Surprizat e koalicionit opozitar: Nga partia e Mark Frrokut, e Bamir Topit apo deputetit ‘tradhtar’

Dje, Opozita e Bashkuar firmosi marrëveshjen për koalicionin parazgjedhor.

14 parti, me në krye Partinë Demokratike u bashkuan në një listë të përbashkët për zgjedhjet parlamentare të 25 prillit.

Koalicioni opozitar do të ketë emrin “Partia Demokratike-Aleanca për Ndryshim”, ndërkohë që disa nga partitë aleate do të kenë vende të sigurta në listat zgjedhore.

Marrëveshja u arrit pas një sërë takimesh që lideri demokrat, Basha zhvilloi me krerët e partive të tjera opozitare në selinë blu.

Megjithatë, prej ditës së djeshme ky koalicion është komentuar edhe për surprizat dhe risitë që prodhoi pas zbulimit të marrëveshjes.

Afrimi i partisë së Bamir Topit, një ditë më jep dorëheqjen nga drejtimi i FRD

Ish-presidenti Bamir Topi ishte një nga emrat surprizë që ishte ftuar për të qenë pjesë e koalicionit me Partinë Demokratike.

Në listë është renditur edhe Fryma e Re Demokratike e themeluar nga Bamir Topi, i cili në zgjedhjet e shkuara ishte në koalicion me PS, ndërsa marrëveshja me Bashën u firmos nga Sali Shehi, i autorizuar nga Fryma e Re Demokratike.

Megjithatë, një ditë më pas, Bamir Topi jep dorëheqjen nga drejtimi i partisë Fryma e Re Demokratike. Deri më tani nuk kemi asnjë reagim nga Topi, si dhe arsyet që e çuan atë drejt dorëheqjes.

Koalicion me deputetin ‘tradhtar’

Kryedemokrati Basha nënshkroi marrëveshje edhe me Artur Rroshin e Ballit Kombëtar, aktualisht është deputet në kuvend, i cili pranoi mandatin e deputetit pasi opozita vendosi djegien e tyre në 2019.

Partia e Mark Frrokut

Basha ka firmosur si parti koalicioni dhe me partine Kristian Demokrate, e drejtuar nga Mark Frroku, përmes së cilës ai mundi të hyjë ne Kuvend.

Në vitin 2013 kjo parti u pozicionuar në aleancë me PS, ndërsa opozita e drejtuar nga Lulzim Basha e bëri Mark Frrokun “target” të sulmeve të veta.

Aktualisht, kjo parti drejtohet nga Dhimitër Muslia.

LSI e ndarë, bashkë në tre qarqe

LSI në këto zgjedhje do të garojë si forcë e vetme politike, me listën e saj zgjedhore. Mësohet se kjo taktikë do të ndiqet në 9 qarqe, ndërsa në tre të tjera (Kukës, Dibër dhe Gjirokastër) PD dhe LSI do të dalin me listë të përbashkët.

Kjo strategji është komentuar prej opozitarëve si mënyrë për maksimalizimin e votës, në zona ku ka një numër të vogël votuesish.

Koalicionit opozitar i përbërë nga 14 parti

Partitë që do të marrin pjesë në koalicioni opozitar janë:
1. Partia Demokratike-Lulzim Basha
2. Partia Republikane-Fatmir Mediu
3. Partia Agrare Ambientaliste-Agron Duka
4. Partia per Drejtesi Integrim dhe Unitet-Shpëtim Idrizi
5. Lëvizja për Zhvillim Kombëtar-Dashamir Shehi
6. Partia Demokristiane-Nard Ndoka
7. Partia Fryma e Re Demokratike-Sali Shehi

8. Partia e Ballit Kombëtar-Artur Roshi
9. Partia Bashkimi per te Drejtat e Njeriut-Vangjel Dule
10. Partia Bashkimi Liberal Demokrat-Arian Starova
11. Partia Bashkimi Demokrat-Ylber Valteri
12. Partia Mendimi i Djathtë Liberal-Mustafa Lici
13. Partia Lëvizja e Legalitetit-Shpëtim Axhami
14. Partia Kristian Demokrate-Dhimitër Muslia

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm