U emërua në krye të Autoritetit të Konkurrencës, deputeti i PS doli kundër, audio-përgjimi ku u përfshi Denar Biba në 2014-ën

Me 72 vota pro dhe 37 kundër në seancën plenare, Denar Biba është emëruar si kryetar i Autoritetit të Konkurrencës. Biba ishte anëtar i këtij institucioni dhe propozimi për të qenë kreu i tij erdhi nga PD-ja.

Votimi i tij u shoqërua me debate mes maxhorancës dhe opozitës në Kuvend, ku fillimisht PD pati pretendime se fletët e votimit nuk kanë firmat e përfaqësuesve të saj, si anëtarë të Sekretariatit për Procedurat, Votimet dhe Etikën.

Siç duket, nga PS mungojnë dy vota pro dhe njëra prej tyre ishte paralajmëruar në komision nga deputeti i PS, Erion Braçe.

Sipas tij, Biba nuk është i formuar dhe se nuk ka ekspertizën e duhur për të drejtuar një institucion si Autoriteti i Konkurrencës.

“Kam rezerva për integritetin e zotërisë. Në Shqipëri po zhvillohen procese kushtetuese, dhe kam vetëm një qëndrim për të gjithë”, deklaronte Braçe ndër të tjera.

Audio-përgjimi, shantazhoi gjyqtarin shqiptar në Strasburg, Biba e mohon

Exit.al publikoi në 2018-ën një regjistrim të pjesshëm audio ku sipas saj vërtetohej se qeveria shantazhoi gjyqtarin shqiptar në Strasburg për bllokimin e çështjeve të pronave.

Bëhet fjalë për një bisedë mes Denar Bibës, që atëherë mbante postin e zëvendës Kryetarit të të KQZ-së,  me gjyqtarin shqiptar të Gjykatës së Strasburgut Ledi Bianku, për t’i kërkuar atij të ndikonte tek kryetari i GJEDNJ-së për pezullimin e çështjeve të pronës të qytetarëve shqiptarë.  

Exit.al thotë se biseda është bërë gjatë një vizite në vitin 2014 në Strasburg, ku pjesë informale e delegacionit qeveritar ishte dhe Denar Biba.

Përgjimi i  bisedës së zhvilluar mes Biankut dhe Bibës, " sipas ketij portali, duket se është bërë në një mjedis publik, me gjasa bar ose kafe është dërguar në mënyrë anonime përmes postës elektronike tek ky portal.

"Në regjistrim, Biba shprehet se atë e ka dërguar Engjëll Agaçi, Sekretari i Përgjithshëm i Këshillit të Ministrave, për t’i kërkuar Biankut të ndihmojë qeverinë, duke nënkuptuar se ndihma do shpërblehet, kurse e kundërta do ta lërë Biankun pa hapësirë ne sistemin e drejtësisë se vendit pas mbarimit të mandatit në Strasburg" komenton portali.

Biseda e pergjuar

"Edhe pse regjistrimi ka shkëputje, në të dëgjohen qartësisht fjalët e Bibës" shkruan Exit.al

“Më mori Engjëll Agaçi, Sekretari i Përgjithshëm i Këshillit të Ministrave, e më thotë ç’e ke Ledi Biankun?

I thashë…

Më thonë që nga gjithë këta që kemi afër ne ti e ke [më afër].

[Agaçi më] tha… hajde të pijmë një kafe… ky muhabet të mërkurë, të enjte…

Tha, kemi këto problemet, e di ti gjithë kjo historia që do kërkohet shtyrja.

Të lutem tha, ti lutesh të na gjendet në gjithë këtë histori … sot është Niko Peleshi [këtu në Strasburg] ka takim [me Kryetarin e GJEDNJ-së]”

Biba vazhdon:

“Ma paguan ata biletën…”

Pastaj, Biba i drejtohet Biankut për ta bindur që të pranojë të ndikojë:

“A të ndalon më ky tren në stacion? Të ngelesh pa punë dhe ç’të vajti sakrifica! Njeriu bën kompromise në jetë.”

Biba e mohon

Biba doli në një deklaratë live për mediat për të hedhur poshtë pretendimet se ai ka shantazhuar gjyqtarin e gjykatës së Strasburgut, Ledio Bianku: 

 "Në asnjë lloj rethane nuk ka qenë ndërhyrje e paligjshme. Të dalë biseda e plotë dhe e pacensuruar dhe do të kuptohet që ka qenë biseda mes dy miqsh që ndahen dhe bisedat e punës.

Më ka dhënë mendime, i kam kuptuar mendje. Vazhdoj të jem i habitur për këtë lloj dembilizmi dhe kërkon të bëjë opozitë me çdo gjë.

Asnjë lloj shantazhi dhe asnjë lloj ndërhyrje. I shpjegoja ish pedagogut tim përse e kishet nevojë Shqipëria të merrte këtë shtyrje. Nuk e kuptoj se kush përfiton, sepse as opozita nuk përfiton nga kjo. Të dalë audio e plotë e paperë. Nuk ka absolutisht asgjë. Çdo shkëputje dhe montim "