Lulzim Basha, Alibeaj ka njoftuar edhe tërheqjen e tij nga kreu i grupit parlamentar.

Në zgjedhjet vendore të 14 majit, PD e Alibeajt nuk siguroi dot asnjë mandate në 61 bashkitë e vendit. Në Tiranë, ku kandidoi me Roland Bejkon ky i fundit nuk siguroi vota mjaftueshëm, madje u la pas nga Arlind Qori i ‘Lëvizjes Bashkë’.

Funksionet që Alibeaj ka mbajtur në PD janë: deputet, anëtar Kryesie, nënkryetar, kryetar i Grupit Parlamentar, drejtues politik i qarkut të Fierit, drejtues politik i Shkodrës dhe kryetar i PD-së Vlorë.

Lulzim Basha

Edhe ky vit ka qenë një dështim për Lulzim Bashën. Ai u largua nga drejtimi i Partisë Demokratikë në muajin mars të 2022, pa i sjellë asnjë fitore asaj në 9 vite që e drejtoi. Dorëheqja e tij u kërkua nga shumica e demokratëve, pasi PD nuk arriti të fitonte asnjë bashki në zgjedhjet e pjesshme të 6 marsit.

Ku dha dorëheqjen, Basha la një shteg të hapur për veten duke thënë se "do të jetë i angazhuar në ringritjen e PD rreth vlerave, parimeve dhe standardeve demokratike". Por më pas ai qëndroi në hije.

Gjatë muajve që kaloi në prapavijë, Basha duket se kishte hartuar një plan të detajuar për marrjen e kontrollit të partisë dhe funksionimin si opozitë kundër mazhorancës socialiste në pushtet në 2023.

Teksa dy grupimet ishin të qarta tani, Rithemelimi dhe PD-ja e Vulës, në mbledhjen e kryesisë u shfaq haptazi  se në PD e vulës janë krijuar dy grupime, ku i pari synonte kthimin e Bashës në krye të partisë ndërsa grupimi i dytë që ka besuar se dorëheqja e Bashës ishte reale dhe se ai është sinonim i humbjes së garantuar. Këta votuan kundër ose refuzuan të votojnë për mbajtjen e zgjedhjeve për kryetar.

Përplasja u përshkallëzua kur një grup personash mbështetës të Lulzim Bashës, kërcënuan dhe shanë deputetët që i dolën kundër.

Pas situatës së krijuar në mbledhjen e Kryesisë, deputetët e quajtën Bashën orkestrues të dhunës ndaj tyre.

Gazment Bardhi foli për grupe paramilitare, për “dhunë verbale, presion dhe shantazhe ndaj deputetëve të PD që mendojnë ndryshe”.

Vetë Lulzim Basha e dënoi dhunën ndaj kolegëve të tij, por duke e minimizuar atë. “Dënoj me forcë çdo sjellje kërcënuese. Të përjashtohen ata që dhunuan deputetë e gazetarë” tha ai ndërsa hynte në parlament.

Karriera politike e Lulzim Bashës nisi që nga shfaqja me KOP në 2004, ndërsa në 2005-ën u zgjodh deputet në qarkun e Elbasanit. Nga viti 2005 deri në vitin 2011, mbajti postet e ministrit të Transporteve, më pas të ministrit të Jashtëm dhe në fund atë të Brendshëm. Në vitin 2011, Lulzim Basha u zgjodh në krye të Bashkisë Tiranë dhe në 2013 si kryetar i PD, pas dorëheqjes së Sali Berishës, i cili humbi zgjedhjet parlamentare.

Menjëherë pas rizgjedhjes si kryetar i PD-së. Lulzim Basha nisi betejën për dekriminalizimin e Kuvendit të Shqipërisë në vitin 2014-të, ku numri i personazheve të lidhur me botën e krimit ishin ulur në karriget e parlamentit.

Lufta ndërmjet socialistëve dhe demokratëve në Kuvend për dekriminalizimin solli më në fund fitoren e opozitës në Kuvend, ku në vitin 2015-të u miratua dhe ligji për dekriminalizimin, ligj i cili dha menjëherë efketet, pasi disa nga deputetët socialistë lanë mandatet pasi ishin dënuar më parë në vende të ndryshme të BE-së, raste të tilla ishin largimi i Mark Frrokut dhe Arben Ndokës.

