Jo vetëm zëvendësimi i kontrollorëve, ‘rrugëdaljet’ e Ramës përmes Turqisë

Presidenti i Turqisë Recep Tayyip Erdogan dhe kryeministri shqiptar Edi Rama nuk e kanë fshehur asnjëherë miqësinë mes tyre.

Madje, kur Rama viziton Turqinë, Erdogan  i rezervon atij pritje pompoze, që shpesh kthehet në objekt diskutimi në media e opinionin publik shqiptar.

Miqësia mes tyre është theksuar edhe më shumë gjatë dy viteve të fundit të qeverisjes Rama, kur Shqipëria u godit nga tërmeti i 26 nëntorit, e disa muaj më pas, ashtu si të gjithë planetin, pandemia covid-19.

Shqipëria po i gëzohet investimeve turke, ndërsa nuk i ka thënë dot jo as kërkesave të vazhdueshme të Erdoganit për të përndjekur atë që politika zyrtare turke e emërton si organizata terroriste FETO dhe e ka shpallur përgjegjëse për grushtin ushtarak të shtetit në verën e vitit 2016. 

Rasti më i fundit, që Shqipëria zgjidh një ngërç të krijuar me fluturimet në aeroportin e vetëm që disponon, ‘Nënë Tereza’, ishte duke zëvendësuar kontrollorët shqiptarë që protestuan prej 48 orësh, me ata turq.

1 milion vaksina anti-Covid nga marrëveshja në Stamboll

Qeveria e Shqipërisë siguroi në 25 mars 1 milion doza vaksinash kineze Sinovac ndaj Covid-19, pas negociatave me një kompani turke të autorizuar për distribuimin e këtyre vaksinave.

Nga kontrata e nënshkruar në Stamboll mes kryeministrit Edi Rama dhe kompanisë turke “Keymen Ilaç Sanayive Ticaret”, parashikohej që fillimisht të blihen 500 mijë doza, ndërsa fillimisht asokohe mbërritën 192 mijë doza.

Lajmin e bëri të ditur kryeministri Edi Rama në Facebook, i cili bashkë me ministrat Arben Ahmetaj dhe Ogerta Manastirliu, ishte në Stamboll për të nënshkruar marrëveshjen.

Kjo lëvizje e Ramës erdhi pasi qeveria miratoi një akt normativ që lejon Shqipërinë që të marrë vaksina nga të gjitha vendet prodhuese dhe të negociojë me të gjitha firmat farmaceutike.

Spitali i Fierit

Gjatë vizitës së fundit në Turqi kryeministri Edi Rama mori premtimin nga presidenti turk se brenda tre muajve do të ndërtohet spitali rajonal i Fierit, duke koenciduar para zgjedhjeve të 25 prillit, i cili pas ndërtimit do të administrohet nga burimet njerëzore të Turqisë për një periudhë tranzitore.

Ndërtimi i spitalit të Fierit me kosto 60-70 milionë euro erdhi si projekt pasi u nënshkrua në Ankara krijimi i Këshillit të Bashkëpunimit Strategjik në Nivel të Lartë mes dy vendeve. Në sajë të kësaj marrëveshje, në 4 mars gjuha turke është vendosur si lëndë me zgjedhje në shkollat shqiptare.

Në Fletoren Zyrtare është publikuar marrëveshja mes dy vendeve e cila parashikon edhe futjen e gjuhës turke në shkollat shqipe si lëndë e një gjuhe të huaj me zgjedhje të lirë, me qëllim një programi pilot në gjuhën turke.

Turqia ka ndihmuar edhe për procesin e rindërtimit pas tërmetit , si dhe në luftën kundër koronavirusit në Shqipëri.

Kujtojmë se Turqia është një vend partner i rëndësishëm tregtar ekonomik me Shqipërinë dhe gjatë vitit 2020 shkëmbimet tregtare të Shqipërisë me Turqinë u rritën në mbi 55 miliardë lekë.