Ultimatumi i Berishës, a do ta lirojë selinë e PD Lulzim Basha në 5 janar?

5 janari, është ultimatumi i vendosur nga ish kryeministri Sali Berisha dhe mbështetësit e tij për kryedemokratin Lulzim Basha për të liruar selinë e Partisë Demokratike.

Ata i kanë kërkuar Bashës të respektojë vendimet e marra në Kuvendin e 11 dhjetorit dhe referendumin e organizuar prej tyre një javë më vonë dhe të largohet nga zyra e tij këtë të mërkurë.

Basha reagoi me forcë duke u shprehur se “PD ka të gjitha mundësitë për të mbrojtur integritetin e institucionit të saj, nëse dikush mendon se mund ta përdhosë me banditë të dhunshëm”.

Kryetari demokrat tha se kjo forcë politike i ka marrë vendimet e veta e do t’u qëndrojë atyre deri në fund. 

Edhe në daljen e fundit për mediat në 30 dhjetor, Lulzim Basha tha gjatë se asgjë nuk do të ndodhë më 5 janar. Madje, shtoi se PD është e përgatitur për çdo situatë.

“Asgjë s’do të ndodhë. PD e përgatitur për çdo situatë e nuk do të lejojmë trekëndëshin e Bermudës, që në një vit që premton të jetë vendimtar për ndarjen nga tranzicioni ta zhvendosë fushën e betejës nga shumica e shqiptarëve nga regjimi i Ramës dhe patericave të tij te përplasja mes demokratëve për interesat e një personi të vetëm”, tha Basha.

Më herët, Berisha u shpreh në A2 CNN se nëse Lulzim Basha nuk largohet nga zyra e kryetarit të Partisë Demokratike brenda 5 janarit, do të organizohet një protestë paqësore, ku anëtarësia e partisë do ta nxjerrë “butësisht” nga zyra.

“Nëse Basha nuk largohet nga zyra brenda 5 janarit, do të ketë një protestë paqësore. Ai po mban selinë, kështu që paqësisht, përmbaruesi anëtarësi do ta nxjerrë nga zyra. Anëtarësia do i tregojë se ajo zyrë nuk është e një deputeti, por e atij që do të zgjedhin anëtarët e PD-së për drejtimin e saj. Deputeti Basha do të largohet nga zyra dhe kaq është historia”, theksoi Berisha.

Në selinë e PD-së, dy palët që nuk njohin njëra-tjetrën, u përplasen në distancë, duke përdorur tone force. 

Rrugët mes tyre janë qartësisht të ndara, dhe ajo që deri pak më parë ishte një luftë nervash, duket se tani është kthyer dhe në një provë force.

Ndërkohë, lideri historik i demokratëve ka thirrur një protestë në datën 8 janar ku ka paralajmëruar se do drejtojë anëtarësinë drejt selisë blu për të nxjerrë kryetarin butësisht nga zyra.