Këndi i kulturës/ Njihuni me aktivitetet e javës në Tiranë

Muaji dhjetor do të vijë me dramën e jetës së një gruaje, e cila sfidoi rregullat shoqërore dhe shpërfilli traditat e asaj kohe, duke hapur kështu kalendarin artistik të muajit dhjetor, me një nga kryeveprat e operistikës botërore. Shfaqja do të vihet në skenë në datat 8, 9, 10 dhe 11 dhjetor, në TKOB.

“Carmen” është vepër e Georges Bizet, e cila kapërceu kufijtë e teatrit tradicional dhe preku zemrat e artdashësve. Historia fillon në qytetin e Seviljes, ku një ushtar fisnik, Don José, takon Carmen-in, një vajzë pasionante dhe e lirë, e cila provokon ndjenjat e Don Josés, duke pasuar një zinxhir ngjarjesh që do të tronditin rregullat shoqërore dhe do të çojë në fatin e keq të të dy protagonistëve.

Ndërkohë në fundjavë fëmijët në Liceun Artistik "Jordan Misja" do mund të ndjekin premierën më të re të teatrit, një shfaqje e cila është mbështetur mbi përrallat e moçme Shqiptare të autorit Mitrush Kuteli :

" E bija e hënës dhe Diellit "

2 Dhjetor , E Shtunë Ora 10 : 30 ,11 : 30

3 Dhjetor , E Dielë , Ora 10 : 30 , 11 : 30  

Gjithashtu ditën e diel, ora 11:00, në Hollin Koncertor të TKOB-së do të mbahet 120 vjetori i nismëtarit të artit violinistik dhe pedagogjisë shqiptare të violinës, virtuozit Ludovik Naraçi, i cili u diplomua me këtë titull në Konservatoret e Vjenës dhe Pragës.

Nga data 1 deri më 9 dhjetor në Teatrin Kombëtar do të gjeni produksionin "Shtëpia e Zotit". Gjatë një feste të pazakontë, një shtëpi ku prodhohet hashash grabitet. Kjo ngjarje pasohet me kaos te grupi i 'shtëpisë së barit', dhe të gjithë i bren dyshimi për tradhëtinë e mundshme të njëri-tjetrit. Por ndërkohë që ‘shtëpia e barit’ nuk është më sekret, lind nevoja urgjente për një tjetër vend të sigurt, dhe dikush propozon një vend fantastik ku nuk hyn askush; një vend të përsosur për të jetuar, e për të vdekur... vend i cili do të jetë dëshmitar i ndodhive të jashtëzakonshme që do të pasojnë...