E SHPJEGUAR

Qeveria sot i hapi rrugën, pse u anulua 3 vjet më parë koncesioni Thumanë – Kashar

Qeveria sot i hapi rrugën, pse u anulua 3 vjet më parë koncesioni

Qeveria i ka hapur edhe një herë rrugën koncesionit të ndërtimit të rrugës Thumanë- Kashar. Ministrja e Infrastrukturës Belinda Balluku tha se kontrata ka elementë të rinj, i gjithë investimi do të jetë nga privati i cili do ta shfrytëzojë atë për 35 vjet.

Ka pasur debat publik për këtë çështje. Që në vitin 2019 në janar, kjo kontratë u anulua për shkak se ajo hapësirë fiskale u vendos në dispozicion të paktit të universitetit. I jemi kthyer kësaj kontrate edhe pas një vendimi gjyqësor, duke qenë se shkojmë në parametra të ri.

Shteti nuk investon mbi këtë kontratë, Aksi do të investohet në parimin e koncesionit që do të investojë dhe operojë e transferojë pas 35 vitesh në pronësi të shtetit shqiptar. Procesi është bërë përmes një negocimi,  dhe nuk duhet harruar se është ndër më të rëndësishmet të korridorit blu, dhe synojmë të hapim lotet brenda vitit 2022 që t’i kemi të përfunduar në 36 muajt e ardhshëm”, deklaroi ministrja e Infrastrukturës dhe Energjisë Belinda Balluku.

Si u anulua koncesioni Thumanë-Kashar

Segmenti i katërt i autostradës Adriatiko-Joniane, Thumanë-Kashar 21 kilometra ka një histori të ndërlikuar për shkak të përfshirjes së tij në paketën e koncesionit PPP.

Ministrja e Infrastrukturës dhe Energjisë Belinda Balluku bëri të ditur asokohe publikisht vendimin për anulimin e koncesionit më të madh dhe më të debatuar të qeverisë, atë që parashikonte ndërtimin e afro 21 kilometrave autostradë për një kosto që mund të shkonte deri në 54 miliardë lekë.

“Kam vendosur të bëj ndërprerjen e partneritetit publik-privat të aksit Kashar -Thumanë,” deklaroi Balluku për mediat të hënën më 21 janar, pa dhënë shpjegime për shkaqet që sollën anulimin.

Kontrata koncesionare u ndërpre dhe fondet e parashikuara që të shkonin për këtë projekt, qeveria i kaloi për universitetet pas protestës së studentëve.

“Gener 2” u shpall në korrik 2017 fituese e garës për këtë aks. Sipas një investigimi të “Zërit të Amerikës”, kompania në fjalë ka lidhje me kompaninë  “DH Albania”, e cila përmes falsifikimit të dokumenteve të regjistrimit dhe favorizimit nga institucionet ka arritur të sigurojë dy kontrata me vlerë prej rreth 30 milionë eurosh nga qeveria shqiptare.

Me një gjatësi prej 21 kilometrash, rruga Thumanë- Kashar u tenderua me fond limit prej 245.7 milionë eurosh dhe konsiderohej si një ndër koncesionet më të shtrenjta të infrastrukturës. Megjithatë, në një raport të Ministrisë së Financave për Parlamentin parashikohej se kostot koncesionare mund të shkonin deri në 54.4 miliardë lekësh (435 milionë eurosh).

Pas përfundimit të tenderit, qeveria dhe Gener 2 hynë në një fazë negociatash, të cilat duhej të çonin në kontratën finale. Por një skandal shpërtheu dhe negociatat nuk u përmbyllën.

Në dhjetor 2018, qeveria u vu në siklet kur u zbulua se një kompani fantazmë me emrin DH Albania rezultoi fituese e dy tenderëve me vlerë 30 milionë euro në Shqipëri, pasi kishte përdorur më parë dokumente të falsifikuara

Dokumente të zbuluara më parë nga BIRN sugjerojnë se ka disa lidhje mes personave të kompanisë DH Albania dhe kompanisë Gener 2, e cila ishte fituesja e tenderit të koncesionit Thumanë – Kashar.

Urdhri për ndërprerjen e koncesionit të rrugës Thumanë-Kashar ishte një ndër vendimet e para të ministres Belinda Balluku, pas marrjes së detyrës nga paraardhësi i saj Damian Gjiknuri.

Balluku deklaroi asokohe se fondi i koncesionit do të shkonte në dobi të së ashtuquajturit ‘pakti për universitetin”.

Lidhur me këtë skandal dha dorëheqjen drejtori i Operatorit të Sistemit të Transmetimit, Klodian Gradeci. Vendimi erdhi pak javë pasi u zbulua përfshirja e OST-së në skandalin e Unazës së Re, për shkak të marrjes së një tenderi nga e njëjta kompani (DH Albania).  

Apeli rikthen koncesionin Thumanë-Kashar: Qeveria të miratojë kontratën

Gjykata Administrative e Apelit në Tiranë vendosi që të rikthejë koncesionin për ndërtimin e rrugës Thumanë-Kashar.

Vendimi u mor gjatë korrikut 2021 nga trupa e gjyqtarëve, e përbërë nga Rilinda Selimi, Altina Nasufi dhe Blerona Hasa. Vendimi ishte i formës së prerë duke i kërkuar Këshillit të Ministrave që të miratojë kontratën me kompaninë.

Të fundit