3 muaj para zgjedhjeve parlamentare të vitit 2017-të Lulzim Basha dhe deputetët e PD të mbështetur edhe nga militantët dhe anëtarësi qëndruan në çadër para kryeministrisë, duke u cilësuar si një nga qëndresat më të mëdha opozitare.

Por pas këmbënguljeve të fortë të ndërkombëtareve, Lulzim Basha takohet m e kryeministrin Edi Rama në 17 Maj të vitit 2017-të, e cila njihet ndryshe dhe si marrëveshje e fshehtë.

Zgjedhjet elektorale të 2017-s janë dhe humbja e parë e Bashës si kryetar i PD-së.

2019 -Djegia e mandateve dhe mospjesëmarrja në zgjedhjet Lokale

2021- Humbja e zgjedhjeve të 25 Prillit

Zgjedhjet elektorale të 25 Prillit kishin pritshmëri të mëdha nga opozita për të bërë rotacionin e madh, me shpresë që do ndodhte ajo që kish ndodhur në të shkuarën ku qeveria binte në mandatin e dytë.

9 shtatori 2021- Çarja e madhe me Sali Berishën

9 shtatori do të niste zyrtarisht dhe luftën e madhe mes Bashës dhe Berishës.

Berisha nisi takimet me demokratët në bazë nën “Foltoren”, dhe arriti që në 11 Dhjetor të thërriste dhe Kuvendin Kombëtar, ku sipas tyre u mor vendimi për shkarkimin e Bashës.

Ndërkohë që 18 Dhjetori do të shënonte një tjetër përplasje të fortë jo vetëm mes Berishës dhe Bashës, por mes vetë demokratëve.

Nga njëra anë Basha thërriste Kuvendin Kombëtar, ndërsa në anën tjetër Berisha dhe Grupi i Rithemelimit kishin shpallur referendumin për konstatimin e vendimit të 11 Dhjetorit për shkarkimin e Lulzim Bashës.

2022- Zgjedhjet e 6 Marsit dhe dorëheqja e Bashës

Zgjedhjet e 6 marsit ishin dhe përballja finale këtë herë jo mes opozitës dhe mazhorancës, por mes PD-së zyrtare të Lulzim Bashës dhe ‘Shtëpisë së Lirisë’ të mbështetur nga Sali Berisha.

Në 6 mars të 2022, kandidatët e Lulzim Bashës pësuan disfatë të madhe në të 6 Bashkitë, ku përveç Rrogozhinës ku kandidati i PD u rendit i dyti në 5 të tjerat dolën forcë e tretë politike.

Menjëherë pas zgjedhjeve të 6 Marsit ata që mbështesnin Bashën kërkuan largimin e tij nga drejtimi i partisë, kjo solli dhe dorëheqjen nga posti i nënkryetarëve të Grida Dumës dhe Agron Gjekmarkajt, i cili kishte vetëm dy muaj në atë post pasi zëvendësonte të larguarin Alfred Rushaj.

Ilir Meta 

Një emër tjetër i cili është venitu këtë gjatë 2023 në politikë, është ai i ish presidentit, njëkohësisht dhe kreut të Partisë së Lirisë, Ilir Meta.

Meta me Partinë e Lirisë mori pjesë në zgjedhjet e 14 majit si pjesë e një koalicioni me Partinë Demokratike të Sali Berishës, Patinë Demokristiane të Nard Nokës dhe PBDNJ-n e Vangjel Dules.

Sigla dhe motoja e koalicionit ishte “Bashkë Fitojmë”. Partia udhëheqëse e koalicionit ishte Partia e Lirisë, duke e vendosur Ilir Metën në një pozicion dominues të këtyre zgjedhje lokale.

Daljet e Metës në media pas zgjedhjeve kanë qenë shumë të pakta. Në konferencat e pakta Meta ka folur për aferën e inceneratorëve, drogën në repartin e Zall Herrit, kursin e euros, etj.

