Deklaratat kontradiktore për Alqi Bllakon/ SPAK: U arrestua sot në orën 03:30, i kërkuam policisë ta mbante nën mbikqyrje

Pas Policisë së Shtetit, ka reaguar Prokuroria e Posaçme për arrestimin e ish-deputetit socialist Alqi Bllako. Ky i fundit akuzohet si implikuar në aferën e ineceneratorit të Fierit dhe se ka përfituar rreth 150 milionë lekë të vjetra përmes skemave fiktive nga pronari i kompanisë, Klodian Zoto.

SPAK thotë se arrestimi është në orën 03:30 të mëngjesit të sotëm. Ndërsa në njoftimin e policisë, thuhej se ai ishte vetëdorëzuar dhe gjendej në Drejtorinë e Policisë që prej mbrëmjes.

Arrestimi i Bllakos është shoqëruar nga deklarata kontradiktore. Ndryshe nga Policia e Shtetit që tha se Bllako u vetëdorëzua, SPAK shprehet se u ekzekutua vendimi për arrestimin e ish-deputetit.

Prokuroria bën me dije se i ka kërkuar policisë në datën 30 mars që të mbante  nën mbikqyrje deputetin për të shmangur tentativën e mundshme të arratisjes.

Gjithashtu thekson se pas kërkesës së SPAK-ut, GJKKO vendosi masën “arrest me burg” dje në orën 15.45.

Prokuroria e Posaçme shton se më pas vendimi i gjykatës i është dhënë për ekzekutim strukturave të Policisë së Shtetit, të cilat e kanë realizuar arrestimin në orët e para të mëngjesit.

Njoftimi i plotë:

Mbi caktimin dhe ekzekutimin e masës e sigurimit për shtetasin Alqi Bllako
Në kuadër të hetimeve të procedimit penal nr.187 të vitit 2020, në Regjistrin e Njoftimit të Veprave Penale në Prokurorinë e Posaçme me datë 18.03.2022, është regjistruar emri i shtetasit Alqi Bllako, lindur në Ersekë dhe banues në Tiranë, si i dyshuar për kryerjen e veprave penale “Shpërdorimi i detyrës”, në bashkëpunim dhe “Korrupsioni pasiv i funksionarëve të lartë shtetërorë ose i të zgjedhurve vendorë”, të parashikuara nga nenet 248, 25 dhe 260 të Kodit Penal.

Me shkresën Nr.2407 Prot., datë 29.03.2022, Drejtuesi i Prokurorisë së Posaçme i ka kërkuar Kuvendit të Republikës së Shqipërisë dhënien e autorizimit për arrestimin e deputetit Alqi Bllako. Kërkesa është shoqëruar me dokumentacionin përkatës.

Me shkresën Nr.1274/4 Prot., datë 29.03.2022, ardhur nga Kuvendi, jemi njoftuar se kërkesa për dhënie autorizimi për arrestimin e deputetit Alqi Bllako do të shqyrtohet në mbledhjen e Këshillit për Rregulloren, Mandatet dhe Imunitetin, që do zhvillohet me datë 30.03.2022, ora 18.00.

Me shkresën Nr.2407/4 Prot., datë 30.03.2022 kemi njoftuar Drejtorinë e Përgjithshme të Policisë në lidhje me kërkesën e paraqitur në Kuvend për dhënie autorizimi për arrestimin e deputetit Alqi Bllako, duke i kërkuar mbajtjen nën mbikqyrje të deputetit dhe njoftimin e prokurorit të çështjes nëse deputeti do paraqitej në dalje të territorit të Republikës së Shqipërisë.

Kuvendi i Republikës së Shqipërisë, me shkresën Nr.1274/7 Prot., datë 30.03.2022 (ardhur në Prokurorinë e Posaçme në orën 19.40) na ka njoftuar për anulimin e mbledhjes së Këshillit për Rregullore, Mandatet dhe Imunitetin, për arsye se deputeti ka depozituar kërkesën për heqje dorë nga mandati deputetit. Neni 71, pika 2, shkronja “b” e Kushtetutës parashikon se: “…mandati deputetit mbaron kur deputeti heq dorë nga mandati…”.

Me shkresën 2407/6 prot., datë 30.03.2022 (dorëzuar në gjykatë në orën 20.30) nga Prokuroria e Posaçme i është kërkuar Gjykatës së Shkallës së Parë për Korrupsionin dhe Krimin e Organizuar caktimi i masës së sigurimit personal “arrest në burg”, për shtetasin Alqi Bllako, si i dyshuar për kryerjen e veprave penale të parashikuara nga nenet 248, 25 dhe 260 të Kodit Penal.

Me vendimin Nr.26, datë 31.03.2022, Gjykata e Shkallës së Parë për Korrupsionin dhe Krimin e Organizuar ka caktuar masën e sigurimit personal “arrest në burg”, për shtetasin Alqi Bllako. Vendimi është vënë në dispozicion të Prokurorisë së Posaçme në orën 15.30 të datës 31.03.2022.
Në orën 15.45, të datës 31.03.2022, vendimi i gjykatës për caktimin e masës së sigurimit ndaj shtetasit Alqi Bllako i është dhënë për ekzekutim strukturave të Policisë së Shtetit. Vendimi është ekzekutuar nga Policia e Shtetit në orën 03.30 të datës 01.04.2022.