U arrestua nga SPAK, çfarë e ndau 3 muaj më parë Lefter Kokën me Ramën kur dorëzoi mandatin e deputetit

Ish-ministri i Mjedisit Lefter Koka u arrestua këtë të martë me urdhër të Prokurorisë së Posaçme Kundër Korrupsionit dhe Krimit të Organizuar, në sajë të hetimeve për koncesionin e incineratorit të Elbasanit.

SPAK kërkoi gjithashtu arrestimin e dy personave të tjerë me iniciale S.G., dhe K.Z.  Por këta dy të fundit u shpallën në kërkim pasi policia nuk arriti të gjejë vendndodhjen e tyre. Mbi të dyshuarit rëndojnë akuzat e korrupsionit të zyrtarëve të lartë dhe të pastrimit të parave.

Koka akuzohet për "Pastrim të parave", "Korrupsion" dhe "Shpërdorim detyre", pas një rrugëtimi të gjatë politik, ndërsa në 1 shtator të këtij viti dorëzoi mandatin e deputetit në qarkun e Durrësit, pasi e kishte siguruar nën siglën e PS, i renditur në vend të shtatë.

Pak ditë para këtij vendimi, në 27 gusht, kryeministri Rama pati një takim me deputetët e vjetër dhe të rinj, ndërsa kreu i qeverisë i paralajmëroi të gjithë që të bëjnë kujdes, pasi do të përballen me drejtësinë për çdo shkelje dhe abuzim me shërbimet publike.

Sipas Ramës, kushdo që të abuzojë, do të përballet me ligjin, pasi PS nuk do të jetë mburoja e askujt që cenon qëllimet dhe emrin e partisë për qëllimet e veta.

“Duhet të jetë e qartë për të gjithë ne, gjithë anëtarësinë e PS, por edhe për ata që na kanë zgjedhur ose jo, si dikush që e ka në ballë logon e PS, ekspozohet nga organet e drejtësisë si ndikues apo përfitues i të mirave publike, faji është i tiji, por turpi është i të gjithëve ne, nëse nuk e vendosim të qartë e të drejtë vijën e kuqe.

Kjo skuadër nuk do të jetë kurrë as streha, as mburoja e askujt që cenon qëllimet dhe emrin e PS, me qëllimet e veta”, deklaronte Rama. 

I pyetur në emisionin Opinion lidhur me këtë tërheqje të Kokës, Rama deklaronte:

Pyetje: Lefter Koka pse iku

Edi Rama: Ja për ato që ka thënë vetë

Pyetje: Nuk ka sqaruar asgjë

Edi Rama: E ka sqaruar

Pyetje: E fitoi mandatin dhe ia dha dhuratë PS-së.

Edi Rama: Si more e jepka dhuratë?

Pyetje: Po, e fitoi mandatin, e la dhuratë për PS-në dhe iku. E merr dikush që s’e meriton.

Edi Rama: Ore, se ju të bëni të prekësh veten që të shohim nëse jemi në realitet apo në ëndërr. Votat i merr Partia Socialiste dhe nëse dikush dorëzon stafetën, e merr tjetri.

Njoftimi i dorëzimit të mandatit në 1 shtator

2 dekada më parë me përgjegjësi të lartë publike, mora përsipër të garoja për të qenë zëri qytetarëve durrsakë. Në këtë rrugëtim plot sfida, suksese e padiskutim dhe dështime, pata fatin të dëshmoj fuqinë e besimit, si dhe dinjitetin e njerëzve që punojnë çdo ditë me ndershmëri dhe përkushtim për një të ardhme më të mirë.

Në morinë e sfidave me të cilat ky rrugëtim të përball është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël.
Sot është dita që rrugëtimin tim politik, ta vijojnë ata mijëra bashkëpunëtorë të mitë, që më bënë fitues për vite me radhë dhe që mbase nuk kam mundur asnjëherë t’i falënderoj sa duhet. Sot, e ardhmja u përket atyre!

Me këtë vendim timin, është njohur institucionalisht si Komisioni Qendror i Zgjedhjeve ashtu edhe Kuvendi i Shqipërisë.
Së fundmi, mirënjohje të madhe për mundësinë , besimin dhe privilegjin e jashtëzakonshëm që më është dhënë t’i shërbej me përkushtim qytetit, vendit dhe njerëzve që dua!
Shqipëria është padyshim sot një vend më i mirë se dje, është vendi plot dritë shprese që na përket të gjithëve.

Kush është Lefter Koka?

Lefter Koka u përfshi në politikë në vitin 2000 si anëtar i Këshillit Bashkiak të Durrësit, pas angazhimit në sektorin privat.  Në vitet 2003-2007, Lefter Koka ka shërbyer si kryetar i Bashkisë së Durrësit, ndërsa prej vitit 2009 ka qenë deputet i Kuvendit të Shqipërisë nën siglën e Lëvizjes Socialiste për Integrim.

Ai u zgjodh ministër i Mjedisit në kabinetin e kryeministrit Edi Rama pas zgjedhjeve parlamentare të vitit 2013, si pjesë e Lëvizjes Socialiste për Integrim dhe u largua nga funksioni pas prishjes së koalicionit PS-LSI.

Më pas Koka u shkëput nga kjo parti në kohën kur LSI dhe PD dorëzoi mandatet e deputetëve dhe u largua nga parlamenti duke iu bashkuar Partisë Socialiste. Ai ishte pjesë e listave të kandidatëve për deputetë të Partisë Socialiste në zgjedhjet e 25 prillit.

Por më 1 shtator, deputeti i zgjedhur i PS-së, Lefter Koka, njoftoi dorëheqjen nga mandati i deputetit të fituar në 25 prill në Durrës.

Ish-ministri sot akuzohet si i përfshirë në aferën e inceneratorëve, duke u bërë kështu zyrtari i parë i lartë i këtij niveli që vihet në pranga në Shqipëri.