Emrat e të arrestuarve/ Rezultatet e aksionit kundër ‘kokave’ të krimit, SPAK: Ç’dihet për 8 grupet e frikshme

Kreu i SPAK-ut, Arben Kraja së bashku me drejtorin e Policisë së Shtetit, Gledis Nano dolën në një konferencë për mediat, ku dhanë detaje për megaoperacionin e zhvilluar ditën e sotme në disa qytete.

Detaje nga operacioni

-Erdhi pas arrestimit të Nuredin Dumanit

-U ushtruan kontrolle në 28 banesa

-U shtri në disa qarqe, në Tiranë, Durrës, Elbasan dhe Lezhë

-Në operacion u përfshinë forcat speciale RENEA, FNSH, Drejtoria e Forcës së Posaçme Operacionale, Drejtoria Kundër Krimeve ndaj Personit e Pasurisë, Drejtoria Hetimore

-U sekuestruan sekuestruar 3 armë zjarri (konkretisht 2 kallashnikovë dhe 1 pistoletë), 2 antiplumb si ato që përdor Policia e Shtetit, municion luftarak, rreth 17 mijë euro, aparate celulare, fatura bankare, automjete dhe sende të tjera të përfituara nga veprimtaria kriminale.

Personat e arrestuar deri më tani: Nuredin Dumani, Henrik Hoxha, Ardian Uzuni, Altin Ndoci, Skerdi Tasi, Leonard Palushi, Fatos Gosa, Erion Alibej, Gentajan Sharra, Florenc Cekrezi, Elvis Koci, Ilirjan Feci, Petrit Qoli, Agron Qoli, Agron Qafa, Artan Plaka, Besjan Xhixha.

Kraja bëri me dije se janë evidentuar të dhëna të rëndësishme lidhur me disa vrasje të kryera në kuadër të grupit të strukturuar kriminal. Ai bëri me dije se kanë evidentuar ekzistencën e 8 grupeve të strukturuara kriminale.

“Në Elbasan 4 grupe, në Durrës një grup dhe në Tiranë 3 grupe. Këta grupe kriminale janë dedikuar në veprat penale në dëm të jetës dhe shëndetit si edhe në drejtim të pasurisë. Ajo që është karakteristikë për këta grupe kriminale është dhuna e egër e treguar në kryerjen e krimeve, si dhe pasojat shumë të rënda të ardhura nga kjo veprimtari kriminale.

Pjesëtarë të një grupi kriminal në raste të ndryshme bashkëpunojnë me grupe të cilët janë kundërshtarë të njëri – tjetrit. Hetimi ka nxjerrë në pah se grupet kriminale ishin në gjendje të paguanin shuma të mëdha parash për vrasjen e personave të cilët ata i konsideronin si kundërshtarë. Mënyra e kryerjes së veprave penale tregon për një shkallë shumë të lartë organizimi dhe në këtë mënyrë edhe shkallë shumë të lartë rrezikshmërie shoqërore”, tha Kraja.

Paralajmërimi për policinë

Nano paralajmëroi punonjësit e policisë që do të përballen me drejtësinë, nëse bëhen palë me krimin. Ai tha se, “mbetem i vendosur për të pastruar nga radhët e Policisë së Shtetit ata punonjës policie që shpërdorojnë detyrën apo më keq akoma bëhen palë me krimin, si dhe inkurajoj agjencitë ligjzbatuese që të hetojnë çdo rast të përfshirjes së punonjësve të Policisë, në veprimtari të kundërligjshme”.