Live me 'shtëpitë e barit', Kozaku për median angleze: Isha i famshëm o vlla, s’jam futur vetëm unë

Mediat britanike i janë referuar shpesh influencerëve dhe Tik Tok-erëve shqiptarë si personazhe të famshëm që përdorin rrjetet sociale për të promovuar drogën, krimin e së fundmi shtëpitë e barit në Britaninë e Madhe.

“Express UK” në një artikull të publikuar së fundmi, ka shkruar për Aleks Vishën, i ashtuquajturi “Mbreti i Tik Tok”, dhe vëllain e tij Dor Visha, të cilët prej vitesh jetojnë në Britani. Aleksi dhe Dori shpesh, janë parë të hyjnë ‘live’ nga shtëpitë e barit duke promovuar edhe jetën e luksit që bëjnë me paratë e fituara nga puna me kanabis.

Një prej personazheve që i ka shoqëruar në disa video, është edhe tik tok-eri i njohur Kozak Braçi. Ky i fundit ka rrëfyer në një intervistë për gazetarin anglez të “Express UK” se nuk është i vetmi që ka hyrë në live me ta dhe se nuk e ka ditur fillimisht se ndodheshin në shtëpia bari.

Kozaku ka mohuar që të jetë përfshirë ndonjëherë në aktivitete të tilla.

Biseda

-Në disa video që kemi gjetur, ti u flet njerëzve në shtëpitë e barit në Angli.

Kozak: Jo mo, unë në fillim fare fusja njerëz Live, ku e dija unë se ku ishte ai! Ma ka çu ftesën për Live, ai mund të jetë dhe duke u hedh nga tarraca. (Qesh)

-A e promovon ti këtë stil jetese?

Kozak: Nuk është stil i mirë, s’është gjë e mirë. Edhe kur rrija Live në fillimet e mia, kam vite, që fusja njerëz. Më çonin Live nga Anglia, me naj vend tjetër. Habitesha kur i shihja, se a kupton, është si duke folur me ty tani dhe të dalësh në shtëpi bari. Përshembull këta edhe nuk e di a kanë qenë në Angli, ai mund të ketë qenë edhe në Amerikë. Ku di unë ku ka qenë ai!

-Si ndihesh që një i ri mund ta shohë dhe merr idenë e gabuar?

Kozak: Ça ka me u ni mo? Ça t’i bëj, se kam hedh unë! Pastaj sa veta janë fut ashtu, në Shqipëri nuk ekzistojnë shtëpitë e barit. Kanë dal or burrë…Flisje me dikë e të tregonte direkt, jam në shtëpi bari, nxirrte kamerën direkt.

-A ke punuar ndonjëherë me to?

Kozak: S’kam vuajtur ndonjëherë për të pas gjëra, ka punu familja. Por po të isha në hall, edhe mund t’u joshja…

Në fund të intervistës, Kozaku shihet nervoz dhe u kërkon të mos e japin regjistrimin ku ai thotë se ka hyrë në live me persona që janë shfaqur nëpër shtëpia bari.

“Jo se do më bëjnë gjë mu…Mos e regjistro! Atë shtëpive të barit, se më hap probleme o vlla. Ka hy gjithë Shqipëria, s’kam hy vetëm unë! Kam qenë i famshëm o vlla. E bëra intervistën për respekt”, dëgjohet të thotë Kozaku.