Francezi në konflikt me Bashkinë për banesën: I kam kërkuar ndihmë Ramës. E shkreta Shqipëri!

Politiko.al ka botuar pretendimin e një qytetari francez që ka blerë shtëpi në Tiranë se po pengohet nga shërbimet e Bashkisë së kryeqytetit për ta rinovuar atë (lexo këtu). Pas botimit të letrës të z. Ledoux Politiko ka marrë edhe qëndrimin e palës së akuzuar, bashkisë së Tiranës. Zyrtarë të këtij instiucioni të kontaktuar nga ne, duke sjellë edhe pjesë të komunikimit me biznesmenin francez, thonë se kërkesa për rinovim të banesës nuk i plotësonte kriteret e vendosura nga Këshilli i ministrave (lexo këtu).

Politiko po boton një reagim të dytë të z. Ledoux ku ai pretendon se i është drejtuar edhe kryeministri Rama për këtë çështje, por pa sukses.

Më poshtë reagimi i plotë vijues i Jacques Ledoux:

Unë nuk jam mësuar që bashkia e Tiranës t'u përgjigjet kaq shpejt kërkesave tona (të miat dhe të arkitektit tim). Ndonjëherë ata as përgjigjen fare, siç ndodhi kur kërkova nga shërbimet e Bashkisë të më ndihmonin në këtë rrëmujë administrative ... Për më tepër, kisha kërkuar edhe nga Edi Rama, me të njëjtin sukses ...

Përpjekja e kryebashkiakut tregon se Bashkia i merr artikujt e Politikos seriozisht: Unë jam i lumtur, sepse ka regjime që e respektojnë më pak shtypin dhe kjo nuk është kurrë një shenjë e mirë ...

Nuk jam i gëzuar që përmend një korrupsion të mundshëm në letrën time. Pikërisht sepse nuk kuptoj asgjë në lidhje me këtë situatë e cila është e kudogjendur, unë shoh vetëm një bllokim që lidhet me ndërhyrjet politike.

Sidoqoftë, ju duhet ta dini se unë jam politikisht mjaft i afërt me zotin Rama dhe partinë e tij, dhe për shkak se nuk e kuptoj se çfarë po ndodh, unë supozoj për qëllime të këqija dhe gabime administrative ...

Fakti i marrjes së përgjigjeve, të gjitha negative, nga Bashkia e qytetit nuk mohohet, edhe nëse nuk e tregova në tekstin tim, në fakt arkitekti (çdo herë) iu përgjigj këtyre opinioneve negative. Dhe shpesh ndërhyri për të marrë një përmbledhje të procedurës dhe një rezultat pozitiv të lejes së ndërtimit ... Por ndonjëherë ishte madje e nevojshme të lëshohej një lloj njoftimi zyrtar për të marrë një përgjigje (shumë) shpesh pak para afatit të autorizuar. Sikur të donin të më humbnin sa më shumë kohë ...

Kësaj i shtohet edhe përgjigja e fundit e marrë nga ky zyrtar i lartë në administratën shqiptare, pas ndërhyrjes së vetme që kam bërë vetë në këtë çështje ... Kjo përgjigje ishte aq e çuditshme saqë pyesja veten nëse ky zyrtar nuk po tallej hapur me mua … Sidoqoftë, nuk ishte ashtu sepse ai vetë e kishte rivendosur kontaktin…! Turp!

Unë nuk mendoj se arkitekti im është aq i keq sa ai gjithmonë bënte gabime. Për më tepër është një shtëpi, madje edhe një shtëpi e vogël, dhe projekti nuk është teknikisht aq i komplikuar, unë shoh projekte shumë më të këqija që mbështeten nga Bashkia në Tiranë ...!

Për informacionin tuaj, shtëpia u ble më 24 dhjetor 2018 dhe arkitekti paraqiti kërkesën e parë për leje ndërtimi më 24 maj 2019: pavarësisht disa takimeve konsultative me shërbimet e bashkisë (në të cilat natyrisht që nuk mora pjesë, e për çfarë në fund të fundit?) Dosja ime nuk ka lëvizur as një centimetër përpara ... A nuk është e çuditshme kjo?

Unë jam mësuar gjithashtu të punoj me shërbimet administrative të bashkive të qyteteve në vendet e tjera të Bashkimit Evropian dhe ne kemi gjetur gjithmonë një zgjidhje kur ka pasur probleme ose keqkuptime ... Vetëm në Shqipëri që nuk kam pasur sukses!

Dhe kur u them miqve dhe partnerëve të mi për këtë, të gjithë e dinë se çfarë po ndodh, dhe natyrisht pyesin se ç’kam dashur në një vend kaq të vështirë dhe të korruptuar. Për ta arsyeja e pengesës është e qartë!

E shkreta Shqipëri dhe i shkreti imazh i saj, ende kaq larg normalitetit!