Meta ishte Kryetar i Parlamentit të Shqipërisë nga 2013 në 2017. Më 28 prill 2017, Ilir Meta u zgjodh presidenti i 7-të Republikës së Shqipërisë. Meta gjithashtu mbajti poste si Zëvendës Kryeministër, Ministër për Evropën dhe Punët e Jashtme dhe Ministër i Ekonomisë, Tregtisë dhe Energjisë. Para kësaj, ai mbajti Kryesinë e Komisionit Parlamentar të Integrimit Evropian. Meta themeloi Lëvizjen Socialiste për Integrim (LSI) në 2004.

Meta konsiderohet nga media dhe publiku si krijuesi dhe drejtuesi i Polit të Tretë në Politikën Shqiptare. Ishte Kryeministër i Shqipërisë prej vitit 1999 deri në 2002.

Arben Ahmetaj

Prej 2005-s, kur Edi Rama mori kontrollin e Partisë Socialiste, Arben Ahmetaj ka ngjitur gradualisht shkallët e pushtetit.

Por këtë vit Ahmetaj është venitur pasi i dolën në shesh të palarat. Nga shoqëria civile dhe opozita ishin dorëzuar një seri padish në SPAK kundër inceneratorëve dhe mes të paditurve nga ana e PD-së ishte edhe emri i Ahmetajt.

Ish-zv.kryeministri Arben Ahmetajt u shpall në kërkim ndërkombëtar nga SPAK. 

Deputeti socialist u larguar nga vendi disa orë para se SPAK të dërgonte ne Kuvend  dhënien e autorizimit për arrestimin e tij, për këtë arsye është njoftuar INTERPOL dhe ish-numri 2 i qeverisë është shpall në kërkim ndërkombëtar.

Prokuroria e Posaçme pretendon se Arben Ahmetaj, në pozicionin e ministrit të Zhvillimit Ekonomk, Tregtisë e Sipërmarrjes, ka përfituar një vilë në bregdet dhe gati 500 mijë euro si ryshfet nga biznesmenët e inceneratorëve.

Sipas SPAK, vlerat janë përfituar në mënyrë të drejtpërdrejtë ose të tërthortë nga Ahmetaj, përmes pagesave nga persona të tjerë, por burimi i parave ishte Klodian Zoto e Mirel Mërtiri.

Në karrierën e tij Ahmetaj ka mbajtur funksione të rëndësishme si zv.ministër në Ministrinë e Integrimit Europian (2004-2005) dhe zv.ministër në Ministrinë e Energjisë dhe Industrisë (2003-2004). Ka kryer funksionin e Drejtorit të Përgjithshëm në Drejtorinë e Përgjithshme të Tatimeve të Shqipërisë dhe në CV-në e tij thuhet se ka qenë përgjegjës për hartimin e politikave dhe legjislacionit të ri fiskal (Kodi Fiskal, Akcizat dhe legjislacioni i ri për taksën direkt).

Bardh Kadilli

 

Bardh Kadilli ka qenë i pari që ka hedhur kandidaturën për kryetar të Partisë Demokratike, pas humbjes së zgjedhjeve më 25 prill 2022.

Gjatë këtij viti, pra 2023, figura e Kadillit është venitur, daljet e tij në media kanë qenë të rralla.

Ish-kandidat për kryetar të Partisë Demokratike ka dhënë mendimin e tij për veprimet e kësaj partie dhe zhurmën e shkaktuar në seancat plenare, por edhe në komisionet parlamentare.

Ai tha se Partia Demokratike është tretuar në vlera dhe është ndarë në fragmente, të cilat sipas tij përplasen për interesa personale dhe jo për interesin e atij grupi njerëzish, të cilët i kanë votuar në zgjedhjet e 25 prillit 2021.

Fatbardh Kadilli ishte anëtari i parë që sfidoi Bashën për kryesinë e partisë, ndërsa pak më pas në garë hynë Agron Hoxhaj dhe Edit Harxhi. Ai u rendit i fundit, duke marrë gjithsej 781 vota.