‘Turbulencat’ e shtatorit në politikën shqiptare, ç’pritet të ndodhë në qeveri dhe në PD

Shtatori pritet të jetë një muaj i nxehtë për politikën shqiptare. 

Në 2 shtator, grupimi ‘Basha’ e drejtuar prej tij ka paralajmëruar se do të mbledhë Kuvendin Kombëtar, në një kohë kur vetë demokratët janë në negociata për bashkim.

Sakaq, kundër kësaj mbledhje ka dalë Gazment Bardhi, i cili deklaroi se nesër (2  shtator) nuk ka mbledhje të Kuvendit Kombëtar të PD-së, ndryshe nga çfarë ka thirrur Basha.

Bardhi shtoi se Partia Demokratike momentalisht është pa kryetar dhe se ky problem është një çështje e brendshme dhe se duhet të zgjidhet.

Po sot u mbajt mbledhja e Grupit Parlamentar nën drejtimin e Sali Berishës.  Ky i fundit, ka deklaruar se është vendosur mes të tjerash që të vazhdohen negociatat me Gazment Bardhin dhe grupin e tij për një bashkim të mundshëm.

“Me Bardhin dhe çdo deputet tjetër, veç Alibashës dhe Lul Pengut kjo parti është dhe do jetë e hapur për diskutime. Është një proces që po ecën drejt bashkimit. Sigurisht ka mekanizma, po punohet. Kur ekziston vullneti gjërat realizohen.”, u shpreh duke iu përgjigjur pyetjes së gazetarëve.

Pro hapjes së këtij procesi tratativash u prononcua menjëherë edhe deputeti Saimir Koreshi që njihet se qëndron në krah të Bardhit, megjithatë PD do rikthehet edhe këtë session parlamemtar në kuvend e ndarë.

Skandali i inceneratorëve

Afera e inceneratorëve ka qenë kryefjalë e kësaj vere.

Pikërisht, nisur nga skandalet që kanë dalë në skenë, kreu i PD, Sali Berisha ka paralajmëruar së shpejti protesta.

Në deklaratat e tij para mediave, Berisha ka deklaruar vazhdimisht se Tirana po zien nga një revoltë e brendshme, e cila së shpejti pritet të shpërthejë dhe do u tregojë vendin autorëve të vjedhjes së shekullit të inceneratorëve.

Çelet Kuvendi, seanca plenare më 4 shtator

Kuvendi do t’i rikthehet jetës paralmentare, të hënën e 4 shtatorit, ku do të mbahet edhe seanca e parë, e sesionit të ri plenar.

Kujtojmë se sesioni i fundit parlamentar u mbyll mes shumë polemikash, e po ashtu me miratimin e disa ligjeve të kontestuar si "kontrata" për studentët e mjekësisë dhe legalizimi mjekësor i kanabiasit. 

Po ashtu, edhe rinisja e sesionit të ri pritet të ketë debate të forta.

Gjici në qeli, më 24 shtator ‘beteja’ për Kukësin!

E diel, 24 shtator, me dekret të presidenti Barjam Begaj, qytetarët e Kukësit do të paraqiten sërish pranë qendrave të votimit për të zgjedhur të parin e qytetit, kryebashkiakun e ardhshëm. Safet Gjici që fitoi garën në zgjedhjet e 14 majit ndodhet në qeli, pas videoskandalin seksual në zyrën e tij. Bashkinë pa kryetarin e zgjedhur e drejton përkohësisht nënkryetari, Granit Gjana.

PS përzgjodhi për garën e 24 shtatorit Albert Halilajn, ish -drejtor i Tatimeve në Kukës, i emëruar së fundi prefekt i qarkut.

Ndërkohë, Partia Demokratike pasi zhvilloi procesin e primareve në Kukës zgjodhi kandidatin Emri Vata.

Përplasje e fortë Tiranë – Athinë për Fredi Belerin

15 shtatori është afati i fundit në të cilin Fredi Beleri humb mandatin nëse nuk betohet si kryebashkiak. Mediat greke duke iu referuar avokatëve, thonë se para këtij afati mbrojtësit ligjorë do të dorëzojnë në SPAK një kërkesë të re për lirim.

Media greke Protothema.gr në një shkrim kushtuar kryebashkiakut i cili ndodhet në burg që prej datës 12 maj, me akuzën e blerjes së votave shkruan se avokatët mbrojtës do të kërkojnë lirimin me kushte shtrënguese, pasi data 15 shtator konsiderohet si një ditë kritike.

Deri atëherë Beleri duhet të betohet dhe të marrë detyrat zyrtare, në të kundërt humbet mandatin dhe zgjedhjet e Himarës do të përsëriten. Ai ka bërë kërkesënë GJKKO për lirimin nga qelia, por që i është refuzuar.

Për lirimin e Belerit u zhvillua edhe një protestë në Himarë disa javë më parë, ku morën pjesë edhe zyrtarë të lartë grekë.

Sipas Athinës zyrtare çështja e betimit të Belerit nuk është një çështje e drejtësisë, por e vullnetit politik.

Për çështjen Beleri është angazhuar vetë kryeministri Rama që në një sërë intervistash për media të njohura greke po përpiqet të bindë Athinën. Nga ana tjetër nuk duket se janë të bindur.

Spastrime në qeveri, më të rrezikuarit ministrat nën hetim 

Partia Socialiste do të mbledhë Asamblenë Kombëtarë të hënën pasdite në orën 16:30 (4 shtator). Pas ndryshimeve në parti të bëra në fund të korrikut, Rama paralajmëroi thirrjen e kësaj mbledhje në të cilën pritet të merren vendime të rëndësishme si për partinë ashtu edhe për qeverinë.

Në konferencën e pak ditëve më parë Rama la të hapur mundësinë e riformatimit të qeverisë, e megjithatë duhet të presim Asamblenë e PS-së.

"Prisni edhe pak ditë, mbledhja e Asamblesë së PS vjen shpejt", tha Rama në 25 gusht.

Kjo është mbledhja e dytë e Asamblesë kombëtare të PS-së pas asaj të 26 korrikut 2023 ku u shkarkua i gjithë sekretari i ekzekutiv i PS-së, që do të zëvendësohet me emrat e rinj të cilët do të zgjidhen në kongresin e jashtëzakonshëm i cili edhe ky pritet të mbahet në fund të shtatorit.

Në atë Asamble, Damian Gjiknuri u shkarkua nga posti i sekretarit të përgjithshëm të PS-së dhe përkohësisht në vend të tij si numri 2 i PS u komandua Blendi Klosi.

Bledi Çuçi i cili u shkarkua nga  detyra e ministrit të Brendshëm u caktua kreu i ri i grupit parlamentar të PS-së, në vend të Taulant Ballës. Ky i fundit  u emërua në postin e ministrit të Brendshëm të lënë bosh nga Bledi Çuçi.