Shqipëria vendosi! Ç’ndodhi gjatë 12 orëve të votimit, probleme me identifikimin biometrik, nuk munguan incidentet

Shqiptarët i janë drejtuar kutive të votimit që prej orës 07.00 të mëngjesit të së dielës për të vendosur për fatin e qeverisë së katër viteve të ardhshme.

Kanë qenë 3,588,869 shtetas shqiptarë me të drejtë vote ata të cilët u janë drejtuar qendrave të votimit në mbarë vendin deri në orën 19.00.

Ndryshe nga zgjedhjet e shkuara, këto zgjedhje kanë qenë të pazakonta për shkak të kufizimeve nga pandemia e Covid-19, me të cilën Shqipëria, ashtu si edhe e gjithë bota po përballet prej më shumë se një viti. Në këto kushte, Komiteti Teknik i Ekspertëve hartoi një protokoll të posaçëm, duke kërkuar nga të gjithë respektimin e distancën dhe mbajtjen e maskës.

Me disa incidente, procesi është mbyllur me një situatë të qetë.

Sipas raportimeve zyrtare nga KQZ problematika ka patur me pajisjet e leximit të kartave të identitetit. Në disa qendra votimi në disa qarqe të vendit procesi është bllokuar, për shkak të pajisjeve të identifikimit biometrik dhe më pas ka vijuar manualisht. Ndërkohë që nga 5199 qendra votimi u ndërpre vetëm në atë të Lekbibajt në Tropojë por më pas rifilloi. 

Po ashtu, KQZ ka njoftuar se në disa zona të thella nuk ka pasur operatorë për pajisjen e identifikimit elektronik, kjo edhe për shkak të infrastrukturës së vështirë. Sipas saj përdorimi i pajisjes së identifikimit deri më tani nuk ka funksionuar në rreth 140 qendra votimi.

Kujtojmë se risia në këto zgjedhje ishte fakti se votuesit janë identifikuar nga një pajisje elektronike, dhe jo nga komisionerët, për të shmangur votimet e shumëfishta.

Po ashtu, për herë të parë në këto zgjedhje, veç partisë, qytetarët votuan edhe kandidatin brenda së një njëjtës parti, duke i dhënë mundësi atyre që janë dukshëm më të votuar, të fitojnë, edhe nëse kryetari i partisë e ka renditur poshtë në listë.  

Incidentet

Përgjatë 12 orëve të votimit, incidenti më i rëndë i shënuar ka qenë ai në fshatin Vashtimi të Korçës, ku një burrë dhe një grua janë goditur me karrige.

Mësohet se ka qenë Gledis Adri (vëzhgues) në qendrën e votimit ai i cili ka goditur çiftin me karrige. Ata kanë marrë dëmtime në kokë,  ndërsa personi që ka goditur çiftin ishte simpatizant i PD-së.

Një incident ka ndodhur në Berat, ku një qytetare akuzon komisionerët se i kanë nxjerrë të pavlefshme fletën e votimit.

Policia ka vënë në pranga Gjovalin Gjeloshaj, komisioner i PD-së në Lekbibaj, pasi së bashku me vëllezërit e tij Shkelzen dhe Marash Gjeloshaj, kanë dhunuar dhë kërcënuar me armë kryetarin e PS-së Andrea Ndou.

Edhe drejtuesi politik i PD në Berat, Tomor Alizoti denoncoi se një vëshgues është rrahur nga mbështetës të PS në këtë zonë.

Nuk kanë munguar edhe rastet e fotografimit të votës, ndërsa personat e identifikuar janë shoqëruar në komisariat.

Ndërkombëtarët në terren

Që në orët e para të mëngjesit, nuk ka munguar edhe prezenca e ndërkombëtarëve. Ambasadorët e akredituar në Tiranë, kryesisht ajo e SHBA, Yuri Kim, ai i delegacionit të BE, Soreca, ambasadori britanik Duncan Norman, apo kryesuesja e misionit të vëzhgimit të zgjedhjeve, Ursula Gacek, ishin të pranishme nëpër qendrat e votimit në Tiranë dhe në qytete të ndryshme të vendit si në Shkodër, Elbasan etj.

Ata kanë njoftuar se do të jenë në terren për të monitoruar edhe procesin e numërimit, ndërsa nuk kanë munguar thirrjet e vazhdueshme për të dalë masivisht në votime dhe të votojnë të lirë.

Partia Socialiste kërkon një mandat të tretë, ndërsa opozita, e përbërë nga Partia Demokratike dhe aleatët e saj, Lëvizja Socialiste për Integrim dhe disa parti të tjera të vogla, kërkojnë të marrin drejtimin e vendit për 4 vitet e ardhshme.

Për herë të parë hynë në garë në zgjedhje të përgjithshme, edhe forca të reja politike si Nisma Thurje, Lëvizja për Ndryshim e Jozefina Topallit dhe Bindja Demokratike e Astrit Patozit, Lëvizja Demokratike Shqiptare e Myslim Murrizit apo edhe 3 kandidatët e pavarur që mbështeten nga Lëvizja Vetëvendosje.

Po ashtu, për herë të parë futen në garë në një palë zgjedhje të përgjithshme, disa forca të reja politike si Nisma Thurje, Lëvizja për Ndryshim e Jozefina Topallit dhe Bindja Demokratike e Astrit Patozit, Lëvizja Demokratike Shqiptare e Myslim Murrizit apo edhe 3 kandidatët e pavarur që mbështeten nga Lëvizja Vetëvendosje.