Vranë Renis Dobrën në bashkëpunim me Petrit Çakrrin, kush janë 3 vëllezërit Bushgjoka që dyshohen si të përfshirë në krim

Fatjon, Kristi dhe Aleksandër Bushgjokaj, janë tre vëllezërit që dyshohet si autorë të vrasjes së 22-vjeçarit Renis Dobra.

Fatjon Bushgjoka raportohet se është arrestuar në Tiranë dhe ndodhet në Drejtorinë Vendore të Policisë Dibër së bashku me Petrit Çakrri, po ashtu i dyshuar si autor i vrasjes.

Ndërkohë dy vëllezërit e tij, Kristi dhe Aleksandër Bushgjokaj janë shpallur në kërkim nga uniformat blu.

Dobra po kthehej në banesë dhe ndodhej rreth 5 minuta larg shtëpisë kur autorët e rrëmbyen.

Pasi e dhunuan, e mbytën me litar dhe më pas trupin e pajetë të të riut së bashku me makinën ku ai udhëtonte në momentin e rrëmbimit e hodhën drejt liqenit të Shkopetit.

Dyshohet se trupi i 22-vjeçarit Renis Dobra ka dalë nga makina gjatë rrokullisjes, ndërsa u gjet mëngjesin e 9 Korrikut gjatë kërkimeve të familajrëve.

RRËMBIMI I RENIS DOBRËS

Natën e 8 korrikut, teksa Renis Dobra, 23-vjeçari nga Mati po i afrohej shtëpisë së tij në fshatin Zenisht, ai u ndalua nga një automjet ku ndodheshin dy persona të veshur me rroba policie.

Megjithëse autorët u përpoqën të mos linin gjurmë në rrëmbimin dhe më pas vrasjen e Renisit, kushëriri i tij që po udhëtonte nga Burreli drejt Zenishtit ka parë nga afër skenën e ndalimit të Dobrës.

Por kushëriri i viktimës Renis Dobra, tha se ai nuk mundi të shquajë në atë errësirë targat e automjetit të ndaluar në rrugë. Po kështu as portretet e personave që e urdhëruan të largohej nga aty.

“Unë nuk arrita të dalloja dot as targën dhe as fytyrat e personave, sepse kishin ndezur dritat e gjata. Pasi telefonova dhe mora dajën te shtëpia e tij, shkuam te policia që të interesoheshim”, tregon ai.

Sipas dëshmisë së dhënë nga babai i Renis Dobrës atë mbrëmje ai e priste të birin në familje. Pasi kishin një darkë familjare dhe po sipas tij rreth orës 21.30, i biri i kishte dërguar një mesazh që po vinte në familje.

Edhe pse është e paqartë se nga po vinte Renisi ndërkohë, apo cili ishte drejtimi që kishte marrë. Ajo që mesa kuptohet tashmë është se autorët kishin informacion të saktë, për faktin që Renis Dobra, atë mbrëmje, po kthehej në familjen e tij në fshatin Zenisht të Burrelit.

Për këtë arsye njëra nga makinat e ka pritur në rrugën Burrel-Tiranë. Dhe pasi e kanë hipur në automjetin e tyre, me siguri në pjesën e pasme të sediljes, automjetin e Renisit mendohet ta ketë udhëhequr një nga personat e pranishëm, pjesë e togës kriminale,

Kjo deri në një pjesë të segmentit, ku më pas trupin e Renisit e kanë marrë dhe e kanë futur në automjetin e tij, të cilin më pas e kanë hedhur në Liqenin e Shkopetit, aty ku edhe u gjet, disa orë më pas.

Në dyshimet e forta se fillimisht ishte qëlluar me plumb, por më pas në mendimin se ishte mbytur nga ushtrimi i një force njerëzore, kjo për shkak të shenjave të gjetura në trupin e tij dhe sidomos në zonën e qafës.

“Vendi ku mendohet se është rrëmbyer 23 vjeçari Renis Dobra, ndodhet vetëm 5 minuta larg banesës së viktimës. Dyshimet e para janë se autorët e kanë mbytur të riun me litar dhe më pas e kanë futur në makinën e tij tip Benz dhe më tej e kanë hedhur në liqenin e Shkopetit.

