Shqipëria shënon sot 76-vjetorin e Çlirimit (me gjithë ndasitë politike); Krerët e Shtetit homazhe pranë monumentit "Nënë Shqipëri", Basha vijon traditën

Shqipëria shënon sot 76-vjetorin e Çlirimit nga forcat nazi-fashiste italiane e gjermane.

Gjatë Luftës së Dytë Botërore, Ushtria Nacional Çlirimtare e Shqipërisë zhvilloi kryengritje të armatosur kundër okupimit të Shqipërisë.

Pas pushtimit nga italia fashiste 7 prill 1939 - 29 nëntor 1944, me kapitullimin e saj, Shqipëria në vjeshtë të 1943, Shqipëria ra nën zgjedhën e gjermanëve. 

Me çlirimin e Shkodrës më 29 nëntor, 1944, shënon ditën e çlirimi të Shqipërisë nga pushtimi gjerman. Shqipëria është vendi i parë në Ballkan që u çliruan me forcat e veta, ndërsa të gjitha shtetet e tjera të Ballkanit u çliruan me ndihmën e Armatës së Kuqe.

Megjithatë, pavarësisht rëndësisë që ka kjo ditë, edhe sot sikurse për 108-vjetorin e Pavarësisë, nuk u panë aktivitete të mëdha për shkak të pandemisë.

Krerët e Shtetit homazhe pranë monumentit “Nënë Shqipëri” (sërish në dukje ndasitë politike)

Në nderim të 76-vjetorit të Çlirimit krerët e lartë të shtetit bënë sot homazhe dhe vendosën kurora me lule pranë monumentit “Nëna Shqipëri”, në Varrezat e Dëshmorëve.

Pjesë e homazheve, në respekt dhe mirënjohje të veprës të dëshmorëve, kanë qenë Presidenti, Ilir Meta, Kryetari i Kuvendit, Gramoz Ruçi, Kryeministri Edi Rama, Ministrja e Mbrojtjes, Olta Xhaçka, Ministrja e Shtetit për Marrëdhëniet me Parlamentin Elisa Spiropali dhe Kryetari i Bashkisë Tiranë, Erion Veliaj.

Më vonë, për homazhe te 'Varrezat e Dëshmorëve' ka qenë edhe kryetarja e LSI, Monika Kryemadhi.

Nga ana tjetër mungonte lidershipi i PD, duke vijuar kështu traditën e festimit të ndarë të Ditës së Çlirimit të vendit, edhe pse 29 Nëntori është data zyrtare e kujtimit të kësaj dite.

Të majtët respektojnë 28 Nëntorin si Ditën e Pavarësisë dhe 29 Nëntorin si Ditën e Çlirimit, ndërkohë që të djathtët i përkujtojnë të dyja festat më 28 Nëntor.

Ajo çka është vënë re qartë edhe gjatë ditës së sotme janë tensionet politike mes palëve. Të rreshtuar për të bërë homazhet ndaj dëshmorëve të kombit, kryeministrin Rama e shohim në një distancë tepër të largët nga presidenti Meta.

Mesa duket ndasitë mes palëve janë më të thella, aq sa nuk janë lënë mënjanë as në këtë ditë përkujtimore.

Politika uron 29-nëntorin

Kryeministri Rama ka kujtuar këtë datë historike me vargjet e Qemal Stafës, bashkëthemelues i Grupit Komunist të Shkodrës, dita e vrasjes së të cilit është përdorur si simbolikë për të përkujtuar Ditën e Dëshmorëve.

“E vjetra po shembet, kohët po ndryshojnë, një jetë e re po lulëzon gërmadhash”, citon Rama në postimin e tij, të shoqëruar nga foto e Qemal Stafës.

Presidenti Meta në mesazhin e tij për këtë 76-vjetor është shprehur se populli shqiptar di të ngrihet mbi përçarjet ndaj atyre që kërkojnë t’iu vjedhin atdhedashurinë.

“Ne sot, përulemi me nderimin më të thellë para Qemal Stafës, Vojo Kushit, Margartia Tutulanit e gjithë atyre yjeve dhe Margaritave, që dhanë jetën e tyre me ndërgjegjeje të plotë, për të treguar pavdekësinë e Shqipërisë, si një shtet i lirë dhe i pavarur”, është shprehur Meta, teksa shton se “Populli shqiptar ka treguar në çdo moment të vështirë, që di të ngrihet mbi përçarjet, mbi ato forca të cilat kërkojnë t’i shterin energjitë më pozitive dhe kërkojnë t’ia vjedhin atdhedashurinë dhe besimin tek e ardhmja”.

