Dinamika e vrasjes në Vlorë, ja kush është viktima

Leartiad Keka, 41 vjeç është vrarë me armë zjarri në Vlorë mbrëmjen e djeshme.

Ngjarja ka ndodhur pranë bibliotekës së qytetit dhe dyshimet e para janë se kemi të bëjmë me një atentat të mirëmenduar me viktimën i cili është ndjekur nga autorët.

Dinamika

Sipas një rindërtimi paraprak të ngjarjes, referuar dhe në dëshmitë e dhëna në polici nga dëshmitarë, ka qenë një automjet tip “Audi” i zi tip A6 me targa italiane që fillimisht ka përplasur viktimën i cili lëvizte me motoçikletë.

Pas përplasjes, 41-vjeçari ka tentuar të largohej në këmbë, ndërkohë nga mjeti tip “Audi” ka dalë një person i maskuar që ka qëlluar me armë zjarri ndaj Lekajt, duke e lënë të vdekur.

Më pas, atentatori është kthyer në mjet për tu larguar nga vendngjarja, ndërsa policia ka ngritur disa pika kontrolli.

Gjatë kontrolleve, efektivët kanë gjetur një makinë të djegur te hangarët e ish-fushës së aviacionit, ndërsa po verifikohet nëse ka lidhje me ngjarjen.

Policia gjeti në vendin e ngjarjes mbi 28 gëzhoja.

Raportohet se policia ka shoqëruar disa persona lidhur me vrasjen e ndodhur mbrëmjen e djeshme, ku i janë marrë dëshmitë, sikundër po heton mbi veprimtarinë e 41-vjeçarit në vitet e fundit, megjithëse ngjarja ka janë ngritur dyshimet më të mëdha është ajo e 23 viteve më parë, që dyshohet se ka shkaktuar edhe ekzekutimin e Lekajt.

Viktima nuk ishte i panjohur për drejtësinë, pasi më herët në dhjetor të vitit 2005, ai ishte marrë si i pandehur për kryerjen e veprës penale të vjedhjes me pasojë vdekjen, të kryer në bashkëpunim me shtetasin Fjodor Mezyraj.

Në një njoftim paraprak të policisë së Vlorës lidhur me krimin thuhet:

“Rreth orës 21:50, në lagjen “28-Nëntori”, në rrethana ende të paqarta, është vrarë me armë zjarri shtetasi L. K., 41 vjeç. Nga kontrolli i zonës, në aksin rrugor “Kotë- Sevaster”, shërbimet e Policisë kanë konstatuar një automjet tip “Audi”, duke u djegur.

Janë ngritur menjëherë pika kontrolli në hyrje/daljet e qytetit të Vlorës dhe në akset “Vlorë-Fier”, “Vlorë-Tepelenë” dhe “Vlorë-Himarë”.

Gjithashtu, shërbimet e Policisë vijojnë krehjen e zonës, me qëllim lokalizimin dhe kapjen e autorëve. Grupi hetimor ndodhet në vendngjarje dhe në drejtimin e prokurorit, po punon për sqarimin e rrethanave të ngjarjes, si dhe për fiksimin e çdo prove që do t’i shërbejë hetimit, me qëllim identifikimin dhe kapjen e autorëve”.

Çfarë ndodhi 23 vite më parë dhe gjykimi

Lekaj është dyshuar, akuzuar dhe më pas gjykuar për një grabitje me pasojë vdekjen e një qytetari në vitin 2000, ndërsa në vitin 2008 ai u shpall i pafajshëm, referuar një vendimi i Gjykatës së Apelit Vlorë, ku çështja u rigjukua pasi u kthye nga Gjykata e Lartë.

Referuar një vendimi të Gjykatës së Lartë të vitit 2005, ngjarja për të cilën akuzohet Lekaj ka ndodhur më 18 Gusht të vitit 2000 te “Kthesa e Gushajve” pranë Llakatundit.

Në atë ngjarje, që sipas hetimeve të kohës ka qenë një tentativë grabitje, ka mbetur i vrarë Vendim Malaj, ndërsa si autorë janë arrestuar dhe dënuar Leartiad Keka dhe Fjodor Mezyraj, të cilët pas një sage të gjatë gjyqësore kanë fituar pafajësinë.

Referuar rindërtimit të ngjarjes, sipas vendimit të Gjykatës, dy persona të maskuar dhe të armatosur i kanë dalë përpara automjetit tip “Benz” të shtetasit Julian Habili, me të cilin ishin duke udhëtuar dhe 4 persona të tjerë banorë të Llakatundit (midis tyre dhe viktima Vendim Malaj), duke i detyruar këta të ndalojnë, të zbresin nga makina dhe te qëndrojnë në pjesën e përparme të saj, me duart pas kokës, për t’i marrë të hollat që kishin me vete.

Ndërkohë që viktima ka kundërshtuar të zbatojë urdhërat e tyre, njeri prej personave te armatosur e ka kërcënuar, sharë dhe goditur me qytën e automatikut dhe me pas, kur viktima i është kundërpërgjigjur duke i kapur automatikun, personat e armatosur kanë shkrepur armët në drejtim të tij. Edhe kur viktima është rrëzuar përtokë, në një kanal buzë rrugës, personat e armatosur i janë afruar dhe e kanë qëlluar përsëri dhe si janë siguruar se ai kishte vdekur janë informuar për vendbanimin e tij, nga bashkudhëtarët e tjerë.

Leartiad Keka dhe Fjodor Mezyraj janë arrestuar pas një dëshmie të një vajze 14 vjeçe, e cila ka pretenduar se ka qenë në shoqërinë e autorëve të dyshuar kur ka ndodhur ngjarja.

Gjykata e Vlorës, më 23.10.2003, ka deklaruar fajtorë të pandehurit Leartiad Keka dhe Fjodor Mezyraj për vjedhje me pasojë vdekjen në bashkëpunim duke i dënuar me 22 vjet burgim secilin. Ky vendim është lënë në fuqi nga Gjykata e Apelit, më 01.10.2004.

Në vendimin e Gjykatës së Lartë sqarohet se nga mbrojtja është kërkuar kryerja e eksperimentit hetimor, që është rrëzuar si në shkallën e parë ashtu dhe në Apel.

Në këto kushte, GJL ka vlerësuar se dy vendimet e mëparshme janë të dhënë bazuar në një hetim jo gjithëpërfshirës, pra vetëm në thëniet e 14-vjeçares, të cilat nuk përputhen me ato të të dëmtuarve. Po ashtu, vlerëson se rrëzimi i kërkesës për kryerjen e eksperimentit hetimor ka qenë i padrejtë. Me vendimin e vitit 2005, GJL ka vendosur kthimin e çështjes për rigjykim në Gjykatën e Apelit dhe kryerjen e eksperimentit hetimor.

Më tej, në vitin 2008, çështja është pushuar dhe autorët janë cilësuar të pafajshëm, për shkak të mungesës së provave që të vërtetojnë përfshirjen e tyre në krim.