Mesazhi i kreut të KMSH për Fiter Bajram: Ta shohim Shqipërinë si amanet që duhet mbajtur

Besimtarët myslimanë festojnë sot Fiter Bajramin. Kreu i Komunitetit Mysliman Shqiptar, Bujar Spahiu iu drejtua të gjithë shqiptarëveme një mesazh për vendin e popullin, në këtë ditë të shenjtë.

Spahiu i kushtoi rëndësi dhe vëmendje largimin të të rinjve nga vendi teksa tha se kombi ynë po pakësohet çdo ditë e nga pak. Kreu i KMSH-së i bëri thirrje të mos largohen nga Shqipëria, por të luftojnë braktisjen e vendit dhe ta shohin si amanet që mund ta ruajnë ndër breza.

Spahiu tha se për ta bërë Shqipërinë më të mirë së pari duhet të vendoset një raport mes së drejtës dhe së vërtetës.

“Motra dhe vëllezër, kujdesuni që Kombi jonë të rritet nëpërmjet virtytit! Secili nga ne e ka detyrë të kontribuojë për të frenuar mpakjen e kombit. Po pakësohemi dita-ditës. Ne që kemi qenë një nga popujt me moshën më të re në Europë po plakemi me ritme shumë të shpejta.

Pse duhet të zgjedhim rrugën më të lehtë, braktisjen e vendit, në vend të qëndrimit këtu dhe të forcimit të kombit tonë. Të lindim fëmijët këtu, t’i rrisim këtu në vendin tonë si qytetarë me virtyte dhe të dorës së parë në vend që t’i çojmë si qytetarë të dorës së dytë nëpër botë!

Familja është bërthama e çdo shoqërie. Ta forcojmë atë ashtu siç e kemi traditën tonë të shkëlqyer. Vendin tonë e ka bekuar Zoti me gjithë të mirat, ta shohim si amanet që duhet ta mbajmë siç i takon amanetit të ruhet.

Unë besoj se me ndihmën e Zotit ne do t’ia dalim ta bëjmë Shqipërinë më të mirë, për veten tonë dhe për fëmijët tanë. E për ta bërë vendin më të mirë, kontributi parësorë është vendosja e një raporti të drejtë me të vërtetën dhe të drejtën nga secili prej nesh”, tha Spahiu në fjalën e tij.

Në fund kreu i KMSH-së e mbylli fjalën e tij me një lutje për cilindo të ketë bekim dhe t’i fallen mëkatet.

“Motra dhe vëllezër, ta lusim Zotin që ky muaj që po lemë pas të na ketë bërë njerëz më të mirë.

Të na ketë bërë më të vëmendshëm ndaj të varfërve, ndaj kategorive të margjinalizuara të shoqërisë. Të jemi më të ndjeshëm dhe më solidarë me njëri-tjetrin.Të kujdesemi për miredukimin e fëmijëve. Të shtrijmë dorë e mëshirës dhe kujdesit ndaj prindërve, fqinjëve, e cilitdo që ka nevojë për ne.

Zoti na pastë fal mëkatet në këtë muaj të faljes! Zoti u bekoftë ju, familjet tuaja dhe kombin tonë!”, u shpreh Spahiu.