‘Komplot mafioz i Ramës dhe ndërkombëtarëve’, si ndryshoi qëndrim Basha për zgjatjen e afateve të vettingut

Partia Demokratike është deklaruar pro ndryshimeve kushtetuese për zgjatjen e afatit të vetingut në drejtësi në seancën parlamentare.

Vendimi iu komunikua deputetëve në mbledhjen e grupit që kryedemokrati Lulzim Basha zhvilloi para nisjes së seancës.

Mësohet se kryedemokrati u është drejtuar deputetëve se për PD-në janë prioritet Reforma Territoriale dhe ajo Zgjedhore, ndaj Basha u shpreh pro zgjatjes së vettingut duke marrë në këmbim votat e mazhorancës për realizimin e “Territoriales” dhe “Zgjedhores”, të cilat i konsideron i prioritete të tij.

Më herët, në media u raportuan lajme se Basha kishte biseduar me Brukselin dhe Uashingtonin për këtë çështje.

Por, si ndryshoi qëndrim Basha  për një proces të cilin e kishte shpallur të kapur prej Edi Ramës, që kur ligjet zbatuese të Kushtetutës konsensuale u miratuan pa dakortësi.

“Opozita është pro vetingut sipas parashikimeve kushtetuese të 22 korrikut për vetingun. Ligji i miratuar në mënyrë të njëanshme nga Edi Rama nuk ka lidhje me këtë reformë dhe nuk i shërben vetingut, por kapjes së procesit të vetingut për të kapur pastaj gjithë aparatin e drejtësinë.
Ka vetëm një garanci për largimin e gjyqtarëve dhe të prokurorëve të korruptuar: një veting i pavarur. Këtë veting do të bëjmë në Republikën e Re”, deklaronte Basha në prill të 2017-ës.

“Edi Rama komploti është zbuluar. Projekti i vettingut është një projekt mafioz ku janë përfshirë diplomatë të lartë në Tiranë për llogari të Edi Ramës, kanë marrë peng ekspertë të BE-së. Bashkëkomplotistët e t’u janë dekonspiruar dhe i pret gjykimi në institucionet ndërkombëtare.

Të pranojnë shqiptarët që të shkojnë në zgjedhje me Kryeministrin komandant të ushtrisë së drogës? Kurrë nuk do ta pranojnë. Prandaj miku ynë Knut (Fleckenstein) një të vërtetë ka thënë; asgjë nuk ka të përbashkët me situatën në Maqedoni para zgjedhjeve, sepse këtu është 10, 100 herë më keq”, shprehej Basha asokohe kur opozita kishte ngritur ‘çadrën e lirisë’ përballë dritares së kryeministrisë, aksion që përfundoi me marrëveshjen e 17 majit mes tij dhe Ramës.

Edhe në shtator 2018, organi zyrtar i partisë së drejtuar nga Lulzim Basha, citonte kryetarin të kishte deklaruar në mbledhjen e grupit parlamentar se vetingu ishte i korruptuar prej fillimit.

“Çlirimi i qeverisjes nga krimi është një nga prioritetet. Po ashtu, Reforma në Drejtësi është e diskretituar. Të paktën 11 gjyqtarë janë mbajtur jashtë rregullave, ndërsa vetingu është i korruptuar prej fillimit, pra synohet kapja e KLGJ dhe KLP nga ana e qeverisë”.

Ndërkohë, në vjeshtën e 2021, Basha vjen me një tjetër qëndrim, pasi sipas tij nuk mund të refuzohet SHBA, pasi nuk mund të lihen jashtë ndërkombëtarët nga monitorimi i procesit të reformës në drejtësi.

"Ne nuk i japim votë Partisë Socialiste. Partia Socialiste sot donte që vettingu t’i kalonte KLP-së dhe KLGJ-së, ku Edi Rama, Ëngjëll Agaçi dhe të tjerë krerë të Partisë Socialiste kontrollojnë KLP-në dhe KLGJ-në në shumicë. Le t’i themi shqiptarëve të vërtetat.

Çlirohuni edhe ju si media, siç jemi çliruar ne si demokratë, unë si kryetar i Partisë Demokratike. KLGJ-ja dhe KLP-ja, janë të kapura nga Partia Socialiste e Shqipërisë. Të paktën në rastin e vettingut sipas komisioneve, ndonëse dhe aty ndodhen pinjollë qeveritarë, ka një monitorim ndërkombëtar, ka të paktën dy anëtarë, njëri tashmë i pezulluar dhe tjetri para drejtësisë, ka një garanci më shumë. Është arsyeja për të cilën e kemi votuar para 5 vitesh, këtu nuk ka lajm, Në qoftë se doni të krijoni lajm aty ku nuk ka lajm, krijojeni", u shpreh Basha.

Në seancën e së enjtes, edhe ish-kryeministri Sali Berisha doli në Foltore me iPad në dorë duke risjellë deklaratën e kryedemokratit Lulzim Basha lidhur me procesin e Vettingut, teksa sulmonte procesin e vettingut si “të kapur nga qeveria e Ramës në bashkëpunim me disa ndërkombëtarë”.

Për zgjatjen e mandatit të organeve të vetingut duhen 94 vota, që mazhoranca e vetme nuk i plotëson. 77 votave të saj i duhen dhe 17 vota të PD-së. 

Pas votimit për zgjatjen e mandatit për organet e Vetingut, Parlamenti do të votojë për ngritjen e 2 komisioneve për zbatimin e menjëhershëm të kërkesave të PD.

Në dhjetor të 2021 Komisioni i Venecias rekomandoi vijimin e procesit të Vettingut në Shqipëri, si një procedurë në përputhje me standardet europiane.

Të martën delegacioni i BE dhe ambasada Amerikane u bënë thirrje deputetëve që të votojnë pro. Edhe përfaqësuesit e OSBE-së në Tiranë deklaruan një ditë më parë se mbështesin zgjatjen e mandatit të institucioneve të Vettingut.

Nga maxhoranca ka pasur thirrje të njëpasnjëshme për zgjatjen e mandatit të Vettingut.

Mandati aktual i organeve të Vetingut përfundon në qershor 2022, ndërsa me zgjatjen e propozuar do të përfundojë në fund të vitit 2024.