"Konsumuan disa viza kokainë"/ Zbardhet dëshmia e 18-vjeçarit, si u vra Madrit Ulqinaku

Madrit Ulqinaku, 33 vjeç, u qëllua për vdekje dy ditë më parë nga 18-vjeçari Horgito Peqini, pas një konflikti verbal në ambientet e jashtme të një lokali në Elbasan.

I arrestuari për ngjarjen, Eiden Dimo, shok i Horgitos autorit kryesor në vrasjen e Ulqinakut ka dëshmuar në polici duke dhënë detaje nga ngjarja. Sipas Dimos, ai bashkë me Horgiton dhe Klaudjan Sallufi kanë qenë në banesë (nuk e specifikon se të kujt) ku kanë konsumuar birra, ndërsa Horgito dhe Safulli kanë pirë kokainë.

Dimo dëshmon se ata janë pajisur me një armë zjarri dhe një thikë, ku këtë të fundit e ka marrë vetë Dimo. I arrestuari tregon se fillimisht ka parë Safullin të konfliktohet me dy persona dhe kur është afruar ka arritur të njohë Madrit Ulqinakun dhe mikun e tij Herion Hamzallari.

Dimo pohon se ka njohje edhe me viktimën dhe me mikun e tij. Pas debateve, thotë Dimo, Horgito ka nxjerrë pistoletën dhe ka qëlluar Madritin. Menjëherë të tre kanë vrapuar, ndërsa Dimo është kapur më pas nga policia.

Dëshmia e 18 vjeçarit:

Pasi kemi pirë disa birra, Klaudio dhe Horgito, të dy kanë konsumuar disa viza kokainë mesa mbaj mend tre katër viza secili. Unë vetë kam pirë vetëm birra dhe nuk kam konsumuar lëndë narkotike kokainë. Kur unë vajta tek shtëpia, pashë që Klaudjani kishte pistoletë mbi divan.

Pasi pimë birrat dhe kokainën që konsumoi Horgito dhe Klaudjani, unë kam bërë një “video live” në rrjetim tim social “Instagram” ku kam adresën.

Pas videos qëndruam edhe pak në shtëpi edhe më pas dolëm. Kur dolëm Horgito mori pistoletën dhe e futi në marsupin që kishte apo në brez kurse Klaudjani mori një thikë në dorë dhe me pyeti: "…kë do mbash në çantë thikën apo mos e do ti pistoletën…? "…unë i thashë që do mbaj thikën se pistoletë, nuk kam mbajtur ndonjëherë. Futa thikën në çantën marsup që kisha me vete, e cila është e zezë..…

Kur ishim në rrugën sapo kalon stadiumin, unë po ecja para me Horgiton kurse pas nesh, në më pak se 1 metër po ecte Klaudjani. Në një moment unë shikoj që 2 persona kishin kapur nga duart Klaudjanin dhe po bënin llafe me atë. Unë dhe Horgito, u afruam direkt. Këto shtetas i njoh sepse i kam në lagje dhe quhen Madrit Ulqinaku dhe tjetri Herion Hamzallari. Madritin e njoh sepse vëllai i tij ka punuar në bahçen e babait tim kurse Herionin e njoh sepse ka punuar më parë tek lokali i babait tim ". Sapo i pashë që po konfliktoheshin me Klaudjanin, u afrova për ti ndarë sepse i njihja të dyja palët. Kur më pa Madriti, mu afrua dhe më tha: "…Ti je çuni i Kelit, ç’do ti me këta…". Unë thashë: "…jo nuk kam punë me ta por çfarë keni që ziheni…". Horgito, ndërkohë po i bërtiste Madritit dhe i tha: "Ta q…. r…." dhe sapo tha këtë Horgito, nxori pistoletën nga çanta e zezë, ia drejtoi armën Madritit dhe i qëlloi me armë një herë dhe Madriti u rrëzua në tokë." 

 Më pas të tre ne u larguam me vrap nga aty. Dhe Horgito iku me pistoletë në dorë. Klaudjani ishte veshur me një bluzë blu, kurse Horgito kishte kapele të zezë në kokë, bluzë të bardhë, me një marsup të zi dhe pantallonat nuk ia mbaj mend. Unë shkova drejt farmacisë që ka mami im dhe aty i lashë mamit.celularin, varësen dhe unazën time. Më pas më kapi një Polic dhe më shoqëroi në Komisariat. Dua të them që nuk e di ku shkoi Klaudjani me Horgiton, sepse nuk i pashë ngaqë vrapova direkt…”.