UKT: 1 orë e 30 minuta ujë në ditë janë të mjaftueshme

Ndërmarrja e Ujësjellës-Kanalizimeve në Tiranë pohoi më në fund se 1 orë e 30 minuta furnizim me ujë u mjaftojnë banorëve të kryeqytetit.

Në një bisedë telefonike me një banor, në prani të kamerës së Televizionit Klan, një nga operatorët e kësaj ndërmarrjeje pranoi atë që drejtuesit e saj po e fshehin prej kaq kohësh, që Tirana po thahet për ujë dhe se kufizimet janë drastike.

Banori: Jam banor i Shkollës së Bashkuar dhe kam probleme me ujin. Shikoj që pasi kthehem nga puna kam probleme dhe mungesë të ujit.

Punonjësja: O zotëri, furnizimi i radhës është në orën 12:30–1:00, sa të karikohet linja. Në rast se nuk e merr, të lutem, do më kontaktosh edhe njëherë?

Banori: Vetëm ky orar është, nuk ka orar tjetër?

Punonjësja: Atëherë, pasdite është në orën 18:30–19:00.

Banori: Domethënë është i rregullt orari.

Punonjësja: Po, në 6:30–7:00 në mëngjes, 12:30–1:00 në drekë dhe 18:30–19:00 pasdite.

Banori: Edhe njëherë oraret të lutem?

Punonjësja: Në 6:30–7:00 në mëngjes, 12:30–1:00 maksimumi në drekë dhe 18:30–19:00.

Këto orare rrëzojnë njoftimet e UKT-së se kryeqyteti furnizohet 3 deri në 5 orë në ditë. Siç kuptohet nga vetë operatorja e kësaj ndërmarrjeje, uji vjen 3 herë nga 30 minuta, në një total prej 1 ore e 30 minutash.

Për të fshehur skandalin e mungesës drastike të ujit, UKT nuk pranon të publikojë zyrtarisht oraret. Një grup xhirimi i Televizionit Klan u interesua pranë zyrave të ndërmarrjes, se në çfarë ore vjen uji në lagje të ndryshme të Tiranës dhe sa orë në ditë furnizohen banorët.

Në vend të një përgjigjeje të qartë për t’u treguar qytetarëve se kur të jenë gati për të mbushur bidona, kova, depozitat apo për të ndezur motopompat, drejtuesit e UKT refuzuan t’i bëjnë publik grafiket duke u fshehur pas zyrave të shumta dhe procedurave burokratike.

Zyrtari i UKT: Tek koordinatori për të drejtën e informimit.

Gazetarja: Kemi aplikuar, deri tani nuk ka ardhur përgjigjja. Unë si qytetare dua të di se kur vjen uji në shtëpi.

Zyrtari i UKT: Nuk është i saktë orari. Ndryshon në bazë të furnizimit. Nuk mund t’jua them dot.

Gazetarja: Si qytetare nuk mund ta marr dot?

Zyrtari i UKT: Nuk ta thotë dot.

Gazetarja: Po të ulem të pres në radhë, do më presë?

Pra, në kryeqytetin e Tiranës, me afro 1 milion banorë, jo vetëm që nuk ka ujë të rrjedhshëm, por nga ndërmarrja përgjegjëse për të siguruar furnizimin, askush nuk thotë dot një orar të saktë se kur mund të ketë ujë në rubinet dhe sa zgjat furnizimi.

Kjo rrëmujë informacionesh tregon kaosin që ndodh me këtë ndërmarrje, që ka afro 1 500 punonjës, ku vetëm drejtori kishte një staf prej 30 vetash, siç deklaroi pak kohë më parë vetë kryeministri Rama.

Në disa lagje të Tiranës, si rruga “Haxhi Bardhi” pranë Vilave Amerikane, uji ka munguar edhe për 4 ditë me radhë. Në zona të tjera të kryeqytetit, të populluara vitet e fundit, uji që vjen nga UKT nuk mjafton për asnjë nga shërbimet që duhet të kryejë një familje.

Nga cepi në cep të Tiranës, në Sauk, Farkë, Selitë, Kombinat, Kinostudio, Fresk, Ali Demi, Laprakë, ish-Bllok, Bulevardi “Zogu i Parë”, 21 Dhjetori, Stadiumi Dinamo, qytetarët përballen çdo ditë me këtë situatë.

Çdo ditë, dhjetëra qytetarë paraqiten në zyrat e UKT-së, por askush nuk i pret dhe askush nuk u jep përgjigje për pyetjen e thjeshtë, se pse kjo ndërmarrje që ka kryer me miliona euro tendera nuk arrin t’u japë qytetarëve gjënë më jetike, ujin për t’u larë, pasi për t’u pirë as që mund të mendohet./TVKlan