Armiqësia e hapur Rama-Veliaj kthen Bashkinë e Tiranës në një 'arenë lufte'

Kryebashkiaku i Tiranës, Erion Veliaj dhe kryeministri Edi Rama janë deklaruar tashmë zyrtarisht në një luftë të hapur mes tyre.

Deri para pak kohësh, Veliaj ishte njeriu më i përfolur si pasuesi i Edi Ramës në krye të PS, por sot ata shfaqen hapur si armiq të betuar. 

Kështu, në media prej disa orësh qarkullon një dokument i datës 18 Mars, i firmosur nga dora e Veliajt në ambientet e qelisë së paraburgimit të Durrësit, i cili shkarkon nga detyra e kryebashkiaken në detyrë të të besuarës së Ramës, Anuela Ristanit dhe emërimin në vend të saj të të besuarës së tij, Sara Goxhaj. Nuk ka ende detaje se si është proceduar për këtë shkresë nga Veliaj. 

Sakaq, Goxhaj, njihet edhe si shefe kabineti e kryetarit të Bashkisë së Tiranës, Erion Veliaj, përpara se të emërohej në detyrën e nënkryetares së Bashkisë.

Pas shkreses 'djegëse', Rama pa humbur kohë ka shkruar mbrëmjen e djeshme në Bashkinë e Tiranës dhe i ka kërkuar Ristanit, që të mos e zbatojë vendimin e Veliajt, si dhe ka urdhëruar të mos protokollojë urdhrin e nxjerrë nga Veliaj, për marrjen e detyrave të kryetarit të Bashkisë nga Sara Goxhaj.

Jo vetëm kaq, por Edi Rama i ka kërkuar Ristanit, që të firmosë dhe shkarkimin e Alban Dokushit nga posti i Sekretarit të Përgjithshëm të Bashkisë dhe në vend të saj të emëronte Jonida Halilin.

Por, mediat raportojnë se Veliaj nga burgu ka urdhëruar Policinë Bashkiake, që të mos i lejojë Halilit hyrjen në godinën e Bashkisë.

Më pak fjalë, bashkia e Tiranës është kthyer në një arenë lufte mes dy zyrtarëve të lartë, duke krijuar ngërçe në funksionimin e saj normal për shërbimet ndaj qytetarëve. 

Eksperti Pano Soko deklaronte sot i revoltuar se puna në bashki është paralizuar. "Vetëm sot më kanë kontaktuar 3 subjekte, puna në administratën e bashkisë është paralizuar totalisht. Këshilli i Ministrave duhet të shkarkojë kryetarin e bashkisë dhe Presidenti të shpallë zgjedhjet e reja që administrata të clirohet dhe të ketë drejtim legjitim politik. Bashkia po trajtohet si prona e secilit, vë unë kë të dua", tha Soko përmes një video mesazhi në rrjetet sociale. 

Hakmarrje përtej hekurave të qelisë 

Partia Socialiste e drejtuar nga kryeministri Edi Rama dorëzoi pak ditë më parë në KQZ listat emërore të 186 kandidatëve për deputet për zgjedhjet e 11 majit.

Lista e socialistëve pati supriza, ndonëse strategjia e përdorur këtë herë nga Rama u paralajmërua nga ai vetë. Sipas tij, deputetët me një mandat nuk do të kandidonin në listën e mbyllur, por do të dalin në betejën elektorale për të mbledhur vetë votat për të siguruar një ulëse në Kuvendin e ardhshëm. 

Ajo që ra në sy është se një numër i madh deputetësh aktualë, u lanë jashtë garës duke i përjashtuar përfundimisht, ndërsa shumë emra të spikatur dhe me kontribute prej vitesh në PS janë në zonë 'rreziku'.

Kështu, bëhet fjalë për emra si Erion Braçe, Pandeli Majko, Damian Gjiknuri, personi që luajti rol në ndryshimin e Kodit të ri Zgjedhor që vota e emigrantëve të numërohet brenda afateve ligjore, Fatmir Xhafaj, ish-ministrja Etilda Gjonaj, Anila Denaj etj. Këto emra ishin renditur në listën e hapur për qarkune  Tiranës, ashtu si nuk mund të mos bjerë në sy edhe një tjetër detaj.

Në listë të hapur mbeten edhe Etjen Xhafaj, Klotilda Bushka, Toni Gogu të cilësuar edhe si 'dora' e kryebashkiakut Erion Veliaj, i arrestuar që në 10 shkurt të këtij viti. 

Kujtojmë se deputetja dhe kryetarja e komisionit të ligjeve Klotilda Bushka është vendosur nën hetim nga SPAK në kuadër të dosjes korruptive Veliaj-Xoxa. SPAK njoftoi zyrtarisht se deputetja socialiste po hetohen për kryerjen e veprës penale të “veprimeve që pengojnë zbulimin e së vërtetës”.

Deri ku do të shkojë lufta Rama-Veliaj? Lufta mes Ramës dhe Veliajt tashmë ka nisur në prag të zgjedhjeve elektorale dhe ende nuk dihet se si do të përfundojë. Kjo mbetet për të parë lëvizjet e tyre në orët në vijim, një sfidë e kthyer mes tyre si një lojë shahu pasi edhe vetë kryeministri e ka cilësuar shpesh herë politikën si 'shah'.