Alibeaj drejt dështimit para zgjedhjeve të 14 majit, si po i firojnë një nga një kandidatët për kryetar bashkie

Fushata e zgjedhjeve lokale të 14 majit nuk ka nisur ende, por ‘ethet’ e garës po shtohen dita-ditës.

Ndërsa partitë e koalicionet kanë dorëzuar në KQZ listat e kandidatëve për kryetarë bashkie dhe Këshilla Bashkiakë, pala e Alibeajt po përballet me vështirësi dhe braktisje ndërsa zgjedhjet zhvillohen pas më shumë se një muaji.

Edhe pse nuk dihet me saktësi se sa është numri i kandidatëve të regjistruar, Alibeaj mundi të dalë me një kandidatë për Tiranën, Roland Bejko.

“Duhet te kishim po, 61 kandidat për zgjedhjet lokale,  por stërzgjatja e procesit gjyqësor e krijoi efektin e pasivitetit duke filluar nga unë i pari.”- tha Alibeaj për mediat.

Por një ditë pasi Alibeajt deklaroi publikisht se do të hyjë në zgjedhje me 20 kandidatë, listat e kandidatëve për kryetarë bashkish, por edhe për këshilltar kanë filluar të firojnë.

Deri tani janë gjashtë bashki, në të cilat kandidatët ose janë tërhequr ose në momentin e fundit nuk janë aprovuar nga kryesia.

Në Korçë dhe Lezhë kandidatët janë tërhequr. Gjergji Gjata u tërhoq bashkë me 40 kandidatët për këshillin bashkiak të Korçës për shkak se u ndje i tradhtuar nga lidershipi i partisë në Tiranë, ndërsa Sandër Marku në Lezhë ka vendosur të mos futet në garën e 14 majit, për shkaqe ende të paqarta.

Sakaq, Genc Doçi në Kurbin, Bujar Vreto në Librazhd, dhe Ibrahim Bruka në Vorë nuk janë aprovuar si kandidatura nga kryesia e PD edhe pse më herët ishin prezantuar si kandidatë në bashkitë përkatëse.

Së fundmi, edhe kandidati për Bashkinë e Krujës Sabah Sheta, ka njoftuar tërheqjen nga gara. Në një postim në Facebook, Sheta shkruan se ka vendosur të mos bëhet pjesë e farsës politike që në fund i shërben përçarjes së demokratëve.

“Kam reflektuar këto ditë dhe kam vendosur të mos bëhem pjesë e asnjë farse politike, të mos i shërbej përçarjes demokrateve dhe qytetareve te mi, atyre qe na respektuan ne si force politike dhe na votuan masivisht ne 25 prill 2021. Kjo është arsyeja madhore pse kam vendosur të tërhiqem nga kandidimi për Bashkinë e Krujës në emër të PD. Por kjo nuk do të thotë se do të largohem nga fusha e betejës!”, shkruan ai.

Ndërkohë, në media është raportuar se tkurrja e kandidaturave të Alibeajt në zgjedhjet lokale të 14 majit pritet të vijojë edhe më tej me disa kandidatë që janë duke e rishikuar vendimin e tyre për tu futur në garën e 14 majit.