Nga ‘mprihni sfurqet’ te sulmet ndaj Yuri Kim, për çfarë ‘do të japë llogari’ Ilir Meta në Komisionin Hetimor  

Parlamenti miratoi këtë të premte me 97 vota ngritjen e Komisionit Hetimor për shkarkimin e presidentit Ilir Meta.

Afati i punës së Komisionit Hetimor pritet që të jetë një muaj, përgjatë të cilit do të shqyrtohen të gjitha argumentet e ngritura nga Partia Socialiste për shkarkimin e Presidentit, ndërsa vendimi i shkarkimit të Presidentit duhet të mbështetet nga të paktën 2/3 e anëtarëve të Kuvendit.

Më 3 maj, 49 deputetë socialistë dorëzuan në Kuvend kërkesën për të nisur procedurat për shkarkimin e Presidentit Ilir Meta. Ata e akuzojnë atë për shkelje të rëndë të Kushtetutës, mbështetje të opozitës dhe se ka shpërndarë mesazhe që nxisin dhunë.

Në kërkesën e 49 socialistëve janë kanë renditur si prova të veprimtarisë së Metës, duke i cilësuar si shkelje kushtetuese, të gjitha deklaratat e presidentit të lëshuara përpara zgjedhjeve parlamentare të 25 prillit.

Sipas tyre, Meta në të gjitha daljet e tij publike sidomos gjatë fushatës zgjedhore ka kryer aktivitet partiak në mbrojtje të opozitës, ka intimiduar votuesit duke u kujtuar se ai vetë apo populli do t’u presin duart.

Sipas kërkesës, këto deklarata të Kreut të Shtetit çuan deri në një humbje jete, duke iu referuar kështu vrasjes së Pjerin Xhuvanit në Elbasan, në 21 prill.

“Me sjelljen e tij, mesazhet drejtuar publikut me qëllim përkrahjen e nxitjen e vetëgjyqësisë, të cilat në Elbasan çuan edhe në humbje jete, terrorit, aktet e dhunës në rrugët e vendit në prag të zgjedhjeve për Kuvendin e Shqipërisë, mesazhet dhe sjelljet e intimidimit të votuesve, gjyqtarëve dhe prokurorëve, forcave të policisë, përfaqësuesve të lartë të misioneve diplomatike, çuan në cënimin e imazhit të Shqipërisë në botë dhe cënimin e marrëdhënieve të fqinjësisë së mirë në rajon dhe më gjerë”, thuhet në kërkesën e PS.

“Me aktet e tij Presidenti Ilir Meta mbajti qartësisht anën e opozitës parlamentare pasi rezultoi nga daljet e tij publike. Presidenti mori përsipër të japë leksione demokracie që nuk ekzistojnë në asnjë vend demokratik”, thuhet po ashtu në kërkesë.

Sulmet ndaj ambasadores së SHBA, Yuri Kim

Në kërkesën që 50 deputetë të Partisë Socialiste i kanë dërguar Kuvendit të Shqipërisë për shkarkimin e Presidentit Ilir Meta, janë edhe deklaratat e Kreut të Shtetit ndaj ambasadores së SHBA në Tiranë, Yuri Kim, në prag të zgjedhjeve të 25 prillit.

Kjo e fundit i kërkoi Presidentit të mos përmendë më “sfurqet”, ndërsa Meta iu përgjigj live në një studio televizive, duke i kërkuar që të mos merrte në mbrojtje kryeministrin Edi Rama.

Ashtu si edhe deklarata të tjera të bëra gjatë fushatës elektorale, për 50 deputetët firmëtarë të nismës për shkarkimin e Metës, edhe kjo deklaratë kundër ambasadores Yuri Kim është në shkelje të Kushtetutës së Republikës.

“ Tani live sapo më shkruajti ambasadorja Yuri Kim për të mos përmendur më cfurqet. I them ambasadores amerikane live që të mos marrë më në mbrojtje Edi Ramën. Meqë më dërgoi live sms i them ambasadores amerikane mos e mbështet Edi Ramën. Meqë jam transparent po ju them edhe një fakt që ambasadorja amerikane më ka kërkuar mua si President, një ditë para mbledhjes së KED-së të pranoj unë Ardian Dvorani.

Këtë ajo e kërkoi jo në emër të Amerikës, po në emër të Edi Ramës. E përqafoj ambasadoren amerikane dhe i them boll ndërhyre në punët e brendshme të Shqipërisë në këtë mënyrë të njëanshme. Deklarata e Yuri Kim është një turp dhe e ftoj ambasadoren të vijë tani live në studio bashkë me Edi Ramën të ballafaqohemi para shqiptarëve.

Më 25 prill votojnë dëshmorët. Nuk impresionohet Presidenti nga të gjithë lobistët që flasin anglisht dhe mendojnë serbisht për Shqipërinë. Shqipëria do të jetë e shqiptarëve”, pati deklaruar Meta.

Disa nga deklaratat e bujshme të Metës

“Kërcënimi i fundit që vjen përmes Tao Taos, nga bandat e Elbasanit dhe të gjithë Shqipërisë, ka vetëm një përgjigje: Presidenti gati për të firmosur dekretin për mbrojtjen e Republikës! Shqipëria e shqiptarëve! Vdekje tradhtarëve!”

“Të dashur prokurorë dhe gjyqtarë! Dëgjojeni mirë Presidentin e Republikës! Boll dëgjuat përfaqësuesin e Ndrangheta-s, Don Agaçion. Nëse jo, një pikë gjaku të derdhet nesër, por edhe një pikë loti, mjerë ju! Nesër duhet të jetë Festa e Demokracisë!”

“Cfurqet do jenë të dielën, nëse preket vota. Zgjedhje si të Shijakut dhe të Dibrës, nuk do të ketë më. Kjo histori ka marrë fund…”.

“Lidheni të marrin shokë socialistë përpara se të ketë fatin e furgonit në Berat… Unë do shkoj në shtëpi, kur ti të shkosh në psikiatri”.

“Bravo qytetarëve të Beratit! Gjejini! Izolojini! Mos i toleroni! Nuk ka patronazhist, fuks dhe bandit, që mund të ndalë ndryshimin e madh më 25 prill! ‘Ngrehuni dhe bjeruni, korini dhe shtypini, katundar e punëtorë, që nga Shkodra gjer në Vlorë’! Me qetësi dhe vendosmëri drejt 25 prillit!

“Janë të shqetësuar nga mesazhet e Presidentit! Le të shqetësohen dhe le të tmerrohen të gjithë ata, të cilët mendojnë se do bëjnë “tërmet” në zgjedhje, si në Dibër, apo si në Shijak, qofshin këta qeveritarë, punonjës policie; qofshin banditë, gjithçka qofshin”.

Nisma e dytë e socialistëve 

Kjo është hera e dytë që socialistët e ndërrmarrin këtë nisëm. Nga ana tjetër, Meta është shprehur se nuk do të largohet pa i mbaruar mandati, më korrik të 2022. Presidenti është shprehur i gatshëm të marrë pjesë në seancat dëgjimore të komisionit. Sipas tij, deputetët nismëtarë po iu binden urdhrave politikë.