Rektori i Universitetit Bujqësor ka zgjedhur apo e kanë urdhëruar të ankohet në Grupin e Deputetëve Socialistë?!

Prokuroria e Posaçme ka lëshuar sot 24 masa sigurie për stafin e Universit Bujqësor të Tiranës, të akuzuar për abuzime me tendera. 

Lidhur me këtë fakt reagoi në orët e para të së martës edhe kryeministri Edi Rama përmes një postimi në "X", ku njoftonte se nesër në orën 09:00, grupi i parlamentar i PS do të zhvillojë një seancë dëgjimore me rektorin e UBT-së, Fatbardh Sallakun. 

Vlen për t'u theksuar se postimi i kryeministrit u publikua ende pa dalë njoftimi zyrtar i SPAK. 

Ndërsa nuk shprehu as një fjalë në mbështetje të hetimit kundër korrupsionit për këtë universitet, Rama tregoi hapur retorikën e një arbitri e duke sulmuar punën e drejtësisë dhe citoi rektorin Fatbardh Sallaku, duke thënë se bëhej fjalë për një “keqkuptim shumë të madh”.

“Nesër në 09:00 Grupi Parlamentar i shumicës qeverisëse do të dëgjojë, me kërkesën e tij, Rektorin e Universitetit Bujqësor, Fatbardh Sallaku, lidhur me 24 masa sigurie PA GJYQ për stafin dhe pedagogët e universitetit për disa procedura të disa viteve më parë në shumën totale më pak se 30 milionë lekë,” shkroi Rama në rrjetin social X.

“Vetë rektori, i cili nuk rezulton i lidhur me këtë hetim, flet për një keqkuptim shumë të madh dhe kërkon të dëgjohet publikisht, në një moment historik kthese për Universitetin Bujqësor që ka hyrë në rrugën e transformimit me synim njehsimin e plotë të diplomave me Universitetin BOKU të Vjenës në Shqipërinë 2030,” shtoi ai.

Natyrshëm, në kushte të tilla lind pyetja se ç'lidhje ka rektori i një universiteti të ankohet në grupin parlamentar të një partie politike, qoftë kjo edhe partia në pushtet?! Po Rektori i Universitetit Bujqësor përse ka zgjedhur apo e kanë urdhëruar! të ankohet në Grupin e Deputetëve Socialistë?!

Deri tani, ai nuk ka komentuar në media lidhur me këtë vendim, pavarësisht insistimit nga media. Nga ana tjetër, kryeministri Rama mohoi ‘gjyqin politik’ i konsideruar si rast i paprecendet nga analistët, që vë në pikëpyetje urdhrat e gjykatës. 

Në vend që të dalë në krah të hetimeve kundër atyre që kanë futur duart në xhepat e qytetarëve, Rama duket se tashmë po e kthen Partinë Socialiste në një zyrë avokatie për shënjestrat e SPAK. 

Kështu, pas Klotilda Bushkës, deputete e PS dhe kryetare e Komisionit të Ligjeve, e cila përfitoi nga strategjia e re e Ramës ndaj  hetuesve të drejtësisë, i rradhës rezulton rektori Fatbardh Sallaku.