25-vjeçari u vra në një "rrugicë qorre", 100 metra larg shtëpisë; Policia informacion zyrtar: Në vendngjarje u sekuestrua pistoleta dhe krehër me fishekë

Detaje të reja dalin në dukje nga vrasja e 25-vjeçarit, Klodjan Rasha, në Laprakë nga një efektivë policie.

Përmes një njoftimi zyrtar policia bën me dije se në vendngjarje është gjetur dhe sekuestruar një armë zjarri, pistoletë me fishekë. Megjithatë nuk saktësohet se ku specifikisht është gjetur arma.

Klodiani ka qenë fëmija i vogël i familjes Rasha, me origjinë nga Puka, i cili ka edhe dy vëllezër më të mëdhenj se vetja.

Fqinjët e 25-vjeçarit kanë pohuar se më 2016 i riu është akuzuar për plagosje me dashje dhe heqje të paligjshme të lirisë, por që nga ai incident ai nuk ka qenë më person problematik.

Vendi ku ndodhi ngjarja është një rrugicë “qorre”.

Mësohet se, i riu kishte qenë deri në orën 23:00 në një lokal në zonën e “Don Boskos” dhe më pas teksa kthehej për në banesë i është bërë shenjë nga patrulla e policisë që të ndalonte. Pavarësisht këtij urdhri, i riu është futur mes rrugicave për të humbur gjurmët, ndërsa vetëm 100 metra larg banesës së tij është qëlluar 2 herë me plumb, duke i shkaktuar vdekjen.

Një pistë hetimi nga ana e grupit hetimor është mungesa e ndriçimit në zonën e krimit. Sipas policisë, kjo mund të ketë bërë që polici të ngatërrojë objektin që i riu kishte në dorë me armë. Megjithatë banorët e zonës shprehen se pavarësisht ndriçimit të dobët, drita në hyrje të lagjes ka qenë e mjaftueshme për të kuptuar nëse 25-vjeçari kishte armë në dorë apo jo.

SHÇBA ka sekuestruar kamerat e sigurisë në rrugë për të kuptuar nëse kemi patur tejkalim të kompetencave të policisë apo jo.

Polici që kreu vrasjen po mbahet i shoqëruar në komisariat, deri në zbardhjen e ngjarjes.

Njoftimi i plotë:

Në vijim të informacionit paraprak të dhënë në orët e para të mëngjesit të sotëm në lidhje me ngjarjen e ndodhur në rrugën “Dritan Hoxha” ju informojmë se :

Në vijim të veprimeve hetimore të kryera nga Grupi i Posaçëm Hetimor i përbërë nga SHÇBA dhe Policia nën drejtimin e Prokurorit gjatë këqyrjes së vendit të ngjarjes dhe zonës përreth u bë e mundur gjetja e armës së zjarrit që dyshohet se i përkiste shtetasit K.R, i cili nuk iu bind urdhërit të Punonjësit të Policisë për të ndaluar.

U sekuestrua në cilësinë e provës materiale armë e zjarrit pistoletë me një krehër me fishekë.

Vijon puna intensive nga grupi hetimor nën drejtimin e Prokurorit për zbardhjen e plotë të dinamikës së ngjarjes.