“Hallin do ia delegoj dikujt tjetër”, kush është emri më i përfolur si pasues i Edi Ramës

 

Kryeministri Edi Rama deklaroi dje në “Real Story” në ‘News24’ se nëse PS-ja nuk merr shumicën e mandateve në zgjedhjet e 25 prillit, ‘hallin’ do ia delegojë dikujt tjetër.  

Kreu i socialistëve tha se nuk do të bëjë më negociata me parti apo deputetë të tjerë për të ndarë pushtetin me ta.

Por, nëse i duhet të zgjedhë një bashkëqeverisje ‘nga halli’ siç e tha ai, këtë ‘problem’ do t’ja delegojë dikujt tjetër.

Po ashtu, Rama tha se PS do të vazhdojë rrugëtimin edhe pas mbarimit të karrierës së tij politike.

“Nëse PS nuk merr shumicën që mua bashkë me shqiptarët më duhet për ta çuar Shqipërinë në majën ku mund të ngjitet, por s’i ka mandatet për të qeverisur dhe duhet që të fillojë të bëjë një proces nga halli, hallin do ia delegojë dikujt tjetër. PS nuk do mbarojë nëse mbaron karriera ime.

PS do të vazhdojë”, pohoi Rama, duke nënkuptuar edhe një largim të mundshëm pas 25 prillit, nëse PS nuk merr ulëset e nevojshme për të vijuar me një mandat të tretë qeverisës.

Kryeministri nuk foli më për detaje, por natyrshëm lind pyetja se kush është emri që pason vendin e Ramës dhe njeriun që merr në dorë frenat e PS?!

Bëhet fjalë për kryebashkiakun e Tiranës, Erion Veliaj, personi i cili është përfolur shpesh edhe si pasues i Edi Ramës për kreun e Partisë Socialiste.

Sipas kryetares së LSI-së, Monika Kryemadhi, në një intervistë në tv Klan në 27 nëntor 2020, kryetari i Bashkisë së Tiranës, Erion Veliaj, aspiron që të bëhet kryetar i Partisë Socialiste pas zgjedhjeve të ardhshme.

Këtë betejë, kryetarja e LSI-së e konsideroi si një betejë që nuk është e shqiptarëve, por e Ramës dhe Veliajt.

“Pas 25 Prillit, Erion Veliaj aspiron për t’u bërë kryetar i Partisë Socialiste. Kjo nuk është beteja e shqiptarëve, kjo është betejë midis atyre të dyve”, tha Kryemadhi.

Megjithatë, vetë Veliaj është pyetur shpesh herë lidhur me këtë debat në media, por vazhdimisht e ka mohuar.

Pak ditë pas deklaratës së Kryemadhit, në një intervistë për ABC, Veliaj tha se ishte i kënaqur vetëm me detyrën që kishte.

“Jo, nuk është fare ambicia ime. Besoj që më del e më tepron një punë e jashtëzakonshme për qytetin e zemrës sime, që është Tirana” – tha Veliaj.

Ftesa për Bashën

Kryeministri i vendit, Edi Rama prej ditësh i ka drejtuar një ftesë drejtuar kryetarit të Partisë Demokratike, Lulzim Basha për bashkëpunim pas zgjedhjeve të 25 prillit. Ai tha se kjo ftesë është bërë me synimin për të çuar Shqipërinë në një hap tjetër dhe për t’i dhënë fund politikës së deritanishme.

Gjithsesi, Rama nuk i ka kursyer kritikat për Bashën, për të cilin theksoi se nuk është lideri i opozitës aktuale. Nga ana tjetër, Basha ka refuzuara i prerë mundësinë për bashkëpunim pas 25 prillit.