E SHPJEGUAR

Ku u fokusua fjala e Ramës në Asamblenë e PS, “lumë” akuzash ndaj Metës e LSI: Parti si qelizat e kancerit, Lulin do ta shpëtoj

Ku u fokusua fjala e Ramës në Asamblenë e PS,

Mesditën e së premtes u mblodh Asambleja e Partisë Socialiste, për herë të parë në një ambient të hapur, në amfiteatrin e Tiranës pranë Liqenit Artificial. Shkak u bë pandemia covid-19.

Ndërsa kishte veshur një kostum blu dhe atlete të bardha, kombinimi i zakonshëm tashmë i kryeministrit, Rama mbajti një fjalim të gjatë që zgjati gati dy orë.

Në këto 120 minuta, shefi i qeverisë dhe kreu i PS u fokusua fillimisht në punët e kryera në dy mandatet qeverisëse, ndërsa shprehu ambicien për mandatin e tretë.

Ai renditi disa pika sipas tij ku janë kryer arritje si në arsim, infrastrukturë, sistemin shëndetësor, administratën publike, foli për digjitalizimin e shërbimeve publike, apo edhe ngritjen e aeroporteve, dy në Vlorë dhe një në Kukës e reforma të tjera.

Megjithatë, duket se Rama kishte një objektiv tjetër në këtë fjalim të gjatë, shigjetimi i kundërshtarëve politikë.

Ndonëse, logjika të çon te kundërshtari më i madh kundër PS, Partia Demokratike, në fakt gishtin e mbajti thuajse gjatë gjithë kohës me akuza te aleati i demokratëve, LSI-ja, por edhe presidenti Ilir Meta, ish-lider i kësaj force politike.

Rama e cilësoi LSI-në si një parti që nuk ka lidhje me përgjegjësinë qeverisëse dhe se do të jetë pjesë e qeverisë në kurriz të dy partive të mëdha PD dhe PS.

Bomba që hodhi në erë koalicioni me LSI ka qenë reforma në drejtësi. E dini shumë mirë që ndarja u bë e pariparueshme për një arsye shumë të thjeshtë, se LSI është krijuar për të marrë sa më shumë pushtet duke marrë peng njërin nga dy të mëdhenj.

Ka lindur si forcë hakmarrëse, ka përfituar nga degradimi i PS, një boshllëk i krijuar nga  pakënaqësia legjitime brenda PS ku shumë njerëz ndodheshin të papromovuar sa duhet dhe është rritur në kurriz të PS dhe PD.

Njësoj si qelizat e kancerit që thuhet se rriten pa qëllim, shtohet vetëm për ta vdekur organizimin që kapin. Me LSI nuk ka mundësi”, deklaroi Rama.

Duke u ndalur te presidenti Ilir Meta, Rama tha se ai takohet skutave dhe bën fushatë fshehurazi për LSI-në.

 “ Ilir Meta flet për banditë e për trafikantë, ndërkohë që profesorë e intelektualë qenkan përjashtuar nga PS, dhe iu kërkon të bashkoheni me të për të marrë mbrapsht Kastriot Islamin, që më rezulton të jetë profesori i vetëm i përjashtuar, dhe t’i bëni atë që s’thuhet PS, por këtu vlen diçka tjetër, që të thuhet, rithuhet, dhe unë e them dhe e rithem: jo vetëm për reformën në drejtësi, por dhe luftën kundër krimit, atë që bën PS, as nuk mund ta çonte njeri nëpër mend.

Kujt i shkonte në mend se ata që kanë kryer krime të rënda, të japin llogari për pasuritë e tyre. Iliri do video, unë me video nuk merrem fare, s’më interesojnë fare videot dhe llafet për videot. Kërkon video për skutat ku ai futet, por është e sigurt që President në botë, në Shqipëri, as Saliu që ishte President partiak, as ka pas, as ka për të pasur më, që dergjet skutave, për të bërë fushatë kundër qeverisë për zgjedhjet e ardhshme”, tha Rama.

Po ashtu, Rama nuk kurseu ironinë dhe batutat lidhur me dekorimet e presidentit për heronjtë e Luftës Nacional Çlirimtare.

 “ Është i vetmi president që jep dekorata për ata që kanë vdekur përpara se ky të lindte. Dekorata është simbol që të shquan ty nga të tjerët për të gjallë mes të gjallëve. Të dekorosh heronjtë e popullit kjo e tejkalon Boratin, e bën të vetmin origjinal më të vjetër se kopja.

 Imagjino këta heronjtë e popullit në varr se si mund të rrotullohen e përpëliten kur marrin vesh për dekoratën. Dekoratën e Vojo Kushit mori dikush që nuk e njihte as familja. Mes Margarita Tutulanit dhe Monikës ka një dallim shumë të madh, se do të detyrohet të dalë kundër Ilirit.  Kështu siç e ka nisur do i japi dekoratë dhe Skënderbeut me urdhrin e Nënë Terezës, nuk la njeri pa dekoruar, ka marrë varrezat me radhë”, tha Rama ndër të tjera.

Kryeministri e mbylli fjalimin  tij duke ironizuar opozitën e bashkuar.

Ai tha se “lokomotivën” e opozitës e lëviz presidenti Ilir Meta, ndaj të cilit gjatë fjalës së tij hodhi shumë akuza.

“Luli kryeministër, Monika shefe llogarie, Iliri me dekorata, Saliu kuptohet. Luli është bërë si “ushtari i mirë Rajan”, duhet ta shpëtojmë. Se imagjinoj dot një demokrat që niset si te piramidat. Ia jep Lulit këto listat e deputetëve, të votosh atë që s’do, këtë vetëm Luli e bën. Kjo vjen nga stresi nga Iliri e Monika se nuk i do, po s’ka si i heq. Edhe ne vështirë e kemi patur.

Është hall shumë i madh. Lokomotivën e lëviz Iliri, Monika fatorino, Luli me kapele që përshëndet njerëzit, do jetë fushatë shumë interesante. Më ka ardhur shumë keq kur më akuzonin se dua ta ndaj, që Lulin dua ta shpëtoj këtë nuk e mohoj”, deklaroi kryeministri, duke shkaktuar të qeshura mes të pranishmëve.

Pse ‘lumë’ akuzash ndaj Metës e LSI

Pse akuzat u fokusuan ndaj LSI dhe Ilir Metës, u pyet Rama pas përfundimit të asamblesë nga gazetarët.

Rama u përgjigj shkurt se e meritonte pasi sipas tij problemi i madh mes shqiptarëve dhe të ardhshmes quhet Ilir Meta dhe LSI.

“Është e natyrshme se problemi i madh mes shqiptarëve dhe të ardhshmes quhet Ilir Meta dhe LSI. Ky është problemi i madh që duhet dhënë zgjidhje në zgjedhjet e ardhshme dhe besoj shqiptarët do ta bëjnë këtë. I kushtova më shumë se një orë se e meritonte”, u shpreh Meta.

Ndërkohë, edhe presidenti dhe LSI nuk i përcollën në heshtje këto akuza të forta dhe iu përgjigjën kryeministrit “flakë për flakë”.

 

Ditari politik

Të fundit