“Është kundër Soros, njohëse e situatës në Shqipëri”, si ndikon për shqiptarët fitorja e Giorgia Melonit në Itali

Fitorja e Giorgia Melonit në zgjedhjet parlamentare në Itali, shënon një kthesë domethënëse në politikën e vendit fqinj. Jo vetëm që 45-vjeçarja do të mbetet në histori si kryeministrja e parë grua në Itali, por është edhe përfaqësuese e së djathtës konservatore, që për herë të parë fiton zgjedhjet.

Por si do të ndikojë fitorja e forcave të djathta në Shqipëri dhe jetën e komunitetit shqiptar në Itali?

Sipas Besian Zogajt, studiues i marrëdhënieve ndërkombëtare, gjasat janë që shumë pak të ndryshojë.

“Shoh shumë fytyra të mërzitura, por nuk ka arsye. Qeveritë e djathta italiane kanë bashkëpunuar me fakte me Shqipërinë, nga partneriteti te marrëveshjet tregtare, ndërkohë që ne kemi 12 vjet që nuk kemi thelluar partneritetin me atë vend”, ka deklaruar ai për A2 CNN.

Agjenda e njohjes së pensioneve është çështje thelbësore për shqiptarët që tashmë prej dekadash punojnë aty.

“Nuk besoj se do preken, është në interesin e përbashkët, kemi edhe ne një komunitet italian në Shqipëri. E vërtetë është se kjo marrëveshje është iniciuar nga një parti e majtë si Partia Demokratike, por në fund nuk besoj se do të kemi lajme të këqija”.

Ish deputeti i PD Gerti Bogdani në një intervistë për Ora Neës tha se Meloni është një njohëse e situatës në Shqipëri si dhe politikani që do të ketë Ministrinë e Jashtme është një mik i PD dhe i dhe një mik i Shqipërisë.

“ Italianët shohin alternativën dhe në këtë rast Meloni u bë alternativa më e mirë. Unë do të thoja se ka dhe një lajm tjetër pozitiv për Shqipërinë sepse Meloni është një njohëse e situatës në Shqipëri, qëndron për disa vlera të forta që është çështja e familjes dhe besimit. Ka disa gjëra që dëmton shqiptarët që është çështja ndaj emigrantëve dhe kufizimet që duhet të bëjë.

Por ka një lajm të mirë sepse besoj “Forca Italia” e Berluskonit do të ketë Ministrin e Jashtëm dhe në këtë rast flitet që të jetë Antonio Tajani që është një mik i Partisë Demokratike dhe një mik i Shqipërisë. Ka ardhur në vitin 2009 për një aktivitet të Forumit Rinor ndërkohë që ishte pjesë e Parlamentit Europian”, tha Bogdani.

Ndërsa analisti Fatos Lubonja duke folur në një nga piuntatat e emisionit “Pikat mbi i” në Neës 24, ka theksoi se “Pse Berisha është kaq i gëzuar? Sepse ka qenë kundër Soros, e akuzon si neoliberal që është kundër tezës “Amerika e para”. E ka akuzuar Sorosin si një njeri që po bën njëlloj zëvendësimi etnik në Itali. Pyetja është po Shqipëria me kaq shumë emigrantë sa konservatore mund të jetë? Mund ta formulojnë, por se kanë formuluar akoma. Berisha ka edhe një kontradiktë tjetër, PD është te Partitë Popullore ku është Berluskoni.

A mund të ngrejë PD-ja tezën e një sovranizmi shqiptar? Ne jemi akoma për projektin europian, nuk jemi “kombi ynë i pari””.