E premtja e 'zezë' e Veliajt

Oficerët e policisë gjyqësore ushtruan sot që në orët e para të kësaj të premte (6 dhjetor) kontrolle në zyrat e kompanisë së bashkëshortes së kryebashkiakut të Tiranës Erion Veliaj, Ajola Xoxa.

Në sajë të këtij kontrolli, asaj i sekuestruan dhe telefonin celular, pasi SPAK ushtroi kontroll në zyrat e biznesit të bashkëshortes së Veliaj në Sky Toëer në kryeqytet, ku ndodhet Qendra Harabel, një fondacion me objekt promovimin e artit e themeluar nga vetë Xoxa.

Po ashtu, kontrolle u ushtruan dhe në banesën e vëllait të  Veliaj, duke avancuar një hetim të nisur nga kryebashkiakut Veliaj dhe rrethit të tij familjar.

Pas titujve të mediave, Prokuroria e Posaçme reagoi, por u rezervua në detaje. Në një njoftim zyrtar, sqaroi shkurtimisht se ka kryer disa "veprime hetimore në kuadër të një procedimi penal".

“Prokuroria e Posaçme kundër Korrupsionit dhe Krimit të Organizuar informon se janë ndërmarrë disa veprime hetimore në kuadër të një procedimi penal,” tha SPAK përmes një njoftimi për shtyp, ndërsa pretendoi se nuk mund të jepte më shumë detaje.

Veliaj në Gjermani, por bllokon komentet në Facebook

Vetë Veliaj, pikërisht sot nuk ndodhej i pranishëm në Shqipëri. Siç kishte njoftuar përmes rrjeteve sociale, ai ndodhet në Gjermani për një vizitë zyrtare. 

Pavarësisht, duket se Veliaj është kujdesur menjëherë që të heqë komentet në Facebook, pasi SPAK ka njoftuar se ka nisur procedimin penal në lidhje me pasurinë e tij. 

Çështjet e 'nxehta' ndaj Veliajt 

Ndonëse SPAK nuk bëri me dije se për cilin hetim bëheshin veprimet hetimore, kujtojmë se ndaj Veliajt dhe personave të lidhur me të, ka një sërë kallëzimesh dhe hetimesh.

Ai akuzohet për rolin e tij në rastin e inceneratorit të Tiranës si dhe në çështjen e kompanisë "5D", që zotërohej nga ish drejtorë të Bashkisë.

Në fund të muajit prill të këtij viti, Veliaj u thirr në Prokurorinë e posaçme ku qëndroi për më shumë se 7 orë, për të dhënë shpjegime për inceneratorin e Tiranës. Në dalje, Veliaj përsëriti se Bashkia që ai drejton nuk kishte lidhje me procesin e inceneratorëve.

Në fund të vitit të kaluar drejtori më i rëndësishëm i Bashkisë, Taulant Tusha u arrestua në kuadër të hetimeve për impiantin e trajtimit të mbetjeve të Tiranës, ndërsa pak muaj më pas, Veliaj mori një tjetër goditje kur në muajin mars u arrestuan dy ish drejtorë të Bashkisë.

Për katër të tjerë u dhanë masa më të lehta. Dyshimet e Prokurorisë ishin se dy drejtorët Redi Molla dhe Maringlen Qato, zotëronin një kompani private përmes së cilës kishin përfituar fonde publike nga Bashkia e Tiranës.

Ndaj Veliaj, dhe familjarëve të tij të afërm ka nisur prej disa muajsh dhe një hetim pasuror.

Kjo situatë duket se ishte shkaku kryesor për të cilin ai u shmang nga drejtimi politik i partisë socialiste në Tiranë, dhe u la jashtë një angazhimi në vijë të parë për zgjedhjet e ardhshme politike.