"Administrata 'zbarkon' në Athinë"/ Celibashi pas investigimit: KQZ nuk ofron regjistrim në terren

Kryekomisionieri Shtetëror për Zgjedhjet, Ilirjan Celibashi ka konfirmuar edhe një herë se KQZ nuk ofron regjistrim në terren për votuesit shqiptarë jashtë vendit, por vetëm online.

Permes një reagimi në rrjetet sociale, Celibashi sqaron se regjistrimi i emigrantëve realizohet kryhet vetëm nëpërmjet Platformës Elektronike të Regjistrimit (PER), e cila mund të aksesohet në faqen zyrtare të KQZ ose përmes aplikacionit zyrtar të KQZ për telefona smart.

Reagimi i KQZ vjen pas denoncimit të Piranjave se në takimet e Partisë Socialiste nëpër Greqi, ka zyrtarë të kësaj partie që prezantohen si punonjës të një projekti të KQZ-së për të regjistruar emigrantët.

Reagimi i Celibashit: 

Regjistrimi i votuesve nga jashtë kryhet vetëm nëpërmjet Platformës Elektronike të Regjistrimit (PER), e cila mund të aksesohet në www.kqz.gov.al ose përmes aplikacionit zyrtar të KQZ për telefona smart.

Komisioni Qendror i Zgjedhjeve (KQZ) nuk ka ofruar dhe nuk ofron asnjë lloj ndihme apo mbështetje për regjistrimin në terren. E vetmja ndihmë dhe mbështetje për çdo votues nga jashtë ofrohet ekskluzivisht nga Qendra e Ndihmës pranë KQZ dhe vetëm përmes:

✔️ Thirrjeve telefonike

✔️ Mesazheve në WhatsApp

✔️ Chatbot-it

✔️ Email-it zyrtar të KQZ

KQZ nuk ka autorizuar asnjë person tjetër që, në emër dhe për llogari të institucionit, të angazhohet në procesin e regjistrimit të votuesve nga jashtë.

Kushdo që konstaton persona që prezantohen si përfaqësues të KQZ në ambiente të tjera, jashtë institucionit, duhet ta denoncojë menjëherë rastin pranë organit të prokurorisë.

Përtej kësaj, KQZ siguron të gjithë votuesit nga jashtë se procesi i regjistrimit është në përputhje me të gjitha standardet e sigurisë të vendeve të Bashkimit Europian, i mbrojtur nga çdo interes, ndikim politik apo partiak.

KQZ nuk ka autorizuar askënd tjetër që në emër dhe për llogari të këtij institutioni të angazhohet në procesin e regjistrimit të votuesve nga jashtë, as për brenda vendit dhe më shumë akoma as për jashtë vendit.