Helmimi i fëmijëve në Gramsh, autoritetet shëndetësore reagojnë pas publikimit të rastit

Operatori i Shërbimeve të Kujdesit Shëndetësor ka reaguar për helmimin e fëmijëve të një kopshti shtetëror në Gramsh, pasi dyshohet se kanë konsumuar ushqim të kontaminuar me salmonelë.

Në një reagim në Facebook, i cili vjen pas publikimit të rastit në media, autoriteti shëndetësor shkruan se i mituri është paraqitur në spital me shqetësime të lehta gastrointestinale.

Operatori i Kujdesit Shëndetësor deklaroi se analizat përfundimtare nuk kanë dalë ende dhe se pritet që rezultati të dalë nesër.

"Në vijim të raportimeve në media mbi një situatë të ndodhur në një institucion parashkollor në qytetin e Gramshit, sqarojmë se Njësia Vendore e Kujdesit Shëndetësor është vënë menjëherë në ndjekje të rastit.

1 fëmijë është paraqitur me shqetësime të lehta gastrointestinale dhe është referuar për analiza laboratorike nga mjekja pediatre përkatëse.

Në kuadër të hetimit epidemiologjik janë marrë gjithsej 76 mostra nga fëmijët dhe punonjësit, dhe janë në proces analizimi.

Rezultatet e analizave nuk kanë dale ende përfundimtare dhe priten të jenë të disponueshme ditën e nesërme, më 25 maj 2025.

NJVKSH Gramsh ka njoftuar Autoritetin Kombëtar të Ushqimit (AKU) dhe Institutin e Shëndetit Publik (ISHP) dhe po bashkëpunojnë ngushtësisht me strukturat vendore për të garantuar një vlerësim të plotë dhe të kujdesshëm të situatës.

Theksojmë se të gjitha veprimet janë ndërmarrë në kohë dhe me profesionalizëm, dhe nuk ka vend për shqetësim të shtuar në këtë fazë.

Çdo informacion i mëtejshëm do të bëhet publik në mënyrë transparente, sapo të përfundojnë analizat dhe verifikimet përkatëse", shkruan operatori.