"E vërteta doli", Manjani i përgjigjet Bashës: Mbyll sqepin se pranimi i fajësisë nga McGonigal është zhytje tape për ty

Juristi Ylli Manjani ka një përgjigje për Lulzim Bashën, i cili e cilësoi si fitore, ku "e vërteta doli në shesh" pasi ish agjenti i FBI, Charles McGonigal pranoi fajësinë e dosjes shqiptare.

I pyetur nga gjykatësja Colleen Kollar-Kotelly, ish agjenti kishte “informuar Prokurorin e Departamentit të Drejtësisë … për një hetim të mundshëm kriminal për një shtetas amerikan, që ishte regjistruar për të bërë lobizëm ‘për një parti që nuk ishte e kryeministrit Rama’ dhe McGonigal u përgjigj “Po”.

Në një reagim në Facebook, Manjani shkruan se reagimi i Bashës është qesharak, pasi u provua që Rama -Mcgonigal i kanë gjetur një financim të parregullt.

Ai shton se shtohen prova përtej çdo dyshimi të arsyeshëm që Departamenti i Drejtësisë Amerikane ka një dosje hetimore e cila duhet t'i ishte vënë në dispozicion Prokurorisë së Shqipërisë.

Reagimi i plotë:

"E vërteta doli"- thotë busti i dyllit Lulëzim. Është super qesharak!

Po or po, doli cullak e vërteta. U provua që Rama Mcgonigal i kanë gjetur një financim të parregullt Lulit.

E vërteta është që ata e gjetën këtë financim, por ama Luli e bëri gjëmën. Po të mos e bënte atë financim të parregullt, nuk kishin se ç'të gjenin ata.

Madje, aq cullak doli e vërteta sa shtohen prova përtej çdo dyshimi të arsyeshëm që Departamenti i Drejtësisë Amerikane ka një dosje hetimore e cila duhet t'i ishte vënë në dispozicion Prokurorisë së Shqipërisë në përgjigje të letër-pororsisë. Tashmë e thotë gjykata amerikane këtë gjë.

Dëshmia e MCgonigal e provon qartësisht që ekziston kjo dosje atje. Për këtë dosje Prokuroria e Shqipërisë kërkoi informacion me letër porosi nga Amerika. Por përgjigja nuk erdhi kurrë. Mos dhënia e përgjigjes së letër-porosisë nga kanalet diplomatike të SHBA, është gjithashtu fakt i njohur.

Kështu që Lul dylli nuk ka ç't’i gëzohet kësaj të vërtete, por duhet të mbyllë sqepin se deklarimi i pranimit të fajësisë nga McGonigal është zhytje tape edhe për të.

Domethënë, po t’i dojë qejfi Departamentit të Shtetit, lejon ambasadën këtu të nisë përgjigjen që Departamenti i Drejtësisë e ka bërë gati për drejtësinë tonë dhe, burgu për Lul dyllin është i pashmangshëm.

Po ore po, e vërteta e pengmarrjes doli.

Ekzaltimi i Lulit është thjesht idiot. Qesharak komplet.

* * *

Qëllimi i këtij komenti nuk është Luli në thelb, sepse Luli s'i hyn në punë as dreqit, por fakti se si mbahet peng drejtësia e gjasme reformuar për arsye politike, edhe nga amerikanët që e duan shumë drejtësinë tonë "të pavarur".