Rama s’pyet për Kodin Zgjedhor, Celibashi i prerë: Ligji është ligj, s’di t’i jap përkufizim tjetër

Kryekomisioneri Ilirjan Celibashi ka reaguar pas përkufizimit që kryeministri i vendit, Edi Rama i bëri Kodit Zgjedhor, duke e quajtur ‘kinezëri’.

Celibashi në një komunikim me gazetarët këtë të enjte u shpreh i prerë teksa u pyet për një koment për deklaratat e Ramës ku justifikohej për rritjen e pagave për disa kategori në prag fushate. Celibashi tha se çfarë është e përcaktuar në ligj, duhet të respektohet.

“As deklaratat e kryeministrit dhe vlerësimet e tij mbi kodin zgjedhor apo të të tjerëve s’kam arsye për t’i komentuar. Nëse një gjë është e parashikuar në ligj, do të duhet të respektohet dhe zbatohet ligji. Nëse është ligj, është ligj! S’di të jap përkufizim tjetër. Secili prej nesh ka opinione të ndryshme për ligjet, ndaj dhe legjislacioni ndryshon. Një rregullim që është pjesë e ligjit, duhet zbatuar!”, tha Celibashi.

Celibashi u pyet po ashtu nëse qeveria lejohet që të rrisë pagat apo pensionet pak kohë para zgjedhjeve.

“ Këtë përgjigje e dhashë tre herë po e jap dhe një herë. Ka një përcaktim të qartë të Kodit Zgjedhor, ndalimi ekziston për akte të qeverisë për rastin e zgjedhjeve të përgjithshme të Kuvendit të Shqipërisë. Por kjo nuk do të thotë se në vlerësim të disa rrethanave akte të caktuara të qeverisë mos të marrin gjykimin e vlerësimit mbi përputhshmëri të Kodit zgjedhor”, ka thënë Celibashi.

Por a do i dalë kundë Ramës? Kjo mbetet për t'u parë.

Mirëpo, çfarë bëri kryeministri Rama?

Kryeministri Rama ka shkelur Kodin Zgjedhor pasi 50 ditë para zgjedhjeve qeveria vendos tu japë 5 mijë lekë shpërblim pensionistëve.

“"Sot nuk kemi vetëm zotimin e përgjithshëm, por dhe informimin konkret se për pensionistët do ketë dhe 5 mijë lekë të reja që do shkojnë bashkë me pensionet që do marrin herën e ardhshme.”, u shpreh Rama ditën e djeshme.

Mirëpo Kodi Zgjedhor përcakton në nenin 91 të tij se në një periudhë 4 muaj para zgjedhjeve ndalohen vendime me efekte financiare si rritje pagash e pensionesh, ndryshime në politikat fiskale, si dhe investime të paparashikuara në buxhetin e shtetit.

“Katër muaj para datës së zgjedhjeve deri në formimin e qeverisë së re pas zgjedhjeve ndalohet propozimi, miratimi ose nxjerrja e akteve ligjore ose nënligjore, të cilat parashikojnë dhënien e benefiteve për kategori të caktuara të popullsisë, të tilla si aktet që parashikojnë rritjen e pagave, pensioneve, mbështetjes ekonomike apo sociale, uljen ose heqjen e taksave, vendosjen e amnistive fiskale, privatizimin apo dhënien e pasurive a të shpërblimeve etj, përveçse kur nisma kushtëzohet nga gjendje të fatkeqësisë natyrore”, thuhet në pikën 4 të nenit 91 të Kodit Zgjedhor

Kryeministri ka premtuar edhe rritjen e pagave në administratë. Ai lajmëroi se qeveria ka në plan rritjen e rrogave, me qëllim që përgjatë dy viteve paga mesatare të arrijë në 900 euro.

 

Rama nuk u ndal as pas dokumentit

Edhe pse deklarata e tij ishte në kundërshti me Kodin Zgjedhor, Rama ka zgjedhur mos “të çajë” kokë për ligjin.

“Analfabetizmi politik është ku e ku më i keq se sa analfabetizmi real apo ai funksional! Neni që ndalon rritjen e pagave 4 muaj para zgjedhjeve lidhet me zgjedhjet politike, ku flitet për periudhën para krijimit të qeverisë së re. Leximin me zë ua bëjnë pensionistët në 14 maj”, deklaroi Rama pas lajmeve se ka shkelur ligjin elektoral.

Por kur ligji nuk respektohet nga vet kryeministri, ç’duhet të bëjnë qytetarët?

Kryeministri Rama vijon fushatën zgjedhore në shkelje të ligjit

Pasi njoftoi rritje pagash në nivelin e 900 eurove dhe 5 mijë lekë shtesë për pensionistët në muajin Prill, shkelja e Ramës këtë herë erdhi brenda institucionit që ai drejton.

Kreu i qeverisë mblodhi sot në një takim punonjësit e Kryeministrisë për të njoftuar rritjen e rrogave.

 “Desha t’ju përshëndes dhe t’ua them vet se u bë kaq vite që punojmë sëbashku dhe punoni me përkushtim dhe pa orar. Besoj se keni merituar prej shumë kohësh në fakt, por mundësia për ta bërë të mundur është krijuar vetëm tani. E dini se sa shumë vështirësi na është dashur të kapërcejmë për të krijuar këtë bazë, për t’ju thënë tani se është koha për të bërë një rritje rrogash shumë domethënëse. Kam marrë këtu disa raste konkrete, duke përfituar dhe t’i shpreh mirënjohje disa prej jush që janë legjenda të këtij institucioni. Për pagën minimale, korrektimet do nisin nga lart poshtë. Ky ishte breaking neës i madh, tani me vrap te puna. Dhe kur thash me vrap, me vrap”, tha Rama.