“Pranuam nga halli”, Naftëtarët e Ballshit firmosën zgjidhjen e pjesshme, por Rama 'u la sërish në derë' problemin që i çoi drejt grevës

Këshilli i Ministrave miratoi pasditen e së mërkurës ndihmën financiare për naftëtarët.

Sipas VKM-së, ish-punonjësit e rafinerisë së Ballshit do të marrin pagë mujore prej 40 mijë lekësh të reja nga nëntori deri në tetor të vitit 2021. Sipas marrëveshjes, atyre do u paguhen gjatë kësaj periudhe edhe kontributet e sigurimeve shoqërore dhe shëndetësore.

Në link, vendimi me kriteret dhe dokumentacionet që duhet të paraqesin ish-punonjësit për të përfituar nga ndihma financiare e qeverisë.

Por, sa u zgjidh realisht problemi i naftëtarëve të Ballshit, të cilët pas protestave dhe qëndrimit të tyre në grevë urie për gati një muaj, kryeministri Edi Rama shkoi vetë në Fier dhe u shtroi në tryezë ofertën me zgjidhjen e pjesshme.

Në fakt, Rama, i ndodhur disa muaj para zgjedhjeve elektorale u ofroi atyre paga (40 mijë lekë) për një vit, me kushtin që të dalin nga greva e urisë, por sërish ish-punonjësit e rafinerisë vazhdojnë vendnumëro me problemin e tyre më të madh, pagat e prapambetura.

Bëhet fjalë për 13 paga të prapambetura. Madje, Mimoza Muhametaj, një nga gratë që rezistoi gati 30 ditë në grevë urie pati deklaruar në një intervistë për Politiko.al se kompania i kishte borxh 13 paga që shkonin në vlerën e 9 milionë lekëve të vjetra.

Sokol Dautaj, kreu i Sindikatës së Naftëtarëve deklaroi pas marrëveshjes së ofruar nga kreu i qeverisë se ishin të pakënaqur, por të detyruar ta pranonin për shkak të gjendjes së vështirë ekonomike që ata ndodheshin.  

“Rama premtoi një pagë ndërmjetëse midis pagës minimale dhe asaj që marrin në rafineri, duke parë anën e dobët e ekonomike sepse prej 11 muajsh ne nuk marrim  asnjë pagë dhe as asistencë e pranuam”, tha Dautaj në 9 nëntor për mediat.

Edhe kryeministri Edi Rama theksoi natën e marrëveshjes çështja e rrogave të prapambetura nuk i takon qeverisë, por marrëdhënies që këta punëtorë kishin me kompaninë që menaxhonte në kohë.

“Nuk merremi me pagën e prapambetur, ajo është një çështje që ka të bëjë me marrëdhënien e tyre me kompaninë. Vendimi gjyqësor ka të bëjë me detyrimin e kompanisë dhe jot ë qeverisë. Qeveria nuk merr përsipër të zgjidhë çështjet e kompanisë”, tha kryeministri.

Prej janarit të këtij viti, naftëtarët e uzinës së Ballshit mbetën pa punë, duke bërë që ngriheshin në protesta edhe në Tiranë, duke pasuar në një greve urie që nisi në 28 shtator. Për shkak të gjendjes së rënduar, burrat në grevë u zëvendësuan nga koleget e tyre gra në mesin e tetorit.

Që nga marsi 2018, rafineria është menaxhuar nga kompanitë Tosk Energji dhe Bylis Energji, të cilat janë në pronësi të dy kompanie zvicerane, CFD Conseils Sarl dhe PGFS Pilotage & Gestion S.

KPTHN e Ballshit administrohet aktualisht nga kompania Allum Enterprises, e cila ka negociuar me naftëtarët, por pa dhënë ndonjë zgjidhje konkrete për rifillimin e punës dhe pagesën e rrogave të prapambetura.