E deklaroi Rama dy javë më parë, a është Italia ‘shteti mik’ që do i ofrojë Shqipërisë 360 mijë doza vaksinash

Kryeministri Edi Rama pritet të zhvillojë nesër dhe pasnesër (5 dhe 6 mars) një vizitë në shtetin fqinj, Itali.

Rama do të shoqërohet nga ministri i Shtetit për Rindërtimin, Arben Ahmetaj, ministrja e Shëndetësisë, Ogerta Manastirliun, ministrja e Arsimit, Evis Kushi, dhe deputeti Fate Velaj.

Mediat italiane kanë zbardhur axhendën që do të ndjekë kryeministri dhe sipas tyre kjo vizitë vjen në kuadër të 30 vjetorit të eksodit masiv të shqiptarëve në vendin fqinj.

Ndonëse mediat italiane japin detaje mbi vizitën dy-ditore të Ramës, natyrshëm ky takim me shumë gjasë lidhet me deklaratën e kryeministrit dy javë më parë nga Rinasi, kur priti ngarkesën me 8.190 vaksina të Pfizer.

Në 22 shkurt, Rama deklaroi se është drejt përmbylljes së një marrëveshjeje me një shtet mik për të marrë 360 mijë doza vaksinash të AstraZeneca-s.

Sipas tij, pas 10-15 ditësh, ai do të kryente një vizitë drejt këtij shteti.

“Kam besim se shumë shpejt do japim lajmi të garantimit të një sasie të konsiderueshme vaksinash. Me një shtet mik jemi shumë afër, me shumë gjasë në ditët në vijim 10-15 ditët në vijim do bëj një vizitë atje dhe me shumë gjasë do marrim konfirmimin përfundimtar për sasinë e 360 mijë dozave të AstraZeneka që na është dhënë e konfirmuar në nivel ministror. Me një shtet tjerë jemi shumë afër”, deklaroi Rama dy javë më parë.

Kjo do të thotë se nëse i referohemi kësaj deklarate të dy javëve më parë, atëherë shteti mik i bie të jetë Italia. Ky fakt përforcohet edhe prej prezencës së ministres së Shëndetësisë, Ogerta Manastirliu.

Axhenda e Ramës sipas mediave italiane

Rama do të jetë i pranishëm në Pulia ditën e premte aty ku do të zhvillohet një sesion i jashtëzakonshëm në Këshillin e Qarkut, ku prezent do të jetë dhe ministri i Jashtëm italian,  Luigi Di Maio.

Ai do të marrë pjesë në inaugurimin e ekspozitës “Eksodi”, e krijuar nga Nicola Genco, ngritur në Agora të Ndërtesës së Këshillit Rajonal, aty ku do të ketë dhe një performancë të violonçelit Redi Hasa. Ekspozita “Shokë dhe Engjëj” e kuruar nga Alfredo Pirri është vendosur në të njëjtat hapësira.

Rektorët e universiteteve Apuliane do t’i dorëzojnë Ramës një kopje të manualit për “Rajonet e Sigurta” të përkthyer në shqip dhe të hartuar falë punës së 130 personaliteteve nga bota shkencore e katër universiteteve kulturore.