GJKKO rrëzon SPAK-un: Fatmir Mediu nuk do të rihetohet për 'Gërdecin'

Gjykata e Posaçme kundër Korrupsionit dhe Krimit të Organizuar ka rrëzuar kërkesën e SPAK-ut, i cili kërkoi që ish-ministri i Mbrojtjes Fatmir Mediu të rihetohej për çështjen e Gërdecit.

Gjykata evidenton se që prej datës 14.09.2009, kur Gjykata e Lartë vendosi  pushimin e çështjes, organi i akuzës nuk i kërkoi përsëri Kuvendit dhënien e autorizimit për fillimin e ndjekjes penale ndaj Mediut.

Gjithashtu evidenton se prokuroria nuk ka pasur asnjë pengesë që të rimerte të pandehur shtetasin Fatmir Mediu pa kërkuar autorizim për ndjekje penale apo të kërkonte rishikim të vendimit.

Në kushtet kur prokuroria nuk e ka ushtruar ndekjen penale për një periudhë mbi dhjetë vjet edhe pse nuk ka pasur një pengesë të tillë, Gjykata çmon se ajo nuk mund të ushtrohet më.

Ky vendim u mor nga gjyqtari Erjon Çela. Ditën e sotme, para se të niste seancë për Mediun, familja Durdaj, e cila humbi djalin e saj 7-vjeçar nga shpërthimi i Gërdecit, iu drejtua me një letër GJKKO-së, ku i kërkuan GJKKO-së pranimin e kërkesës së SPAK për nisjen e hetimeve ndaj Mediut dhe rigjykimin e këtij të fundit.

Gjykata e Lartë shpalli moskompetencë mbi kërkesën e SPAK për të nisur hetimet ndaj ish-ministrit të Mbrojtjes, Fatmir Mediu. Ajo ia kaloi çështjen GjKKO-së me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë.

Ndërkohë avokati mbrojtës i tij, Ardian Visha, kohë më parë tha se mundësitë për ta rihapur çështjen janë zero sepse Gjykata e Posaçme e Shkallës se Parë nuk mund të prishë një vendim të gjykatës së Lartë që në këtë rast është vendimi i pushimit të 2009.

Gjykata e Lartë kishte vendosur të pushojë çështjen ndaj Mediut pasi ai kishte imunitet dhe prokuroria nuk kishte marrë autorizim.

Por ndryshimet ligjore të vitit 2012 dhe 2017 kanë ndryshuar imunitetin parlamentar të të zgjedhurve, ndaj ndjekjeve penale, hetimit apo gjykimit të tyre.

Mediu u akuzua në atë kohe për shpërdorim detyre, në lidhje me shpërthimin e municioneve në fabrikën e demontimit në Gërdec. Familja Durdaj, e cila humbi të birin, kallëzoi në SPAK ish-ministrin e Mbrojtjes, Fatmir Mediu.

Shpërthimi në fabrikën e demontimit të armëve në Gërdec, shkaktoi vdekjen e 26 personave, plagosjen e rëndë e 27 personave, plagosja e lehtë të 109 të të tjerëve.

Dokumenta bashkëngjitur