Por gjatë rrokullisjes së automjetit, trupi i pajetë i Renis Dobrës ka dalë nga makina, ku ka pësuar dëmtime të tjera në kokë dhe në trup”, thuhet në dosjen hetimore.

Dëshmia e babait të Renis Dobrës

Në emisionin ‘Në Shënjestër’ të gazetares Klodiana Lala, u publikua dhe dëshmia që ka dhënë në polici babai i Renis Dobrës, i cili u rrëmbye e më pas u ekzekutua në makinën e tij, që u hodh nga autorët e kësaj ngjarje makabre në liqenin e Shkopetit.

Të shumta janë hipotezat rreth asaj që mund të ketë ndodhur me të riun, apo arsyen që çuan autorët drejt një makabriteti të tillë.

Hipoteza që lidhen edhe me vetë aktivitetin e 23 vjeçarit i cili thuhet se gjatë qëndrimit 1 vjeçar në Gjermani kishte vuajtur një dënim 6 mujor, për trafikim të lëndëve narkotike.

Ndërkohë që disa muaj në parë ishte parë të konfliktohej në Tiranë, me disa persona.

Por ndërsa u ripyet në lidhje me dijeninë që kishte mbi aktivitetin e të birit, babai i tij Rufati tregoi për grupin e hetues se Renisi kishte pasur një konflikt të ashpër me disa persona, lidhur mbi shitjen e një sasie lënde narkotike të llojit kokainë.

Ngjarje e cila kishte ndodhur kohë më parë në Gjermani. Aty ku siç thamë kishte vuajtur edhe një dënim 6 mujor për trafik të lëndëve narkotike. Qëndrim në Gjermani, nga ku kishte afro një vit që ishte kthyer.

Babai i tij që tregoi se i biri i ishte rrëfyer se disa persona e kishin akuzuar se drogën e kishte shitur për llogarin e tij, pa dijeninë e tyre.Ndërkohë që po Renisi i kishte treguar babait të tij, se kjo gjë nuk kishte ndodhur kështu, Dhe se për shkak të frikës nga policia, drogën e kishte hedhur.

“Atë ditë djali im Renisi doli nga banesa në orën 14.10. Së fundmi ai lëvizte me një automjet tip ‘Benz’ ngjyrë ulli. Rreth orës 21.00, Renisi më telefonoi dhe më pyeti të shkonte te halla, apo të kthehej në shtëpi. Unë i thashë djalit të kthehej në shtëpi. Ky ka qenë kontakti im i fundit me të”, ka dëshmuar babai i Renis Dobrës në polici.

Grupi hetues beson se ky konflikt mund të ketë qenë edhe një nga arsyet përse Renis Dobra u rrëmbye dhe u torturua në atë formë.

Ndoshta si një mënyrë për ta bërë të flasë se ku përfundoi sasia e drogës e humbur prej tij në Gjermani ku poseduesit e kësaj sasie droge duke mos i besuar kanë kërkuar te ai informacionin se ku përfundoi kjo drogë.

Duke ditur golat që trafikantët e kokainës, u bëjnë njëri-tjetrin dhe paratë që humben në të tilla raste, që nuk janë të pakta.

E shkuara në Gjermani dhe fakti që ka pasur probleme me ligjin është një nga pistat ku grupi hetues është ndalur në rrëmbimin e vrasjen e 23 vjeçarit Renis Dobra. E shkuar, e cila po shihet si një element kyç që mund të ndihmojë në zbardhjen e motivit të krimit.

Ku pista kryesore e hetimit lidhet me dyshimet për përfshirjen e tij në veprimtari kriminale, konkretisht në trafikun e lëndëve narkotike.

Ndërkohë që grupi hetimor po punon për të verifikuar nëse viktima ka pasur konflikte të hapura me persona të lidhur me këtë aktivitet, qoftë në Shqipëri apo jashtë saj.