30 vjetori i masakrës së 2 prillit në Shkodër, reagojnë Meta, Basha e Topalli

Sot mbushen 30 vjet nga masakra e 2 prillit 1991 në qytetin e Shkodrës, ku u vranë katër të rinjë shkodranë, dhe shumë të tjerë u plagosën gjatë demonstratës antikomuniste ku manifestuesit dogjën zyrat e Komitetit Qendror të PPSH-së.

Në atë që konsiderohet si masakra e fundit e komunizmit në Shqipëri, mbetën viktima, Arben Broci, Nazmi Kryeziu, Bujar Bishanaku dhe Besnik Ceka.

Në kryeqendrën e Veriut ka qenë sot i pranishëm Presidenti i Republikës Ilir Meta ku ka vendosur një kurorë me lule tek memoriali që është ngritur për nder të 4 dëshmorëve të Demokracisë 

Në një deklaratë për mediat kreu i shtetit u shpreh se është momenti që shqiptarët të tregojnë që me 25 prill do e kthejnë vendin në shinat e Kushtetutës. Ndër të tjera ai theksoi se sakrifica e të gjithë atyre që kanë luftuar për lirinë e votës dhe të demokracisë do të marrë tjetër kuptim.

“Ajo ditë e 2 prillit e 1991 ku katër djemtë nga më të mirët e Shkodrës dhe të Shqipërisë, jemi këtu për tu angazhuar dhe për ta çuar deri në fund amanetin e tyre dhe të dëshmorëve të tjerë që ranë për demokracinë dhe zgjedhjet e lira në Shqipëri. Shqipëria ende vuan nga kapja e shtetit, nga partia shtet dhe nga zgjedhjet e lira që ka mbajtur peng integrimin në Be. Ndaj është momenti që me 25 prill ne të nisemi për ta future vendin në shinat e kushtetutës. Unë jam I bindur që Shkodra do të jetë në krye të këtij frymëzimi pasi ka qenë frymëzim në kohët më të errëta të vendi tonë. Ne sot nderojmë jo vetëm sakrificat e martirëve port ë gjithë atyre që në emer të lirisë së fjalës u martinizuar për demokracinë. Vendi është në një situatë kritike por ne do ja dalim mbanë”, tha Meta.

E pranishme në Shkodër ka qenë dhe kryetarja e Lëvizjes për Ndryshim, Jozefina Topalli e cila në një prononcim për mediat, tha se dëshiron t’u kërkojë ndjesë familjarëve, pasi sipas saj pas tre dekadash ende jemi larg ëndrrave të katër dëshmorëve të demokracisë.

"Sot pas tre dekadash jetojmë një moment kur shpresa është larguar nga ne. Kur nuk ka një pluralizmi real, ku nuk ka një të majtë dhe të djathtë, qeveri dhe opozitë. Unë sot jam këtu e rrethuar me familjarë, me njërin prej familjeve për ti kërkuar një ndjesë të madhe në emër të gjithëve. Pas tre dekadash jemi lag ëndrrave të tyre, nuk kemi arritur të kemi një ekonomi të shëndoshë. Pa një ndjesë të thellë dhe pa një kërkesë ndërgjegjen e secilit prej nesh nuk mund të hapim një kapitull të ri. Ky vend sot më shumë se kurrë ka nevojë për ndryshim. Nuk besoj se Edi Rama, Lulzim Basha, Monika Kryemadhi, Shpëtim Idrizi mund të sjellin ndryshimin. Mendoj se ka për secilin, shpresë për kurajën që të hedhin votën kundër një klase politike të korruptuar. Le t fillojmë me 25 prill, i ftoj qytetarët e mi si demokratë të vërtetë në shpirt të votojnë Lëvizjen për Ndryshim”, tha Topalli.

E pyetur pse e shmangën ceremoninë zyrtare, Topalli u përgjigj: “Unë nuk shmanga asgjë. Kam një ftesë për të mos shkuar pas germave por pas parimeve dhe vlerave. E di që ka njerëz skeptikë, por kështu ka qenë dhe ndaj tre dekadave përpara. Për ti dhënë mundësi një brezi të ri që të mbyllin këtë tranzicion”.

Edhe kryetari i PD-së, Lulzim Basha, ka kujtuar 30 vjetorin e vrasjes së 4 të rinjve në qytetin e Shkodërs. Në një postim në rrjetet sociale, kryedemokrati shkruan se heronjtë e dy prillit janë të gjithë Shqipërisë, e shton, se 30 vite më pas, PD është në rrugën e drejtë në rrugën e fitores mbi të keqen, e shton se ndryshimi do të vijë për Shqipërinë si gjithë Evropa.

Postimi i plotë:

Si sot 30 vjet më parë, më 2 prill 1991, regjimi gjakatar i Partisë së Punës vrau pa mëshirë dhe qëllimisht 4 djem të rinj, bij të Shkodrës dhe pishtarë të demokracisë.
Arben Broci, Nazmi Kryeziu, Bujar Bishanaku dhe Besnik Ceka u qëlluan nga falangat e regjimit që po jepte shpirt, sepse guxuan t’ia thonë në sy dhe publikisht diktaturës në panik se koha e saj kishte përfunduar dhe shqiptarët kishin zgjedhur lirinë dhe Europën.

Ai lumë njerëzish të lirë që vërshoi në rrugët dhe sheshet e Shkodrës dëshmoi se edhe në momentet më të vështira dhe përballë tiranisë më të pashpirt, shqiptarët janë të gatshëm të përqafojnë lirinë me çdo çmim.

Heronjtë e 2 prillit janë heronjtë e gjithë Shqipërisë. Dëshira, guximi dhe përpjekja për ta bërë Shqipërinë një vend të lirë, ngritën themelet e ndërtimit të një shteti demokratik. Përpjekje nga e cila ne nuk kemi hequr dorë asnjëherë dhe për të cilën punojmë çdo ditë.

Kjo ditë i jep një kuptim të veçantë dhe lëvizjes që ne kemi nisur sot.

30 vite më pas, 2 prilli, emrat e 4 martirëve të asaj dite të zymtë kumbojnë fort në ndërgjegjen tonë dhe na japin sigurinë se jemi në rrugën e drejtë dhe në rrugën e fitores mbi të keqen, të ndryshimit që po vjen për çdo shqiptar, në rrugën e Shqipërisë si gjithë Europa. Lavdi përjetë martirëve të 2 prillit!