A po kërkon Sunak një marrëveshje me Shqipërinë për emigrantët e paligjshëm?

Prestigjiozja britanike “Daily Mail” ka publikuar së fundmi një shkrim më titullin: A po kërkon Rishi Sunak marrëveshje për emigrantët e paligjshëm me Shqipërinë?

Kjo nënkupton se në versionin e marrëveshjes Rama-Meloni mund të kalohet në një tjetër, kësaj here me Anglinë, duke e bërë vendin tonë ‘magazinë’ emigrantësh afrikanë për hesap të politikanëve, ndërsa vetë shqiptarët po ikin vetë "nga sytë-këmbët".

“Rishi Sunak do të diskutojë planet radikale për të përpunuar kërkesat për azil të emigrantëve jashtë shtetit. Ai ka udhëtuar në Romë për një mini samit mbi migracionin ilegal me kryeministren italiane Giorgia Meloni dhe homologun e saj shqiptar Edi Rama.”, thuhet ndër të tjerash në artikull.

Artikulli i plotë

“Rishi Sunak do të diskutojë planet radikale për të përpunuar kërkesat për azil të emigrantëve jashtë shtetit. Ai ka udhëtuar në Romë për një mini samit mbi migracionin ilegal me kryeministren italiane Giorgia Meloni dhe homologun e saj shqiptar Edi Rama.

Më pas, ai do të mbajë një fjalim mbi këtë temë në një konferencë politike të organizuar nga partia “Vëllezërit e Italisë” së zonjës Meloni. Z.Sunak ra dakord për një marrëveshje historike kthimesh emigrantësh me zotin Rama vitin e kaluar, e cila ka parë që numri i shqiptarëve që kalojnë ilegalisht Kanalin të bjerë me 90 për qind.

Ai pritet të diskutojë një marrëveshje të re, e cila do të bëjë që Italia të dërgojë emigrantë të paligjshëm në Shqipëri për të trajtuar kërkesat e tyre për azil. Marrëveshja e ashtuquajtur ‘offshoring’ është bllokuar përkohësisht nga Gjykata Kushtetuese e Shqipërisë.

Por kjo mund të nënkuptojë se 36.000 emigrantë në vit do t’i përpunojnë kërkesat e tyre në Shqipëri, në dy qendra të ndërtuara dhe drejtuara nga Italia. “Doëning Street” u shpreh me rezerva nëse zoti Sunak është i interesuar të ndjekë një marrëveshje të ngjashme me Shqipërinë, për të aplikuar skemën e pamundur të qeverisë britanike në Ruandë.

Një zëdhënës tha se samiti i së shtunës “do të përqendrohet në partneritetet ekzistuese dhe marrëveshjen e kthimit me Shqipërinë”. Por një burim konfirmoi se në rend dite do të jetë edhe marrëveshja mes Italisë dhe Shqipërisë.

Italia është në vijën e parë të krizës së migracionit të BE-së, me pothuajse 130.000 të ardhur në nëntë muajt e parë të këtij viti. Sipas marrëveshjes, Italia do të dërgojë deri në 3000 njerëz në muaj në Shqipëri për përpunim.

Pasi të jenë vlerësuar kërkesat e tyre, Italia do të jetë përgjegjëse ose për sistemimin, ose dëbimin e tyre. Skema është e ndryshme nga partneriteti i Mbretërisë së Bashkuar me Ruandën, sipas të cilit migrantët nuk do të kenë asnjë mundësi për të aplikuar për azil këtu.

Por, disa ministra besojnë se një marrëveshje ‘offshoring’ do të ishte më e lehtë për të kapërcyer gjykatat, veçanërisht me një vend si Shqipëria, ku tashmë ka një marrëveshje kthimi emigrantësh.

Një burim qeveritar tha më herët se skema nënvizoi interesin në rritje të vendeve të tjera europiane, në përpjekjen për të penguar emigrantët e paligjshëm. Gjermania, Danimarka dhe Austria janë ndër shtetet e tjera që hetojnë marrëveshje të stilit të Ruandës.

Bisedimet e së shtunës nënvizojnë gjithashtu partneritetin politik në lulëzim midis z.Sunak dhe zonjës Meloni. Dy liderët do të zhvillojnë një seancë kokë më kokë, përpara se t’i bashkohet zoti Rama për një diskutim më të gjerë.

Z.Sunak më pas do të mbajë një fjalim për trajtimin e migracionit të paligjshëm në festivalin vjetor politik të zonjës Meloni, të cilin ajo e themeloi më 1998. Një burim tha se z.Sunak shkon mirë me zonjën Meloni, e cila erdhi në pushtet në të njëjtën kohë, dhe gjithashtu përmendi Margaret Thatcher si ndikim”.