Pa bukë, dushe e mbikapacitet, spitali psikiatrik në Vlorë si kamp i Hitlerit

Sipas një auditimi të KLSH-së të vitit 2021 në Spitalin Psikiatrik Vlorë “Ali Mihali”, janë gjetur shkelje financiare, që kapin shifrën 400 milionë Lekë të vjetra përgjatë viteve 2017-2020.

Ky spital së fundmi është investuar nga Ministria e Shëndetësisë dhe është i ndarë në dy shërbime, akut dhe kronik. Ajo, që ndodh me kushtet e shërbimit kronik, është pak të thuash skandaloze.

“Brenda këtij spitali është reparti i të sëmurëve kronikë. Në atë repart çfarë nuk ndodh, të sëmurët kronikë jetojnë në kushte çnjerëzore”, tha denoncuesja.

Për pavijonin e burrave, kapaciteti është 14 pacientë, por aty mbahen plot 41 të sëmurë. Në pjesën më të madhe të ditës të sëmurët lihen jashtë sepse nuk i përballon të 41 pacientët. Pamjet që vijnë aty janë më të vërtetë skandaloze.

Pavijoni i grave është në kushte edhe më të rënda. Ambientet ku trajtohen pacientët aty janë çnjerëzore. Aty mungon çdo gjë minimale.

Femrave ju janë qethur flokët shkurt për shkak të parazitëve. Në një banjo e një dush duhet të lahen plot 51 gra me probleme mendore. Aty funksionon vetëm një çezmë.

Krevatet janë të prishur, të ndotur me jashtëqitje, dhe me gjithë denoncimet, asnjë masë nuk është marrë.

Sipas KLSH janë konstatuar shkelje financiare në mirëmbajtjen e objektit të spitalit, ku figurojnë që janë kryer shpenzime, por kushtet ku jetojnë pacientët nxjerrin blof këtë investim.

“Për mua është e papranueshme. Duhej ta denoncoja këtë fenomen sepse nuk mund të tolerohet më. Ata janë njerëz pavarësisht se kanë probleme. Ata kanë të drejtë të kurohen, të marrin mjekimin ashtu si çdo pacient tjetër”, u shpreh denoncuesja.

Në raportin e KLSH-së nënvizohet gjithashtu abuzimi me ushqimin e pacientëve dhe shërbimi i çalë i lavanterisë.

Ushqimi nuk ka cilësinë e duhur, madje shërbehet jashtë, në tokë e pa lugë.

Edhe tek shpërndarja dhe gatimi i ushqimeve KLSH ka gjetur shkelje financiare. Sipas audituesve nuk përmbushen parimet bazë të këtij shërbimi, i cili është jetik për pacientët.

Sa i përket lavanterisë, spitali ia ka dhënë këtë shërbim një subjekti privat. Për shkak të sëmundjes disa pacientë i kryejnë nevojat personale në krevat, të cilët qëndrojnë të lagur për ditë të tëra pasi nuk u vendosen panolina dhe nuk pastrohen nga stafi. Papastëria mbizotëron në këto dy reparte. Dyshekët janë me urinë dhe jashtëqitje, era e keqe kundërmon deri jashtë në rrugën kryesore.

Auditimi edhe këtu ka gjetur shkelje financiare. Artikujt janë shënuar me copë dhe jo me peshën specifike.

Në këtë spital janë bërë edhe abuzime të tjera me dietat dhe udhëtime fiktive për rehabilitimin e pacientëve. Por sipas auditimit të KLSH, ato fatura janë fiktive. “Stop” ka mësuar se drejtoresha e këtij spitali ka ushtruar dhunë psikologjike ndaj kryeinfermieres, punonjëses sociale dhe psikologes, të cilat janë detyruar për të firmosur këto dieta fiktive.

“Sipas dijenisë sime është bërë udhëtimi deri në Valbonë i pacientëve, por realisht këta pacientë nuk kanë shkuar. Është bërë fiktive, është mëse e kuptueshme. Nëse këta pacientë jetojnë në kushte të mjerueshme, i shikon të palarë, nuk përdorin pampers, i shikon në kushte të tmerrshme, ju mendoni se do i çojnë për udhëtime në Valbonë? Është e kuptueshme që jo”, tha një denoncuese.

Sa i përket dietave, KLSH ka zbuluar se është abuzuar me remontin e dy automjeteve, me litrat e karburantit të shpenzuar në mospërputhje me konsumimin real. Sipas KLSH, spitali psikiatrik “Ali Mihali” në Vlorë ka një dëm ekonomik rreth 400 milionë Lekë të vjetra.

Drejtoresha e komanduar prej 5 vitesh e këtij Spitali, është Olta Ganaj, një emër jo i panjohur për publikun.

Ajo iku nga detyra si drejtoreshë e Shtëpisë së Fëmijës Vlorë, pas transmetimit në “Stop” të abuzimeve të saj financiare.

Më 1 Maj 2018, “Stop” investigoi abuzimet me fëmijët jetimë në Vlorë dhe shpërdorimin financiar të këtij institucioni ku asokohe drejtoreshë ishte Olta Ganaj.

“Stop” ka evidentuar nga auditimi i KLSH-së, se janë disa kompani private të cilat kanë fituar tenderin e pastrimit, mirëmbajtjes dhe ushqimit. Emrat e këtyre kompanive janë të ndryshme, por kanë një të përbashkët, administratorin. Sipas investigimit, rezulton që është Alma Tafaj.

Deri më tani nuk ka informacione se çfarë hetimesh ka bërë prokuroria për këtë dëm ekonomik dhe social pasi pacientët trajtohen më keq se kafshët.