Nuk ndryshojnë masat anti-Covid/ Komiteti Teknik i Ekspertëve: Nata e ndërrimit të viteve, pa orë policore

Pavarësisht konfirmimit të variantit Omicron ën Shqipëri, Komiteti Teknik i Ekpertëve vendosi që të mos ketë ndryshimin të masave anti-Covid. Zv.ministrja e Shëndetësisë Mira Rakacolli bëri me dije se natën e ndërrimit të viteve nuk do të ketë orë policore. Ajo shtoi se zbatimi i kufizimeve nuk po realizohet në mënyrën e duhur.

"Niveli i masave që janë në fuqi është i përshtatshëm për ta kontrolluar këtë situatë. Për momentin do të mbeten në fuqi të njëjtat masa që kemi dhe sot. Ora policore do mbetet e njëjtë, 23:00, me përjashtim të natës së ndërrimit të viteve. Ora policore nuk ka lidhje me organizmin e aktiviteteve, por me lejimin e lëvizshmërisë së njerëzve përgjatë asaj nate", tha Rakacolli.

Shefja e spitalit Infektiv Najada Çoma ngriti si shqetësim pacientët në moshë të re. Ajo tha se numri i të rinjve që ka nevojë për trajtim spitalor është rritur, ndërsa shtoi se shumica është e pavaksinuar.

"Numri i personave të shtruar në covid 1 dhe 3 është në gjendje të qëndrueshme, rreth 140 pacientë. Numri i të shtruarve në spital në moshë të re është rritur dhe 30% i takojnë grupmoshës 19 deri në 40-45 vjeçare. Pjesën madhore e zënë personat e  pavaksinuar", tha Çomo.

Shefja e Epidemiologjisë në ISHP, Silva Bino bëri me dije se mbulimi vaksinor ka shkuar në 40%. Bino tha se vendi ka siguruar mbi 2 milionë e 700mijë vaksina, ku dominon Pfizer-i.

"Kemi një rritje të shifrave të vaksinimit që ka sjellë një rritje të mbulesës me vaksina në vend që po arrin në rreth 40% në popullatën e përgjithshme dhe rreth 50% në popullatën target. Aktualisht në vend kanë ardhur mbi 2 milionë e 700 mijë vaksina, aktualisht mbizotëron vaksina Pfizer", tha Bino.

- Ora policore vijon me orën 23:00 – 06:00.

- Vijon që qytetarët që hyjnë në Republikën e Shqipërisë, nga të gjitha pikat kufitare apo ata që kalojnë tranzit, duhet të vijojnë të dorëzojnë një nga dokumentet e mëposhtme:

- Pasaportë vaksinimi, ku data e vaksinës së fundit të ketë të paktën dy javë e aplikuar nga data e hyrjes në kufi.

- Test PCR, të kryer brenda 72 orëve ose testin e shpejtë antigenic brenda 48 orëve të hyrjes në kufi.

- Provë të kalimit të infeksionit Sars-Cov-2 të vlefshme deri në 6 muaj pas shërimit.

- Përjashtim nga rregullat e përcaktuara në pikën 2, bëhet për fëmijët deri në moshën 6 vjeç.

- Qytetarët rezidentë të Republikës së Shqipërisë dhe që nuk kanë asnjë nga dokumentet e përmendura në pikën 1, duhet të vetë izolohen për një periudhë 10 ditore dhe të informojnë autoritetet shëndetësore për të kryer një test në fund të periudhës së izolimit.

- Vijon që në strukturën e aeroporteve do të lejohen të hyjnë vetëm pasagjerët që udhëtojnë, të cilët duhet të zbatojnë me rigorozitet mbajtjen e maskës ashtu sic është rekomanduar sipas protokollit të ndryshuar.

- Vijon të mbetet në fuqi që në të gjithë institucionet shëndetësore, moslejimi i hyrjes së familjarëve për personat që janë të shtruar.

- Vijon të mbetet në fuqi urdhri për përdorimin e maskave në ambiente të mbyllura, në qendra tregtare, supermarkete, dyqane etj, e në të gjithë ato vende ku nuk sigurohet distancimi fizik.

- Vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive etj deri në 30% të kapaciteteve të tyre me prezencë të spektatorëve.