Ndërkaq, kryetari i Kuvendit, Gramoz Ruçi e ka cilësuar këtë datë si një datë supreme në kalendarin e lirisë.

“Në kalendarin e lirisë, 29 nëntori qëndron ndër datat më kryelarta të shqiptarëve.

Është dita që kurorëzoi zgjedhjen e drejtë të partizanëve dhe patriotëve shqiptarë, në krahun e aleatëve të mëdhenj antifashistë.

Është dita që realizoi ëndrrën e çlirimit të atdheut nga pushtuesit, e cila është vepër e çlirimtarëve dhe partizanëve shqiptarë.

Çlirimi ishte rezultat i betejave të përgjakshme nëmalet, luginat, fshatrat dhe qytetet e Shqipërisë.

Fitimtarë të Luftës Antifashistë Nacional-Çlirimtare nuk ishin thjesht dhe vetëm partizanët shqiptarë; ishte populli shqiptar; ishte vetë Shqipëria.

Vlerat antifashiste qëndrojnë në themel të qytetërimit të sotëm europian e perëndimor dhe ato e shtyjnë botën drejt të ardhmes, progresit, paqes dhe zhvillimit.

Kolaboracionizmi, si një kërcënim i lirisë, në format e tij të ndryshme, të vjetra e të reja, tradicionale e moderne, e tërheq botën drejt të kaluarës, pasigurisë, errësirës dhe regresit.

Liria nuk është thjesht dhe vetëm fitorja mbi pushtuesit, me maliherët dhe fishekët rrëmbyer armikut. Liria e vërtetë qëndron në dashurinë tonë për të, të trashëguar brez pas brezi. Shpirtrat e lirë tënjerëzve të lirë janë mburoja e lirisë dhe garancia e saj.

Kombet që dhunojnë lirinë e të tjerëve, nuk e meritojnë lirinë e tyre. Në çdo kohë e në çdo vend, popujt që luftojnë për tu çliruar nuk mund të quhen pushtues, dhe viktimat që luftojnë për liri, drejtësi e dinjitet, nuk mund të quhen agresorë.

Lufta Antifashiste u bë në emër të të sotmes. Betejat e sotme për lirinë i bëjmë në emër të së ardhmes.

Për lirinë luftohet në çdo kohë dhe nga gjithkush që e aspiron atë. Ashtu siç nderojmë partizanët çlirimtarë për luftën e tyre, nderojmë qytetarët në betejat e përditshme për punën, jetën dhe familjen; nderojmë mjekët dhe infermierët në vijën e parë të luftës për mbrojtjen e jetëve njerëzore.

Lufta për lirinë fisnikëron kombin, atdheun, shoqërinë dhe çdo qytetar.

Dje burimi i lirisë ishte lufta për çlirim, sot motivi i saj është lufta për vlerat thelbësore të shoqërisë, mirëqenien, solidaritetin, tolerancëm dhe paqen”, shkruan Ruçi.

Kryetarja e LSI-së, Monika Kryemadhi është shprehur se është detyrë e politikës të mos bëjë më gabimet e të kaluarës për të mbyllur një herë e mirë tranzicionin.

“Është më e pakta që mund të bëjmë sot në emër të LSI-së, për të vendosur një kurorë në shenjë respekti dhe mirënjohje të 28 mijë djemve dhe vajzave shqiptare për çlirimin e Shqipërisë nga pushtuesit nazifashist. 

Nëna Shqipëri është jo simbol, por nëna Shqipëri është jeta e çdo shqiptari.

Prandaj është detyra jonë që sot në këtë ditë përkujtimore, jo thjesht për t’u kujtuar, por është ditë që duhet të rrënjoset në mendjet tona dhe sidomos të klasës politike, që të mos bëjmë më gabimet që kemi bërë dhe për të mbyllur njëherë e përgjithmonë këtë situatë tranzicioni, në këtë vit të mbrapshtë siç ishte viti i pandemisë, apo edhe situata pas tërmetit të 26 nëntorit, për të ringritur edhe njëherë pasionin dhe dashurinë për vendin, për të pasur respekt dhe mirënjohje, jo vetëm për dëshmorët tanë, por për të pasur respekt dhe mirënjohje për punën e atyre djemve dhe vajzave që kanë bërë për Shqipërinë. Lavdi dëshmorëve!”, ka thënë Kryemadhi.