Flash News

E SHPJEGUAR

Si mund ta zgjedhë Partia Socialiste e vetme presidentin pas raundit të tretë

Si mund ta zgjedhë Partia Socialiste e vetme presidentin pas raundit

Në mbledhjen e Grupit Parlamentar të Partisë Demokratike të thirrur nga Enkelejd Alibeaj ku morën pjesë 26 deputetë në total, u propozuan 8 emra për Presidentin e ri.

Lista e emrave që do të kalojnë në analizë të thelluar:

Leonard Demi

Arben Çejku

Dritan Demiraj

Visar Zhiti

Rexhep Uka

Halim Kosova

Dashamir Shehu

Leka Zogu

4 hapat për të shkuar te një kandidat 

Në mbledhjen e grupit parlamentar të PD-së, Alibeaj ka propozuar katër faza për përzgjedhjen e kandidatit, referuar draftit të bërë publik.

Grupi i PD-së do të përzgjedhje 4 kandidatë, 2 nga grupi i PD dhe 2 nga Fatmir Mediu dhe Mesila Doda . Ndërkohë, pas dhënies së emrave do të formohet një grup i përbashkët PD-PS me 6 anëtarë dhe zgjedh 1 kandidat. Kandidati propozohet me firma të përbashkëta PD-PS.

Rithemelimi: Procesi lojë e Ramës për ta zgjedhur vetë presidentin

Enkelejd Alibeaj tha sot pas mbledhjes se nëse mazhoranca nuk do të pranojë asnjë nga emrat e propozuar, do të tërhiqen nga procesi.  

Por, deputetit demokrat, Oerd Bylykbashi përfaqësues i ‘Rithemelimit’, thotë se marrëveshja Alibeaj-Balla i jep mundësinë Edi Ramës që të sigurojë 84 mandate për kandidatin e tij që ta shesë si kandidat konsensual.

“Marrëveshja i jep mundësi Ramës që të caktojë një opozitë hollesh përkundër opozitës së votës e me votat e tyre të caktojë presidentin e më tej, të ndryshojë sistemin zgjedhor, hartën e ndarjes territoriale, për të mbajtur pushtetin”, thotë ai.

Edhe deputeti demokrat, Ervin Salianji e cilëson procesin një lojë të ‘pisët’ të Ramës duke i lënë opozitës në dorë sipas tij “pataten e nxehtë” të dy raundeve që kërkojnë shumicën e cilësuar në Kuvend për zgjedhjen e kreut të shtetit.

“Përmes angazhimit personal për të qenë në këtë proces, e frangmentarizoi opozitën, krijoi një proçes paralel në opozitë dhe thelloi ndarjen në PD dhe në fund s’do ketë asnjë emër që mbledh 20 firma!”, thotë Salianji.

PS mund ta zgjedhë e vetme presidentin pas raundit të tretë

Në datë 23 pritet të ezaurohet edhe raundi i dytë për zgjedhjen e Presidentit dhe nëse kjo nuk do të ndodhë, Parlamenti do të tentojë sërish në një raund të tretë më datë 30 maj për gjetjen e një konsensusi mes palëve dhe sigurimi i 84 votave siç kërkon Kushtetuta për tre raundet e para.

Dje Enkelejd Alibeaj kërkoi që opozita të kishte të drejtën ekskluzive për të propozuar kandidatë në dy raundet e ardhshme të votimit për presidentin e ri, propozim që u pranua nga kolegu i tij socialist, Taulant Balla, i cili ka thënë se dy raundet e fundit do të ishin të mazhorancës.

Partia Socialiste mund ta zgjedhë e vetme presidentin pas raundit të tretë.

Tryeza u mblodh pasi raundi i parë i votimit dështoi pa asnjë kandidaturë konkrete. Kryeministri Edi Rama bëri të ditur se mazhoranca do të dilte me emër kandidati vetëm në raundin e katërt, pasi në 3 raundet e para nuk i kishte votat e mjaftueshme për të zgjedhur presidentin.

Pakti Alibeaj-Balla i arritur para kamerave nuk u mirëprit nga grupimet e tjera të opozitës.

Deputetët e “Komisionit të rithemelimit” të PD-së e cilësuan Alibeajn pa mandat politik nga partia dhe paktin e arritur si një tallje me procesin kushtetues dhe se një i shkarkuar nga demokratët nuk mund të vendosë kushte.

Afati për paraqitjen e kandidatëve skadon të dielën, në 22 maj.  

Të fundit