"Tre reaksionarë, sharëxhinj", Gjekmarkaj i përgjigjet Ramës me vargjet e Fishtës: Vagabond e shakllaban, njeri idiot e laraman

Analisti dhe kandidati për deputet në PD, Agron Gjekmarkaj ka reaguar pas sulmeve dhe fyerjeve që bëri një ditë më parë kryeministri Edi Rama në adresë të tij.

Ai i përgjigjet Ramës me vargjet e Gjergj Fishtës, që sipas tij, ilustrojnë më së miri sjelljet e kryeministrit.

"Tashti, pra nji sallahan,

Vagabond e shakllaban,

Njeri idiote e laraman,

Qe mendon se per taman

Te tane bote rri n’ “sahan”,

Shka mund t’ shkruej, po t’pyes une ty

Ky qi as byk nuk ka ne krye,

Jo ma tru?"-shkruan Gjekmarkaj.

Përmes një postimi në Facebook, ai ironizon kryeministrin Rama. Teksa evidenton fjalët me të cilat Rama ju drejtua, Gjekmarkaj i sjell në vëmendje vilën në Surrel, koncesionet, ligjin për arsimin e lartë, investimet e huaja, negociatat, etj.

Ai e akuzon Ramën se ka vjedhur zgjedhjet, ndërsa evideton fyerjet e këtij të fundit ndaj gazetarëve.

"Ai që i prek njerëzit me gisht si bostanin dhe e di në janë të pjekur apo të papjekur na qortoi rënde dje faqe njerzisë mua dhe Mark Markun ! “ Reaksionar” na quajti përparimtari, sherrxhinj na vikati paqetuesi e melhemxhiu i mërzive, antireformiste na vuri gishtin kryereformatori !

Vete ai shok i parë në virtyt pranë Krishtit e Muhametit, na akuzoi si te KÇK ( kap ça të kapësh) pikërisht ne që ndërtuam vila në Surrel, ne që dhamë konçensione e tendera për Vilmën dhe të tjeret, ne që nga fakukteti i Histori -Filologjisë ndamë tendera me 20 milion euro kilometri, ne që bëmë ligjin e arsimit të lartë që rrenoi Universitetet.

Ne që nuk sollem asnjë investim të huaj në tete vjet! Ne ore ne që nuk ndërtuam autostraden axurra, tre aeroportet dhe nuk futem 300 mijë shqiptare në punë, ne që pika na raftë! Ne që natën si lugeter mbillnim hashash sukave e gërxheve ! Ne që boshatisem Shqiperinë nga populli i saj dhe nuk ndërtuam asnje rrugë të re, ne që dështuam ne procesin e integrimit dhe genjyem prej gjashte vitesh qe i kemi hapur negociatat e dekoruam edhe ambasadorët.

Ne që bëmë zgjedhje moniste dhe zgjodhëm kokerr për kokerr kriminelë dhe banditë për në parlament e pushtet lokal, ne ore që vodhem zgjedhjet me lopatë, ne që fyejmë e shajmë gazetaret kazan", shkruan ndër të tjera analisti.