Nga ‘Fundi i marrëzisë’ te ‘Marrëzia pa fund’, si ndërroi mendje Rama për rikthimin e basteve

Qeveria ‘Rama’ ka bërë hapa pas duke vendosur rikthimin e lojërave të fatit online, katër vite që pasi u cilësua si e paligjshme.

Duke shfrytëzuar një dëgjesë publike me federatat e sportit, kryeministri pranoi se ka dështuar në luftën ndaj basteve.

“Ky aktivitet nuk ka ardhur në rënie. E bën të domosdoshëm këtë reflektim që bëmë sot. Kanë figuruar aktivë dhe me përfitime krejt të paarsyeshme elementë me profil të lartë të krimit të organizuar”, tha Rama, i cili specifikon se nuk do të ketë rikthim të kazinove apo lojërave të tjera të fatit siç ishin përpara 2019.

Kryeministri e cilësoi ndërhyrjen si një zgjidhje që do të ndihmonte ekonominë, duke pranuar se bastet online qarkullonin 5 milionë euro në vit. 

Por si ka ndryshuar mendje Rama gjatë viteve të fundit, kur ai propagandonte se do të mbyllte njëherë e mirë të gjithë lojërat e fatit, si fizikisht ashtu dhe online:

Në 8 tetor 2018:

“Duke nisur nga data 31 dhjetor të këtij viti do të pushojnë së funksionari të gjitha kazinotë elektronike. Ndryshimi i sotëm përfshin edhe bastet sportive, si dhe çdo lloj basti për çdo garë të ashtuquajtur në pistë, me kuaj, me qen, apo me çdo lloj skllavi të faunës shqiptare.”

Në 14 tetor 2018:

“Paratë e zeza të basteve po derdhen kazaneve për të jashtëqitur llafin se kjo u bëka që të mbetet një monopol online! Mos u lodhni kot, bastet s’i shpetoni dot më! Edhe bastet, edhe ky monopoli online do vdesin për Vit të Ri.”

Në 18 tetor 2018:

“Jam i sigurtë se ky grup parlamentar do tu japë […] një dhuratë të shumëpritur me rastin e Vitit të Ri, mbylljen e kazinove elektronike e basteve sportive që nga ndeshjet e futbollit deri tek garat e çdo lloj katërkëmbëshi të faunës botërore dhe të basteve online. Në 1 janar nuk ka më asnjë lloj basti, kazino elektronike në asnjë zonë të banuar.”

Në 19 tetor 2019:

 “Në datë 31 dhjetor, nënat, gratë dhe vajzat do të marrin mbrapsht djalin apo burrin e sëmurë nga bixhozi. Më 1 Janar do të jenë mbyllur të gjitha bastet në rrugë, apo online dhe thënë kjo, online sot lozet me kartë krediti dhe çdo transaksion është i regjistruar, taksohet dhe nuk mund të luash në të zezë. Më 31 Dhjetor nuk ka më. Do t’i mbyllim të tëra.”

Në 22 tetor 2018:

“Aktiviteti i bixhozit në Shqipëri financohet në një masë të madhe nga krimi i organizuar.

Janë burime financimi kriminale, janë para që pastrohen përmes aktivitetit të kumarit dhe janë eksponentë të krimit të organizuar që fshihen ose janë drejtë të përfshirë në këto aktivitete.”

Në 2 janar 2019

“Vit i Ri me këmbë të mbarë, pa kumar e pa kapsolla.”

‘Fundi i marrëzisë’

Industria e lojërave të fatit ishte një kalë beteje i fushatës elektorale të vitit 2013 që solli në pushtet kryeministrin Edi Rama. Operacioni i parë i qeverisë së tij, “Fundi i Marrëzisë” targetoi tregun e paligjshëm të lojërave të fatit dhe në vitin 2015, qeveria miratoi një ligj që u prezantua si radikal për frenimin e kësaj industrie.

Megjithatë, lojërat e fatit lulëzuan edhe më shumë pas miratimit të ligjit të ri.

PD: Po i jepet licensa Olsi Ramës

Partia Demokratike ka reaguar, pasi u paralajmërua rihapja e basteve sportive, të cilat Edi Rama i mbylli me shumë zhurmë disa vite më parë, ndërsa sot pranoi se “lulëzuan” në të zezë.

Sekretari për Çështjet Ligjore në PD, Ivi Kaso hedh akuza se rinisja e këtij aktiviteti po bëhet për t’i dhënë kontrollin e basteve OIsi RTamës, vëllait të kryeministrit. PD paralajmëroi familjen Rama dhe “kumarxhinjtë”, se ora e llogarisë po afron.

Braçe: Nga “Fundi i marrezise” tek “Marrezia pa fund”

Ish-zv.kryeministri Erion Braçe ka reaguar ashpër pas mbledhjes së Edi Ramës me drejtues të Federatave sportive. SIpas tij, marrëzia nuk ka fund pasi persona që kanë marrë peng sportin po përdorin atë për bastet e tyre.

“NGA “FUNDI I MARREZISE” TEK “MARREZIA PA FUND”; te njejtet njerëz – te njejtet usheheqes, te njejtet vendimmarres; Por edhe te njejtet palaco qe kane marre peng sportin, flasin ne emer te sportit dhe perdorin sportin per BASTET E TYRE!”, shkruan Braçe.