Nga shoferi i Klement Balilit te vrasja e Klodian Rashës, ‘mëkatet’ e Ardi Veliut në krye të Policisë së Shtetit  

Në 5 shkurt 2018, Ardi Veliu, asokohe Drejtori i Policisë së Tiranës, u emërua drejtori i Policisë së Shtetit me firmën e Kryeministri Rama, i propozuar nga ministri i Brendshëm në atë kohë Fatmir Xhafaj. Veliu zëvendësoi në këtë detyrë Haki Çakon, i cili u lirua më 8 janar 2018.

Veliu ka mbajtur edhe poste të tjera në polici, si atë të Shefit të komisariatit të Policisë në Durrës, Zëvendësdrejtor për Sigurinë në Tiranë, Drejtor i Policisë Rrugore ne Drejtorinë e Policisë se Shtetit dhe Drejtor i Drejtorisë Vendore të Policisë Tiranë.

Megjithatë, gjatë 4-vjeçarit në krye të Policisë së Shtetit, kanë ndodhur një sërë ngjarjesh të rënda, ndërsa Veliu nuk mori guximin të japë dorëheqjen, por e komunikoi sot (5 tetor 2021) sipas tij për arsye personale me qëllim që t’i përkushtohet familjes.

Më poshtë, rendisim disa nga ngjarjet më të bujshme kriminale gjatë drejtimit të Policisë së Shtetit nga Ardi Veliu:

*Një vit më parë, Veliu u shënjestrua pasi mori në mbrojtje policët që dhunuan një 15-vjeçar, me argumentin se ai vinte nga një familje e degjeneruar.

Jo vetëm kaq, por video në fakt që publikoi Veliu ishte pjesë e një filmi ku nëna e djalit interpretonte si aktore. 

Ndonëse opinioni publik dhe opozita kërkoi dorëheqjen e tij, ai vetë në një deklaratë kërkoi ndjesë, duke thënë se fjalët e tij u deformuan.

*Në janar të 2019-ës, Klement Balili i cilësuar ndryshe dhe si Eskobari i Ballkanit, nën hetim për trafik ndërkombëtar droge dhe për grup të strukturuar kriminal u vetëdorëzua në Polici, ndërsa personi që e shoqëroi nga Delvina me një makinë luksoze ishte kreu i Policisë Ardi Veliu.

Ky akt i Veliut e kryeqëzoi atë duke e denigruar figurën e policisë së shtetit.

*Vrasja e Klodian Rashës nga efektivi i policisë, Nevaldo Hajdaraj, ishte një tjetër moment ku Veliu nuk dha sërish dorëheqjen, ndonëse kjo ngjarje ngjalli zemërim dhe Tirana e qytete të tjera gëluan nga protesta të dhunshme për disa ditë me radhë.

Kjo ngjarje pasoi me dorëheqjen e Sandër Lleshajt, në atë kohë ministër i Brendshëm.

*Po ashtu, pak ditë më parë në Lezhë, mbeti i vrarë një efektiv policie, Saimir Hoxha gjatë një operacioni anti-kanabis.

Ndërsa një ditë më parë një avion sportiv u rrëzua në Vermosh dhe ende nuk janë zbardhur shkaqet apo personat që ndodheshin në të, si dhe në mbrëmje Elbasani u trondit nga një tjetër ngjarje kriminale ku mbetën të vrarë në një atentat me armë zjarri dy persona me precedentë të mëparshëm penale, Lulzim Bitri dhe Ardian Çollaku.

Kujtojmë që javën e parë të korrikut, kryeministri Edi Rama i vendosi 100 ditë afat drejtuesve të Policisë së Shtetit që të gjejnë dhe të çojnë para drejtësisë të gjithë të infiltruarit brenda uniformave blu, që bashkëpunojnë me krimin.

Ai kërkoi që uniformat blu të jenë në tjetër nivel. Rama tha më tej se çdo qark duhet të japë patjetër rezultat, për të dhënë shembujt e qartë se nuk ekziston pandëshkueshmëria në Policinë e Shtetit.