Dikur aleancë me Ramën, sot koalicion me Bashën, ç’fshihet pas përplasjeve të FRD-së me bashkinë e Tiranës

Punonjësit e Policisë Bashkiake u shfaqën këtë të premte në zyrat e Frymës së Re Demokratike (FRD), për të marrë në zotërim mjediset që i janë dhënë me qira kësaj force politike e që sipas Bashkisë, tanimë duhet të liroheshin.

Në derën kryesore të selisë ishte vendosur njoftimi ku kërkohej “lirimi i menjëhershëm i ambienteve për qëllime sistemimi”, ndërsa u ishte ndërprerë dhe energjia elektrike.

Bëhet fjalë për ambientet e katit të tretë, ku Bashkia thekson se hapësira është pronë e bashkisë, por, në bazë të ligjit bashkia është e detyruar të gjejë strehim forcave të reja politike.  

Ky konflikt përfshiu edhe presidentin Ilir Meta.

Ky i fundit u përplas me Policinë Bashkiake në zyrat e FRD-së teksa u kërkoi që të largohen nga ambientet e FRD-së pasi sipas tij po shkelnin ligjin duke synuar nxjerrjen jashtë të kësaj partie nga zyrat.

Meta reagoi me tone të forta duke thënë se policët duhej të largoheshin ndryshe do t’i çonte me duart e tij ne burg.

Pse erdhi përplasja me FRD

Ndoshta për FRD ky vendim i bashkisë nuk ka qenë aq surprizues dhe deri diku i pritshëm. Kjo pasi kreu i saj, Sali Shehi pak ditë më parë kandidon me listën e Partisë Demokratike për zgjedhjet e 25 prillit.

Kujtojmë se Fryma e Re Demokratike ka qenë në aleancë me socialistët në pushtet.  Madje, një prej nënkryetarëve aktualë të Bashkisë Tiranë, Andi Seferi është përfaqësues i kësaj force politike.

Por FRD së fundmi ju bashkua koalicionit opozitar për zgjedhjet e 25 Prillit, një vendim që duket se ka krijuar përplasje të brendshme dhe që çoi në dorëheqjen e kryetarit të saj, ish presidentit Bamir Topi, ndërsa sot Bashkia u kërkoi të lirojnë zyrat.

Si u krijua FRD

Bamir Topi ka qenë një ndër figurat e larta të PD-së, me marrjen e pushtetit nga Berisha në vitin 2005, ai do të zgjidhej më pas dhe presidenti i vendit nga mazhoranca e djathtë.

Marrëdhëniet mes Topit dhe Berishës, mes presidentit dhe kryeministrit asokohe ishin tejet konfliktuale duke kujtuar këtu dhe përplasjet e forta për ngjarjet e 21 janarit.

Me mbarimin e mandatit presidencial, Topi do të krijonte partinë Fryma e Re Demokratike. Në zgjedhjet parlamentare që solli dhe rrëzimin e Berishës në 2009-ën, Topi nuk arriti të fitonte një mandat deputeti edhe pse ishte shumë pranë arritjes së këtij pragu elektoral.

Ndërkohë Topi ka bashkëpunuar në zgjedhjet lokale me Partinë Socialiste, duke bërë kjo parti të kishte postin e nënkryetarit të bashkisë.

Gjatë këtyre viteve Topi ka qenë kritik si ndaj Bashës dhe ndaj Ramës. Për PD-në ndante mendimi në intervistat e tij se ajo parti kontrollohej ende nga Berisha. Por aktualisht Fryma Demokratike është një parti që ka pësuar rrjedhje. Asaj i janë larguar Gazment Oketa dhe Aleksandër Biberaj.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm