I doli emri në përgjimet e SPAK për kontrabandë ilaçesh, mjeku i QSUT: S’kam lëshuar asnjë epikrizë

Tre mjekë shqiptarë dhe dy biznesmenë janë në mesin e 82 personave të hetuar nga SPAK dhe Antimafia në Itali për korrupsion, mashtrim dhe trafik barnash nga Italia në Shqipërinë.

Mjekët dyshohen se kanë bashkëpunuar me grupin e organizuar kriminal në këmbim të parave ose shërbime seksuale kundrejt personave që merrnin trajtimin mjekësore apo u lejohej hyrja në Itali. Bëhet fjalë për mjekët e Qendrës Spitalore Universitare ‘Nënë Tereza’ Vladimir Peto, Aurel Vula, Ilir Broqja dhe dy biznesmenët Aleksandër Gjoka dhe Ndue Pulaj.

Pasi i doli emri në përgjimet e SPAK, mjeku Aurel Vula ka reaguar me një deklaratë publike duke mohuar akuzat për kontrabandë ilaçesh. Në deklaratën e tij në Facebook, Vula shkruan se arsyet e vizitave të tij të shpeshta në Itali lidhen me problemet shëndetësore të prindërve të bashkëshortes së tij.

Vula shton se nuk ka lëshuar asnjë certifikatë apo epikrizë për të dërguar pacientë të trajtoheshin në spitalet e Italisë, apo asnjë dokument që lehtësonte procedurat e shtrimit të pacientëve të spitalet italiane.

DEKLARATË PUBLIKE

Duke marrë shkas nga njoftimi i bërë publik ditët e fundit nga autoritetet e drejtësisë italiane dëshiroj t’i bëj të ditur publikut shqiptar si vijon: Përfshirja e personit tim dhe familjarëve të mi në këtë njoftim nuk ka asnjë lidhje me realitetin e ndërtuar në media këto ditë.
Për të qënë transparent, arsyet e vizitave tona familjare në Itali kanë qënë krejtësisht shëndetësore, të lidhura me rrezikimin e jetës së dy prindërve të bashkëshortes sime. Të dy këta të fundit i janë nënshtruar ndërhyrjeve të përsëritura kirurgjikale në zemër nga ku nëna e bashkëshortes humbi edhe jetën.

Të gjitha këto ngjarje shëndetësore janë të dokumentuara nga autoritetet spitalore italiane. Nisur nga drama familiare për humbjen e njëriut të afërt, kjo ngjarje krijon sensitivitet të lartë për mua dhe familiarët e mi.

Unë jam mjek pediatër dhe me përgjegjshmëri të plotë deklaroj se në asnjë moment:

Nuk kam lëshuar asnjë çertifikatë apo epikrizë përcjellëse për pacientë të sugjeruar për shtrim në Itali;

Nuk kam lëshuar asnjë dokument të çfarëdolloj natyre që të mund të lehtësonte procedurat e kalimit të kufirit të shtetasve shqiptarë gjatë kohës së pandemisë në shtetin Italian; I lutem të gjitha mediave të respektojnë integritetin tim profesional dhe moral të cilin e kam ndertuar me përkushtim dhe sakrifica në çdo kohë në ndihmë të çdo pacienti, pa lënë mënjanë kontributin gjatë periudhes së pandemisë si pasojë e Sars-Cov 19.

Në të njëjtën kohë, falenderoj të gjithë dashamirësit të afërm , kolegë dhe pacientët e mi për mbështetjen e treguar me anë të mesazheve dhe telefonatave të panumërta gjatë këtyre ditëve.
Me besimin e plotë tek drejtësia.